Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 38 Bible Online

Jeriemiéjo 38 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 38

¹I šundiá Safatija [Šefatija-ju.o.], čhavó Matanoskiro, i o Godolija [Gedalija-ju.o.], čhavó Pashuroskiro, i Juhalo, čhavó Selemijaskiro (Šelemejaskiro), i Pashoro, čhavó Malhiiakiro’, — lavá, so phendiá proróko Jeriemiéjo saré manušénge, rakirí:

²‘Adiáke rakiréla Raj Devél: “Kon jačélape dro davá fóro, odová meréla kurtalátyr, bokhátyr i meribnytkone fransendyr, ne kon džála ke Xaldiéi, odová javéla te dživél: i léskiro džiibén javéla syr počastunko léske, i jov javéla džidó.”

³‘Adiáke rakiréla Raj Devél: “Davá fóro, syr phendló, otdelape dre vastá kralískire Vavilonóskire xaladenge, savé léna les.”

⁴Paldavá e thagárja phendlé kralíske: “Ame mangasa tut, sob (kaj) te muliakirén adalé manušés, pal-dová so, sóske jov bizorjakirela vastá manušéngire, savé marenape, sob (kaj) te jačénpe dro davá fóro, i vastá saré manušénge, kóli jov rakiréla dasavé lavá lénge? Kadavá manúš na rodéla [na kaméla-r.s.] lačhipén dalé manušénge, a bibáht (bída).”

⁵O králi Sedekíia tedy phendiá: “Dykhén, jov isyn dre tumaré vastá. Kralíske naštý ničý te kerél proti tuménde.”

⁶Tén'ci jone lyné Jeriemiejos i čhurdyné les dre štaribnytko ĥanbín, saví sys ke Malhiia, kralískiro čhavó, pe gréda (dvóro) štaribnaskiri i jone mekné Jeriemiejos telé šelenca. Dre ĥanbín štaribnaskiri na sys paní, ne jékh bláta (blatany artapiél'[6]). I lyjá te tasadjol Jeriemiéjo dre bláta.

⁷I Avdiemieliého (Ebed-Mieliého) Efioplianino, o jevnuho dro kralískiro kher, šundiá, so jone čhudé Jeriemiejos dre štaribnytko ĥanbín (jama). Kiéli o králi sys beštó pašýl pórta Vienjaminoskiri,

⁸to o Avdiemieliého gijá javrí kralískire kheréstyr i phendiá kralíske, rakirí:

⁹“Miro Rajo králjo! Kadalé manušá kerdé fuipén dro saró, so jone kerénas, Jeriemiejoske, prorokoske, savés jone čhurdyné dro štaribnytko ĥanbín, i jov meréla pir dová, so isyn bokh pe dová štéto, kaj jov isyn: pal-dová so nane butýr maró dro fóro.”

¹⁰I priphendiá králi Avdiemieliehoske, Efioplianinoske, phení: “Le adathýr trijánda manušén pésa, i ĥazdén upré Jeriemiejos prorokós, štaribnytkone ĥanbinatyr angíl dová, syr jov meréla.”

¹¹I lyjá Avdiemieliého manušén tel péskiri zor, i jov zagijá dre kralískiro kher tel piralý, i lyjá odothýr phurané patave i phurané idiéngire koterá (kuski), i mekciá len telé pe šele dre štaribnytko ĥanbín.

¹²I phendiá Avdiemieliého, Efioplianino, Jeriemiejoske: “Podčhuv phurané patave i phurané idiengire koterá tel phaká, i tel šele.” I kerdiá, Jeriemiéjo adiáke.

¹³I jone lyné te tyrden upré Jeriemiejos šelenca i ĥazdyné les javrí štaribnytkone ĥanbinatyr: i jaciápe Jeriemiéjo pe gréda (dvóro) štaribnaskiri.

