Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 47 Bible Online

Jeriemiéjo 47 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 47

¹Lav Ráskire-Devléskiro, savó sys prorokoske Jeriemiejoske pal Filistimijákire manušénde angíl dová, syr faraóno pyjá (rozmardiá) Gaza.

²Adiáke rakiréla Raj Devél: “Ake, paniá ĥazdénape paš-ratitkoné (sieviernone) rigátyr i jačénape syr tasadypnaskiro paning; jone začhuvena paniésa phuv i saró, so isyn pe láte: fórja, i odolén, kon dživéna dre lénde. Manušá javéna te rovén, i saré džiibnáskire pe phuv javéna te tuginen (te rovén) jasvénca.

³Kiéli javéla šundlo lopotymo (topoto) petalendyr zoralé-grengiren, kiéli javéna te grukinen léskire maribnýtka vurdená, kiéli javéna te gryminen léskire róty, so dadá až na podykhena pale pe péskire bijatende, pir dová, so léngire vastá isyn bizorjákire.

⁴Pal-dová so javéla dyvés te vymaren saré Filistimlianen, te jačkiren Tíro i Sidono sarésa bi pomogibnaskiro, savé jačénape. Raj Devél jačkiréla nisosa Filistimlianen, savé jačnépe ostrovostyr Kaftorostyr.

⁵Gaza jačéla bibalengiri, Askalono [Aškielono-ju.o.] xasjola, — dová, so jačélape léngire dolostyr? Syr ĥará tu javésa te čhines pes dre túga?

⁶O, kurtála Ráskire-Devléskiri? Syr ĥará (dlúges) tu na javésa te pasjos tiho (štyljos)? Risjov pale dre péskiri nožna? Pirijač (otkhinjov) i jav štyl!

⁷Ne syr joj moginéla te pirijačel (otkhinjol)? — Kóli Raj Devél priphendiá proti Askalono i proti brégo morjoskiro (derjavéskiro)? Odój Jov priphendiá kurtalake te čingirel.”