Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 42 Bible Online

Jeriemiéjo 42 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 42

¹I saré raja xaladéngire, i Iohanano, čhavó Karejaskiro, i Iiezanija (Jezanija), čhavó Gošaijaskiro, i saré manušá tyknestyr ke sámo baredýr giné pašýl,

²i phendlé Jeriemiejoske, prorokoske: “Ame mangasa zoralés tut, sob (kaj) te perél angíl túte amarí pátieri (molítva), i, sob (kaj) tu te pomangespe pal aménde Ráske-Devléske, tyré Devléske, pal sarénde, savé jačnépe, pal-dová so butendyr jaciápe drieván nábut (kutý) améndyr, syr tu dykhésa,

³sob (kaj) Raj Devél, tyró Devél, mek te sykavél aménge drom, savésa trej te džas i dová, so aménge te kerás.”

⁴I phendiá lénge proróko Jeriemiéjo adiáke: “Me šundjom. Ake, me javáva te mangavpe Ráske-Devléske, tumaré Devléske pir tumaré lavá: i sob (kaj) te na javél, so Raj Devél otphenéla tuménge, dová me phenáva angíl sarénde tuménge: me nisó na garavava tuméndyr.”

⁵Tén'ci jone phendlé Jeriemiejoske: “Mek Raj Devél te javél čačunó i patiaibnaskiro jakhítko maškír aménde, kóli ame na javása te kerás pir lav, savó Raj Devél, tyró Devél, bičhavéla ke ame.

⁶Sob (kaj) te na javél: lačhó ci bibáht, ame javása te šunas zan Ráskire-Devléskiri, amaré Devléskiri, ke Kon ame bičhadiam tut, sob (kaj) te javél saró mištó aménca, kiéli ame javása te kandas zan Ráskire-Devléskiri, amaré Devléskiri.”

⁷I davá sys paló deš dyvesá, so lav Ráskiro-Devléskiro javdiá ke Jeriemiéjo.

⁸I jov khardiá ke pe Ioananos, čhavés Kariejoskires, i saré ran xaladengiren, kon sys lésa i saré manušén naj tyknestyr ke naj baredýr (sámo baró),

⁹i phendiá lénge: “Adiáke rakiréla Raj Devél, Devél Izrailjoskiro, ke Savó tumé bičhadé man te čhuvav tumaró mangipén angíl Léste:

¹⁰Kóli tumé jačénape pe daja phuv, tedy Me ĥazdáva pe phuv tumen i občhuvava tumaró džiibén i Me na vyriskirava [muliakirava-r.s.] tumen: pal-davá so Me piridživava pal doiá bída, saví Me kerdjom tuménge.

¹¹Na darén Vavilonóskire kralístyr, savéstyr tumé daréna, na darén léstyr’, — rakiréla Raj Devél, — pal-dová so Me som tuménca te zrakhav tumen i te vyrakhav tumen léskire vastéstyr.

¹²I Me sykaváva tuménge tangipén (láska), sob (kaj) jov, xaj, te potanginel tumen, i te riskirél tumen pe tumarí phuv.’

¹³Ne kóli tumé phenéna: ‘Ame na lása (kamasa) te dživás pe daja phuv’, sob (kaj) te na kandén zan Ráskire-Devléskiri, tumaré Devléskiri, rakirí:

¹⁴‘Nad, ame fedýr džása ke phuv Jegiptóskiri, kaj ame na javása te dykhas maribén, i te na šunas rogoskiri zan, i te na javas bokhalé pe maró, i, odój ame javása te dživás,’

¹⁵to akaná šunén lav Rástyr-Devléstyr, tumé, savé jačnépe Judastyr! ‘Adiáke rakiréla bolybnáskire-jangoléngiro Raj Devél, Izrailjoskiro Devél: Kóli tumé sarésa riskirdé péskire muiá te džán dro Jegípto, i džána te dživén odój,

¹⁶to javéla adiáke, so kurtála, savjátyr trašavena (daréna) tumé, doreséla (lathéla) naužakirdes tumen odój pe phuv Jegiptóskiri; baró bokhalypen, savéstyr tumé daréna, javéla te džal pal tuménde pal psiké odój, dro Jegípto, i odój tumé meréna.

¹⁷I javéla adiáke, so saré manušá, savé riskirena péskire muiá te džán ke Jegípto, sob (kaj) te dživén odój, meréna kurtalátyr, bokhátyr i meribnytkone fransendyr, i nijékh léndyr na jačélape, i nikaj na kerlape baré bibahtiatyr (bidatyr), so Me janáva pe lénde.’

¹⁸Paldave adiáke rakiréla bolybnáskire-jangoléngiro Raj Devél, Izrailjoskiro Devél’: ‘Syr mirí xolý i miro xoliakiribén čhuvélape pe manušénde Jerusalimóstyr, adiáke-pac' vyčhuvelape Mirí xolý pe tuménde, kiéli tumé džána andré Jegípto; pe tuménde javéla prokošybén (arman), bari dar [čhučipen-ju.o.], košybén, bipatyv; i tumé butýr na dykhéna davá štéto’”

¹⁹Raj Devél phendiá tuménge: “Tumé, savé jačnépe Judastyr: na džán ke Jegípto:” Saré džinéna, so me, Jeriemiéjo, sykliakirdjom tumen te prirakhenpe pal davá dyvés.

²⁰Pal-dová so tumé xohade pes dre tumaré ile, kiéli tumé bičhadé man ke Raj Devél, tumaró Devél, phení: “Pomangpe pal aménde Ráske-Devléske, amaré Devléske: i saró, so Raj Devél, amaró Devél phenéla, to tu phenésa angíl sarénde — i dová ame javása te kerás.”

²¹I me phendjom davá akaná adadyvés tuménge, ne tumé na kandyné zan Ráskire-Devléskiri, tumaré Devléskiri i saró dová, sósa Jov bičhadiá man ke tumé.

²²Akaná paldavá džinén adiáke, so tumé meréna kurtalátyr, bokhátyr i meribnytkone fransendyr pe dová štéto, ke savó tumé kaména te džán te dživén.’”