Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 4 Bible Online

Jeriemiéjo 4 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 4

¹‘Kóli tu risjosa, Izrailie’, — phendiá Raj Devél, — ‘risjov ke Me. I kóli tu vyčhurdesa péskire džungalé (brydka) devloré Miré jakhéndyr, tén'či tu na javésa te paruves péskiro drom.

²I tu javésa te sovlahas: “Te javél džidó Raj Devél patiaibnása, sendosa i čačipnása, sob (kaj) Me te bahtiakirav sarén Najuden, sob (kaj) Mándyr jone te barjakirén pes!”

³I adiáke phendiá Raj Devél manušénge Judejátyr i Jerusalimóstyr: ‘Rospharaven (rospašynen) načilade phuvjá (čhučé phuvjá), i na čhuvén giv dre phuv maškír phusadytka xrústy.

⁴Občhinen pes vaš Mánge, Ráske-Devléske, i zlen cýpa tumaré ilendyr, tumé, manušále Judejátyr, i kon dživéla ke Jerusalimo, sob (kaj) te na perél Miro xoliakiribén syr jag, i sob (kaj) te zahačol adiáke, so nikón na mud'kirela, pal-dová so tumé kerdé bibáht.

⁵Poden zan (zvies') dre Judéia, obzaniakiren dro Jerusalimo i phenén: ‘Phurdén dre rógi (truby) pir phuv: rovén, kedenpe khetané i phenén: ‘Skedénpe i džása andré fórja maribnytkoné (zoralé) vantenca.’

⁶Ĥazden sciago karing Sióno: našén, na jačénpe (na terdjon). Pal-dová so Me janáva bibáht paš-ratitkoné (šylale) rigátyr i bari xas' (baró xasibén).

⁷Ščer (liévo) vydžála péskire xaščatyr i xasiakiribnaskiro pe Najudytkoné manušénde: jov džála péskire, štetóstyr te čhučakirel Judejakiri phuv, sob (kaj) fórja dre Judéia te javén čhučé, bi manušéngiro.

⁸Paldavá podphandenpe žalobnone gonesa, obroven i rovén godlása: pal-dová so Ráskire-Devléskiro xoliakiribén, na risijá améndyr.

⁹‘I javéla adiáke dre dová dyvesá’, — rakiréla Raj Devél, — ‘so kralískiro i thagar'jengire ile zamerena, i dívo darása uhtyléla rašán, i prorokénde kerénape baré jakhá trašatyr (darátyr)!

¹⁰I phendjom tedy Me, Jeriemiéjo: “Ah, Dévla, Rajo-Devlale! Naúšto Tu zalydžijan dre frotyma kadalé manušén Jerusalimóstyr, phení: ‘Tuménde javéla ramánjo!’ Ne kiéli čačunés kurtála isyn pašýl léngire dijá.”

¹¹Dro dová časo javéla phendló kadalé manušénge i Izrailjoske: “Šukí balvál džála vučé šteténdyr, so isyn pe čhučé prahi, pe Miré manušénde, na, sob (kaj) te žužakiren, ci, sob (kaj) te vieinel syr giv;

¹²ne daja balvál dolé šteténdyr javéla zoraledýr pir Miro priphenybén: akaná Me phenáva miré lavá te sendiakirav len.

¹³Ake, vérgo džála telé sýrby óbloki i léskire maribnýtka vurdená javéna syr riskiribnaskiri balvál, a léskire grajo isyn sygedýr orlendyr (kidendyr). “Bida aménge! Pal-dová so ame xasijam!”

¹⁴Vymoren tumaré ile fuipnastyr, sob (kaj) tuménge te zrakhenpe. Syr ĥará bibahtalé dúmy javéna dre tumaré šeré?

