Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 43 Bible Online

Jeriemiéjo 43 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 43

¹I sys adiáke: kiéli Jeriemiéjo pirijaciá (končyndia) te rakirél angíl saré manušénde saré lavá Ráskire-Devléskire, léngire Devléskire, savénca Raj Devél, léngiro Devél, bičhadiá les ke jone — saré dalé lavá,

²to Azárija, čhavó Osaijaskiro (Gosaijaskiro); Iohanano, čhavó Kariejoskiro i saré phut'kirdé manušá, phendlé Jeriemiejoske: “Tu rakirésa načačipén! O Raj Devél, amaró Devél, na bičhadiá tut te phenés: ‘Na džán ke Jegípto te dživén odój!’

³Ne davá isyn Varuho, čhavó Nirijaskiro, kon podrakirela tut proti aménde, sob (kaj) te vydes amen dre vastá Xaldiejengire, sob (kaj) jone, te muliakirén amen, ci te lydžán krig dro pliéno ke Vavilóno.”

⁴Ake, o Iohanano, čhavó Kariejoskiro, i saré raja xaladéngire i saré manušá, na kandyné zan Ráskire-Devléskiri, sob (kaj) te jačénpe te dživén pe phuv Judejakiri.

⁵Ne Ioanano, čhavó Karejaskiro i saré raja xaladéngire, lyné sarén, savé jačnépe Judejátyr, kon na risiné te jačénpe te dživén pe Judejakiri phuv, saré Najudytkoné nacyiéndyr, ke savé len tradyne —

⁶muršén, džuvlién, bijatén, kralískire čhajén i kažnoné (svakone) manušés, konés o Navuzardano, raj pe kralískiri stréga, jačkirdiá Godolijasa, čhavésa Ahikamoskiresa (unukosa (niepotosa) Šafanoskiresa), i Jeriemiejos, prorokós, i Varuhos, čhavés Nierijaskires.

⁷I jone giné ke phuv Jegiptóskiri, pal-dová syr jone na kandyné zan Ráskire-Devléskiri. I jone doginé ke Tafniso [Tafanhiéso-ju.o.].

⁸I sys dro Tafniso lav Rástyr-Devléstyr ke Jeriemiéjo, rakirí:

⁹“Le baré bará dre vastá péskire i garav len dre ĥleja (glina) dro bar, savó isyn pe štéto, syr džása andré kher Faraonóskiro pe jakhá saré Judéngire,

¹⁰i phen lénge: ‘Adiáke rakiréla bolybnáskire-jangoléngiro Raj Devél, Devél Izrailjoskiro: Áke, Me bičhaváva i lavá Navuhodonosoros, kralís Vavilonoskires, Miré pisharís, i Me čhuváva léskiro trono pe kadalé bará, savé Me garadjom. I jov rosčhuvela pir rigá péskiri kralítko bari šátra uprál pe lénde.

¹¹I javéla jov i rozmarela phuv Jegiptóskiri, kon isyn bangó te merél, džála pe meribén, kon bangó dro pliéno, džála dro pliéno, kon bangó tel kurtála, džála tel kurtála.

¹²Me roshačkirava jag dre kherá, pe mangipnytka štéty, kaj devloré Jegiptóskire, i o Navuhodonosóro shačkiréla len i léla len dro pliéno. I jov vykedéla mištypén phuvjátyr Jegiptoskirjatyr syr o čhupnári vykedéla (ur'jéla) pe péste péskiro uribén, i jov džála krig odothýr ramanjosa (spokojosa).

¹³Jov phagiréla telé obsvencona stýlby (statuly) dro Befsamiso (Bef-Semesa), so isyn pe phuv Jegiptóskiri, i mangipnytka (devlorengire) štéty dro Jegípto jov xačkiréla sarésa jagása.’”