Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 44 Bible Online

Jeriemiéjo 44 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 44

¹Lav, savó sys Jeriemiejoske pal saré Judénde, kon dživdiá pe phuv Jegiptóskiri, savé jačné te dživén ke Magdola [Migdola-ju.o.], i dro Tafniso (Tafaniesa), dro Nofo, i pe phuv Pafrososkiri, rakirí:

²“Adiáke rakiréla bolybnáskire-jangoléngiro Raj Devél, Devél Izrailjoskiro: ‘Tumé dykhné sarí bibáht (bída), so Me jandjom pe Jerusalimo i pe saré fórja Judejákire; i, ake, dalé fórja isyn čhučé (pusta), i nijékh (nikón) na dživéla odój,

³pal léngire fuj réndy, savé jone kerdé, sob (kaj) te den jag Miré xoliake pir dová, so jone psirdé te xačkirén dróga smóly i te dynarinén javire devlorénge, savén jone na džindlé, ni tumé, ni tumaré dadá.

⁴Ne Me bičhavavas ke tumé saré Miré pishar'jén, prorokén, tasiárles (ránes) zlokostyr Me bičhavavas len, sob (kaj) te phenén tuménge: ‘Na kerén dalé džungalé réndy, so Me drieván na kamám!’

⁵Ne tumé na kandyné, i na pričhude péskiro kan, sob (kaj) te risjon krig péskire fuipnastyr, sob (kaj) te na xačkirén dróga smóly javire devlorénge.

⁶Paldavá Miro xoliakiribén i Mirí xolý vyčhudepe i roshačine dre fórja Judejákire i pe vulícy (gásy) Jerusalimóskire; i jone isyn čhučé i bi manušéngire, syr isyn davá adadyvés.

⁷I akaná — adiáke rakiréla Raj Devél, bolybnáskire-jangoléngiro Devél, Devél Izrailjoskiro: ‘Vaš (pal) so tumé keréna daja bari bibáht proti péste, sóske tumé keréna adiáke, sob (kaj) te xasjon tumaré muršá i džuvliá, bijaty i tyknemasa, sob (kaj) te na jačélpe nijékh Judejátyr,

⁸vaš so tumé déna jag Miré xoliake (xoliakirena Man) butiénca tumaré-vastengire, kiéli tumé xačkirena dróga smóly javire devlorénge pe phuv Jegiptóskiri, pe saví tumé giné te dživén, sob (kaj) te xasjon tumé (xasiakirén pes) i, sob (kaj) maškír saré nácyi pe phuv te javél prokošybén (arman) i bipatyv ke tumé?

⁹Ci bistyrde tumé fuipén tumaré-dadéngiro, fuipén kral'jéngiro Judejátyr, fuipén léngire-romniengiro do-sámo fuipén, so tumé kokoré kerdé, i fuipén, so tumaré džuvliá kerdé pe phuv Judejakiri i pe vulícy (gásy) dro Jerusalimo.

¹⁰Tumé ke adadyvés na tykniakirde pes, na lyné te darén, tumé na kerdé pir Miro Zakóno ci pir Miré statúty, savé Me dyjom tuménge i tumaré dadénge.

¹¹Paldavá — ake, so rakiréla bolybnáskire-jangoléngiro Raj Devél, Devél Izrailjoskiro: “Ake, Me riskiráva Miro muj proti tuménde vaš bibáht, i vaš xasiban Judejákiro.

¹²I Me láva kodolén, savé jačénape Judejátyr, sob (kaj) jone te riskirén péskire muiá te džán pe phuv Jegiptóskiri te dživén syr čúža; odój jone xasjona saré i lénge javéla xasibén pe phuv Jegiptóskiri. Jone xasjona kurtalátyr i bokhátyr. Jone meréna, tyknestyr ke naj baredýr kurtalátyr, bokhátyr, i pe tuménde javéla prokošybén i dívo trašasa (trašaibén), prokošybén i bipatyv.

¹³I Me pharés sendiakirava len, savé dživéna pe phuv Jegiptóskiri, adiáke-pac' syr Me pharés sendiakirdjom Jerusalimo kurtalása, bokhasa, i meribnytkone fransenca;

¹⁴sob (kaj) nijékh, kon jačélape Judejátyr, savé javné pe phuv Jegiptóskiri te dživén odój syr čúža, te na kerenpe nikaj, i te na vydžidjon, sob (kaj) te risjon pale pe phuv Judejakiri, ke saví léngiro iló marelape te risjon pale i te dživén: nikón na risjola pale apríč odolénde, savé našéna.”

¹⁵Tén'ci saré muršá, savé džindlé, so léngire romniá, xačkirdé dróga smóly javire devlorénge, i saré džuvliá, kon sys terdé pašýl, but len, i saré manušá, savé dživdé pe phuv Jegiptóskiri ke Pafroso, otphendlé Jeriemiejoske i phendlé:

¹⁶“So kasynelape lav, so tu phendián aménge Ráskire-Devléskire lavéstyr, ame na javása te šunas davá lav tútyr!