¹⁵Pal-dová so zan džála Danostyr, šylale rigátyr, i pal bedypen (xasibén) zaniakirena Jefraimoskire bergátyr:

¹⁶“Den te džinén pal davá Najudénge, — mek Jerusalimo te šunél, so vérgi džána duratuné phuvjátyr te oblen trusciál fóro, i jone gazdena péskiri gódla pe Judejákire fórja.

¹⁷Sýrby rakhibnaskire pe félda, jone saré obdžana trusciál Jerusalimo, pal-dová so davá fóro gazdyja búnto pe Mánde’, — phendiá Raj Devél.

¹⁸Dová, syr tumé dživdé i so tumé kerdé, manušá Judejátyr, sys pričyna, so kerdiápe tuménca.

¹⁹Miro di kaljola! Miro di kaljola, saró miro iló dukhala tugatyr! Syr izdrala miro iló roibnastyr, mánge naštý te javav štyl, pal-dová so tu šunesa, miro di, syr bašavela rógo (truba), syr déna gódla, kaj džála maribén.

²⁰Has' (bída) džála pal xas' (bída), dykhén, syr saró pe phuv isyn rozmardo, miré šátry (budy) pe jakhá rosphagirdé, i angíl jakhá xasiakirdé šatrakiro pologo.

²¹Syr ĥará (dlúges) mánge te dykháv pe sciago (pe flago), i te šunav rogoskiri zan?

²²‘Pal-dová so Miré manušá isyn nalačhé, jone na džinéna Man, — rakiréla Raj Devél — ‘jone isyn na god'varé, jone isyn godé te kerén bibáht (čoripén), ne jone na džinéna te kerén lačhipén.”

²³Me, Jeriemiéjo, dykháva pe phuv sýrby dro sunó, i, ake, — joj isyn našady i čhučí; i, ake, pe bolybén — nane dud (svéto) pe léste.

²⁴Me dykháva pe bérgi, i, ake, — jone izdrana, i saré bérgicy trinskirnape odorík i pale.

²⁵Me dykháva duredýr, i, ake, — nane nijékh manúš, i saré bolybnáskire čirikliá vurniandyne krig.

²⁶Me dykháva duredýr, i ake, — Karmilo (phabuny félda) kerdiápe syr čhučí phuv; i saré lákire fórja isyn phagirdé pe bará angíl Raste-Devléste, Léskire baré xoliátyr.

²⁷Pal-dová so adiáke phendiá Raj Devél: “Sarí phuv javéla čhučakirdy (čhučí), ne Me na sarésa xasiakiráva phuv.

²⁸Daléstyr phuv javéla te tuginel zoralés, i bolybén uprál javéla kaló, pal-dová so Me, Raj Devél phendjom davá, Me čhudjom dre godý davá; Me na kovljovava, Me na risjováva pale.

²⁹Kažno (sváko) manúš javéla te našél krig godlatyr, so ĥazdéna uklistengire xaladé, i kar'je-dyibnarja lukostyr. Vari-savé džána krig dre xaščy (zarosli), i javír zaresena pe bérgi. Kažno fóro javéla meknó, i nijékh manúš na javéla te dživél odój.

³⁰I tu, rosčordo Jerusalimo, so tu javésa te kerés? Mek tu i te ur'jéspe dro kuč loló plaščo, mek tu i te šukarjakires pes gožone viankenca suvnakástyr, mek tu i te podmakhes péskire jakhá makhluniasa (kraskasa), ne ivjá (naprásnes) tu saró gožakiresa pes, Tyré dróga malá dykhéna vučipnástyr pe túte, jone rodéna te muliakirén tut.

³¹Pal-dová so me, Jeriemiéjo, šundjom gódla sýrby džuvliatyr, kon pharés bijanéla, davá isyn džuvliakire pharé ĥondiá sýrby kodoliate, kon bijanéla pérvo mólo lákire bijatós, Jerusalimóskiri gódla isyn sýrby kodoliate, saví menčynelape zoralés i protyrdela vastá, phení (rakirí): “Bida mánge! Miro di našavela zor angíl muliakiribnaskirende!”