¹⁴I králi Sedekíia, bičhadiá, sob (kaj) te janén prorokós Jeriemiejos ke pe ke tríto zagiibén dro Kher Ráskire-Devléskiro. I phendiá králi Jeriemiejoske: “Me phučava tútyr vari-so. Na garav nisó mándyr.”

¹⁵I Jeriemiéjo phendiá Sedekijaske: “Kóli me podava zan (zvies') túke, ci na muliakiresa tu man? I kóli me dáva godý túke, ci tu javésa te kandes man?”

¹⁶I králi o Sedekíia dyjá sovláh čorahanés Jeriemiejoske, rakirí: “Te javél džidó Raj Devél, Kon sozdyjá amaré dalé dijá, so me na muliakirava tut, i so me na vydava tut dre vastá manušéngire, savé rodéna tyró di.”

¹⁷Tén'ci phendiá Jeriemiéjo Sedekijaske: ‘Adiáke rakiréla Raj Devél: bolybnáskire-jangoléngiro, Devél Izrailjoskiro: “Kóli tu kokoró péstyr džása muj pe muj ke Vavilonóskire thagárja, to tyró di javéla džidó, i davá fóro na javéla xačkirdo jagása; i tu javésa džidó, i tyró kher.

¹⁸Ne kóli tu na džása muj pe muj ke Vavilonóskire thagárja, to tedy davá fóro javéla dynó dre vastá Xaldiejéngire, i jone xačkirena les jagása, i tu nikaj na keresape (na desape) léngire vasténdyr.’”

¹⁹I o králi Sedekíia phendiá Jeriemiejoske: “Me darava Judeiendyr (Judendyr), savé našné (piriginé) ke Xaldiéi, sob (kaj) e Xaldiei te na vyden man dre vastá léngire, i sob (kaj) jone te na kerén mánca, so jone zakamena.”

²⁰Ne Jeriemiéjo phendiá: “Jone na vydena tut. Šun, me mangáva tut, zan Ráskire-Devléskiri dro dová, so me phenáva túke, i tyró di javéla te dživél.

²¹Ne kóli tu otphenesape te zdespe, to, ake, isyn lav, so Raj Devél sykadiá mánge:

²²‘Áke, saré džuvlién, savé jačnépe dro kher kralískiro pe Judéia, janéna ke Vavilonóskire thagárja, i kodolé džuvliá phenéna túke: ‘Tyré malá podrakirde tut, i jone lyné upralypén pe túte, tyré ĥerá tasadyne dre bláta (artapiel') I jone risiné krig tútyr.’

²³I jone lydžána krig tútyr tyré džuvlién i tyré čhavorén Xaldiejenge, i tu nikaj na keresape léngire vasténdyr, ne kralískiro vast Vavilonóstyr léla tut. I tu kerésa adiáke, so davá fóro shačkirena jagása.’”

²⁴I Sedekíia phendiá Jeriemiejoske: “Mek nijékh te na džinél dalé lavá, i tu na merésa.”

²⁵Ne kóli te šunén thagárja, so me rakirdjom túsa, i jone javéna ke tu, i phenéna túke: ‘Piride aménge so tu akaná phendián kralíske, i adiáke-pac' dová, so králi phendiá túke; na garav ničý améndyr, i ame na dasa tut pe meribén’,

²⁶to tu tedy phenésa lénge: ‘Me čhudjom miro mangipén angíl kralíste, sob (kaj) jov te na riskirél man dro Ionafanoskiro kher te na merav odój.’”

²⁷I saré thagárja javné ke Jeriemiéjo i jone phučné léstyr, i jov phendiá lénge saré odolé lavá, so o králi priphendiá. I jone giné krig léstyr štylés, pal-dová so jone na šundlé, pal so sys rakiribén kralísa.

²⁸I Jeriemiéjo jačelaspe pe gréda (dvóro) štaribnaskiri angíl/ ke dová dyvés, syr Jerusalimo lyné. I sys jov odój, kiéli lyné Jerusalimo.