¹⁷Ne ame, čačes javása te kerás pir kažno lav, so ame phendiam péskire čibása: te xačkiras dróga smóly bolybnytkone devlorjake i te čhuvas láke thadune svénta dyibená, syr ame kerdiám: ame i amaré dadá, amaré králja i amaré thagárja dre fórja Judejákire i pe vulícy (gásy) Jerusalimóskire. Paldavá aménde sys but maró, aménge sys mištés, i ame na dykhciam bibáht.

¹⁸Ne syr féni (tóka) ame mekciam te xačkiras dróga smóly bolybnytkone devlorjake, i te čhuvas láke thadune svénta dyibená, aménge jaciá te na uhtylel (te na javél dósi) saró, i ame xasjovasa kurtalátyr i baré bokhátyr.”

¹⁹E džuvliá iščo (inké) phendlé: “I kiéli ame xačkirdiam dróga smóly devlorjake bolybnytkonake i čhudiam láke thadune svénta dyibená; ci ame kerdiám mariklia lákire mósa, ci čhudiam thadune svénta dyibená láke, sob (kaj) te na džinén amaré romá?”

²⁰Tén'ci phendiá Jeriemiéjo angíl saré manušénde-muršende, džuvliénde, i saré javír manušénde, savé léske otphendlé adiáke, rakirí:

²¹“Ci davá isyn na dróga smóly, so tumé xačkirdé dre fórja Judejákire i pe vulícy (pe gásy) Jerusalimóskire, tumé i tumaré dadá, tumaré králja i tumaré thagárja, manušá dalé phuvjákire? Ci so davá Raj Devél na ripirdia len, ci xaj, na javdiá davá Léske pe godý?

²²I Raj Devél butýr na délas ráda te vyrikirel davá pir doiá bibáht, so tumé kerdé i pir džungalé (brydka) réndy, so tumé kerdé. Paldavá tumarí phuv isyn čhučí, dívo trašasa, prokošybén (arman), bi manušéngiri, syr davá isyn ke adadyvés.”

²³Pal-dová so tumé xačkirdé dróga smóly i pal-dová so tumé kerdé gréhi proti Raste-Devléste, i tumé na kandyné zan Ráskire-Devléskiri, i na kerdé pir Léskiro Zakóno, ci pir Léskire statúty, ci Léskire uphenybená, paldavá daja bari bibáht (bída) kerdiápe tuménca, syr davá isyn ke adadyvés.”

²⁴I phendiá Jeriemiéjo saré manušénge, i saré džuvliénge: “Šunén lav Ráskire-Devléskiro, saré — Judejákire manušá, savé dživéna pe Jegiptóskiri phuv:

²⁵adiáke rakiréla Raj Devél, Devél Izrailjoskiro, phení: ‘Tumé i tumaré džuvliá rakirdé péskire ušténca i kerdé péskire vasténca, phení: ‘Ame čačes, lása te kerás pir amaré sovlahá, so ame dyjam — te xačkiras dróga smóly bolybnytkone devlorjake i te čhuvas thadune dyibená láke.’ Tumé zoralés rikirenape ke tumaré sovlahá i keréna pir tumaré sovlahade lavá.’

²⁶Pal-davá šunén lav Ráskire-Devléskiro, saré Judejákire manušá, savé dživéna pe Jegiptóskiri phuv: ‘Ake, Me sovlahadjom Miré baré lavésa’, — rakiréla Raj Devél — , sob (kaj) Miro lav te na phenél butýr nijékh manúš Judejátyr, kon dživéla pe Jegiptóskiri phuv, phení: ‘Te dživél Raj Devél, Devél.”

²⁷Ake, Me javáva te dykháv pe tuménde ke bibáht, a na vaš lačhipén: saré manušá Judejátyr, savé isyn pe phuv Judejakiri javéna te xasjon kurtalátyr, i baré bokhátyr angíl dová, syr javéla kónco (jagóro) lénge.

²⁸Ne kodolé nábut manušá, savé našéna kurtalátyr, risjona pale ke phuv Judejakiri phuvjátyr Jegiptóstyr, i saré, kon jačélape Judejátyr, savé giné pe phuv Jegiptóskiri te dživén odój syr čúža, udžinena, koneskire lavá risjona dro čačipén, Miré ci léngire.

²⁹“I javéla ĥiertýk (znamiénijo) tuménge’, — rakiréla Raj Devél — so Me pharés sendiakirava tumen pe dová štéto, sob (kaj) tumé te džinén, so Miré lavá risjona dro čačipén pal tuménde pe bibáht tumarí.’

³⁰‘Adiáke rakiréla Raj Devél: ‘Áke, Me vydava faraonos Vafrijos [Xofras-ju.o.], kralís Jegiptoskires dro vastá léngire-vergéngire, savé rodéna léngiro di, syr Me vydyjom Sedekijas, kralís Judejakires, dro vast Navuhodonosoroskire, kralíske Vavilonoskireske, savó sys vérgo Sedekijaske i, kon rodyja léskiro di.’”