Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 41 Bible Online

Jeriemiéjo 41 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 41

¹I sys adiáke, so dro eftáto čhon o Ismailo, čhavó Nafanijaskiro (čhavó Elisamoskiro) kralitkone rodóstyr, i jekh kralískiro baró raj javdiá ke Godolija, čhavó Ahikamoskiro dre Masífa deše manušénca. I odój jone xané maró khetané dre Masífa.

²I o Ismailo, čhavó Nafanijaskiro, i deš manušá, savé sys lésa, uštyné i pekade pe meribén Godolijas, čhavés Ahikamoskires (ŭnukos Safanoskiros) kurtalása, i zamardé les, konés Vavilonóskiro králi čhudiá šeralé rása pir dová them (strana).

³I o Ismailo adiáke-pac' pekadiá pe meribén saré Judén, savé sys Godolijasa dre Masífa (Micpa), i Xaldiején, konés jov lathiá odój: maribnytkoné (xaladytkone) manušén.

⁴I sys pe javír dyvés paló dová, syr o Ismailo muliakirdiá Godolijas, kiéli iščo (inké) nijékh na džindiá davá,

⁵to, kiéli javné manušá Sihemostyr, Silomostyr (Šilostyr)[11] Samarijatyr, ohtodešá manušá muradé čhorenca (brodenca), riskirdé upré idienca, savé počhindle pes. Lénde sys dre vastá svénta dyibená, i dróga smóly, sob (kaj) te janén len dre Kher Ráskire-Devléskiro.

⁶I o Ismailo, čhavó Nafanijaskiro, gijá angíl Masifatyr te pirilen len, rovindoj saró drom i, kiéli jov gijá. I sys adiáke: kiéli jov dykhciape lénca, tedy phendiá lénge: “Džán ke Godolija, čhavó Ahikamoskiro.”

⁷I sys adiáke: kiéli jone zaginé maškír fóro, o Ismailo, čhavó Nafanijaskiro — jov i manušá, kon sys lésa, muliakirdé len i čhurdyné len maškirál rovo (xohói).

⁸Ne deš manušá lathnepe maškirál lénde, savé phendlé Ismailoske: “Na muliakir amen, aménde sys piraliá parné givesa, ĥerstytkone (jačmienytkone) marésa, maslinytkone dzetesa (ksilesa), i javginesa pe félda.” I jov obrikirdia pes i na zamardiá len maškír léngire pšalénde.

⁹I rovo (xohói) dro savó Ismailo čhurdyjá trúpy manušéngire, savén jov muliakirdiá pal Godolijaste, isyn dová, so králi Asá kerdiá pir dar Vaasatyr, kralístyr Izrailjoskirestyr: o Ismailo, čhavó Nafanijaskiro pherdiakirdiá rovo (xohói) mulenca.

¹⁰I Ismailo lyjá dro pliéno saré manušén, savé jačnépe dre Masífa, kralískire čhajén, i saré manušén, savé jačnépe dre Masífa, konés Navuzardano, raj pe kralískiri stréga, dopatiandyja Godolijaske, čhavéske Ahikamoskireske: Ismailo, čhavó Nafanijaskiro lyjá dro pliéno len, i gijá péske, sob (kaj) te piridžal ke Amonoskire čhavé.

¹¹Ne, kiéli Iohanano, čhavó Kariejoskiro (Karieahoskiro), i raja xaladéngire, savé sys lésa, šundlé pal sarí bibáht, so kerdiá Ismailo, čhavó Nafanijaskiro,

¹²to jone lyné saré manušén i giné te marénpe Ismailosa, čhavésa Nafanijaskiresa; i jone lathné les pašýl baré paniá, so syn dro Gavaóno.

¹³I sys adiáke: kiéli saré manušá, kon sys Ismailosa, dykhné Iohananos, čhavés Kariejoskires, i saré ran xaladengiren, savé sys lésa, jone jačné ráda.

¹⁴Tén'ci saré manušá, savén o Ismailo lydžijá dro pliéno Masifatyr, risiné krig i javné pale, i giné ke Iohanano, čhavó Kariejoskiro.

¹⁵Ne Ismailo, čhavó Nafanijaskiro, nascia Iohananostyr ohtone manušénca i gijá krig ke čhavé Amonoskire.

¹⁶Tén'ci Iohanano, čhavó Karejaskiro, i saré raja xaladéngire, savé sys lésa lyné sarén, konés jov riskirdiá pe vólia Ismailostyr, čhavestyr Nafanijaskirestyr, paló dová, syr jov muliakirdiá Godolijas, čhavés Ahikamoskires muršén maribnytkonen, džuvlién i bijatén, i jevnuhen, savén jov jandiá pale Gavaonostyr.

¹⁷I giné jone i jačnépe te dživén dro gav Ximamo, savó isyn pašýl Vifliejémo, sob (kaj) te javél pe drom lénge te našén ke Jegípto,

¹⁸Haldiejendyr, pal-dová so jone darándyne léndyr, pir dová, so Ismailo, čhavó Nafanijaskiro, muliakirdiá Godolijas, čhavés Ahikamoskires, konés králi Vavilonóskiro čhudiá šeralé rása pe doiá phuv.