Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 39 Bible Online

Jeriemiéjo 39 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 39

¹I sys adiáke: dro déšto čhon, dro jeniáto (bijekhéskiro déšto) berš, kiéli o Sedekíia sys Judejákiro králi, javdiá o králi Navuhodonosóro Vavilonóstyr i saró léskiro xaladybén proti Jerusalimo, i jone občhude trusciál (krugom) fóro.

²I dro dešupervo berš Sedekijaskiro dro štárto čhon, pe jeniáto (bijekhéskiro déšto) dyvés čhonéskiro, fóro lyné,

³i saré thagárja Vavilonóskire kralístyr giné andré fóro i bešné pašýl Maškiratuny pórta: o Niergal-Šariecero, o Samgar-Nievo, o Sarsiehimo, šeraló jevnuho, o Niergal-Šariecero, šeraló tanuka[7], i saré javír thagárja kralískire Vavilonóstyr.

⁴I sys adiáke: kiéli o Sedekíia, králi Judejákiro, i javír muršá xaladéngire (maribnýtka) dykhné len, tedy jone lyné te našén, i jone giné javrí foróstyr ratý, kralískire untasa (sadosa) pirdál pórta maškirál duj vánty. I jone giné dromésa pir dólo Jordanoskiro.

⁵I xaladybén Xaldiejengiro tradyjape pal lénde dre šale[8] i jone dotradyne les pe loščyny (malia) Jerihonoskire. I kiéli jone lyné les, to jandlé les ke králi Navuhodonosóro Vavilonóskiro ke Rivla pe phuv Jemafo (Xamato), kaj Navuhodonosóro sendiakirdia les.

⁶I králi Vavilonóskiro muliakirdiá čhavén Sedekijaskiren angíl léskire jakhá dre Rivla, i králi Vavilonóskiro adiáke-pac' muliakirdiá lačhé-rodoskire ran Judejátyr;

⁷i jov phusadia jakhá Sedekijaske i jov phandia les dre sastyrá zandir'jenca te lydžán les ke Vavilóno.

⁸I e Xaldiéi xačkirdé kralískiro kher i kherá manušéngire jagása, i jone phagirdé vánty telé Jerusalimóskire.

⁹I o Navuzardano, o raj pe kralískiri stréga, lydžijá krig dro pliéno ke Vavilóno manušén, savé jačnépe dro fóro, i kodolén, kon pirigija ke jov javire manušénca, savé jačnépe.

¹⁰Ne o Navuzardano, raj pe kralískiri stréga, mekciá čororé manušén, konéste ničý na sys, pe phuv Judejakiri, i jov dyjá lénge vinagradýtka barja i féldy dro dová-pac' časo.

¹¹I Navuhodonosóro, králi Vavilonóskiro, priphendiá adiáke pal Jeriemiejoste Navuzardanoske, ráske pe kralískiri stréga:

¹²“Le les i dykh pal léste i na ker čoripén léske, ne ker vaš léske adiáke, syr jov priphenela túke.”

¹³I bičhadiá o Navuzardano, raj pe kralískiri stréga, i o Navuzardano, šeraló jevnuho, i o Nergal-Šariecero, šeraló tanuka, i saré thagárja Vavilonóskire kralískire,

¹⁴i jone bičhadé i lyné Jeriemiejos štaribnaskire gredatyr (dvorostyr) i jone dyné les Godolijaske, čhavéske Ahakimoskireske (ŭnuko Šafanoskiro), sob (kaj) jov te lel (otlydžal) les kheré. Adiáke jov jaciápe te dživél maškír manušénde.

¹⁵I sys lav Ráskire-Devléskiro Jeriemiejoske, kiéli jov sys phandlo pe štaribnytko gréda (dvóro), rakirí:

¹⁶“Džá i phen Avdiemieliehoske (Eviéd-Mieliehoske), Efioplianinoske: ‘Adiáke rakiréla bolybnáskire-jangoléngiro Raj Devél, Devél Izrailjoskiro: ‘Ake, Me janáva Miré lavá pe davá fóro vaš traš (dar), a na vaš lačhipén, i jone kerénape dro čačipén dro dová dyvés angíl túte!

¹⁷Ne Me zrakháva tut dro dová dyvés,’ — rakiréla Raj Devél, — ‘i tut na vydena dre vastá manušéngire, konéstyr tu daresa.

¹⁸Pal-dová so Me čačes zrakháva tut, i tu na peresa kurtalátyr, ne tyró džiibén javéla syr doresybén (dyibén) túke, pal-dová so tu riskiresa ke Me péskiro iló te zrakhespe’”, — phendiá Raj Devél.