Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 48 Bible Online

Jeriemiéjo 48 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 48

¹Proti Moávo. Adiáke rakiréla bolybnáskire-jangoléngiro Raj Devél, Devél Izrailjoskiro: “Bida foroske Niévo: Pal-dová so jov isyn phagirdó, Kariafaimo isyn ladžakirdó i lynó; Mizgavo isyn ladžakirdó i phagirdó.

²Butýr na javéna te šarén Moávo, a dro Jesievóno [Hieševono-ju.o.] priduminena bibáht proti davá štéto, rakirí: ‘Javén, sob (kaj) aménge te xasiakiras les syr manušýtko nacyja.’ I tu adiáke-pac', Madmiéna, xasjosa [pirijačesa te javes-r.s.], kurtála dotradela tut.

³Zan roibnaskiri javéla šundly Oronaimostyr: ‘Bedypen (bída) i xasibén’ isyn baró!

⁴Moávo isyn phagirdó dre ruíny, léskire bijaty (čhavoré) godlena, so isyn šundlo.

⁵Pal-dová so roibén džála lénca, kiéli jone džána upré pe štéto Luhito; kiéli jone džána telé Oronaimostyr, jone rovena pal bedypen (čororipen).

⁶Našén, zrakhen péskiro džiibén! Javén sýrby dová xrústo pe čhučí mal (stiep).

⁷Pir dová so tu, Moávo, dopatiandyjape zoralés dre péskire butiá i péskire kučipena, tut adiáke-pac' léna, i Xamoso džála dro pliéno, léskire rašaja i léskire thagárja khetané.

⁸Rozmaribnaskiro javéla pe kažno fóro, so nisavó fóro na jačélape célo (zrakhno), i dólo xasjola, i rovno félda xasiakirena [iavéla čhučí-r.s.]: — adiáke, syr i phendiá Raj Devél.

⁹Den phaká Moavoske, sob (kaj) jov moginelas te vurnial krig, pal-dová so léskire fórja javéna čhučé, nijékh na javéla te dživél dre lénde.

¹⁰“Te javén prokošybena (armania) pe kodoleste, kon keréla Ráskire-Devléskiri butý biileskiro, te javél prokošybén pe kodoleste, kon obrikirela Péskiri kurtála ratestyr!

¹¹Moávo sys usady / sak (vsiegda) vol'none péskire ternypnastyr i jov sys čhudo pe péskiro xumer (droždžy); les na piričhuvenas jekhe pirjatyr dro javír; sýrby mol (vino); — jov nijékhvar na sys dro pliéno: paldavá léskiro smako jačélape dre léste, i léskiro lačhó khandypen na parudiape.

¹²Paldavá, ake, javéna dyvesá’, — rakiréla Raj Devél, — ‘so Me bičhaváva manušén ke Moávo te piričhuven les syr mol (loly bravinta). Jone čhučakirena Léskire khoré (sasúdy) i phagirena pe koterá léskire štekly.

¹³I javéla Moávo ladžakirdó pal Xamoso[13], syr i kher Izrailjoskiro sys ladžakirdó pal Viefil', dro so manušá Izrailjostyr zoralés patiandyné.’

¹⁴Syr da tumé rakiréna: ‘Ame sam zoralé, i ame sam muršá te maraspe?’

¹⁵Moávo ž isyn rozmardo dre ruíny, i léskire for'jéndyr džála thuv, a léskire vykedyné manušá giné tel kurtála pe meribén te čhinen len, — rakiréla Králi, Konéskiro Lav isyn Raj Devél, bolybnáskire-jangoléngiro.

¹⁶Bari bída peréla syg pe Moávo, i bibáht (xasibén) prastala sýges pe léste.

¹⁷Tanginen jasvénca les, saré, kon isyn pašýl léste, i saré, kon džinéla léskiro lav, phenén: ‘Savó zoraló destó isyn phagirdó, saví šukár khija sys!’

¹⁸Džá telé slavutnone štetóstyr, i beš smegasa[14] te p'jel, čhaj Divonoskiri, kon dživéla dro dová fóro. Rozmaribnaskiro pe Moávo javdiá pe túte, jov rozmarela pe koterá tyré zoralé vánty (tvárdymi).

¹⁹Tu, saví dživesa ke Aroiéro, terdjov pašýl drom i dykh ciamkes. Phučpe léstyr, savó našela, i phučpe látyr, saví rakhelape, i phen: ‘So kerdiápe?’

²⁰Moávo ladžakirdó, pal-dová so jov phagirdó pe bará, rov zoralés i de gódla! Phen davá dro Arnono, so Moávo isyn phagirdó ke phuv.

²¹I séndo javdiá pe loščyny, savó isyn pe roŭno félda: pe Xalono, pe Jaca, pe Mofafo (Miefa),

²²i pe Divono, i pe Novo, i pe Biet-Divlafaimo;

²³i pe Kariafaimo, i pe Biet-Gamulo; i pe Biet-Maono;

²⁴i pe Kieriofo, i pe Vosoro (Bocra), i pe saré fórja pe phuv Moavoskiri, duratuné i pašatuné!

²⁵Moavoskiri zor syr šyng (rógo) isyn čhurdynó te xasjol, i léste vast sýrby isyn phagirdó” — rakiréla Raj Devél.

²⁶“Matiakiren les, pal-dová so jov ĥazdyjá pes pe Raste-Devléste; i Moávo javéla te ravelpe dre péskiro čhadypen i manušá léna davá štéto pe dand te sanpe (kokoró javéla prosandlo).’

²⁷Ci tu, Moávo, na lyjan Izrailjo pe dand, sob (kaj) te saspe? Ci na otlydžasaspe tu ke Izrailjo, sýrby ke čor? So tu kuninesa šerésa but móly, kiéli rakirésa pal léste?

²⁸Tumé, savé dživéna ke Moávo, jačkiren fórja i dživén pe skaly. Javén sýrby golumby, savé keréna gniázdy (kúfy) pe skalakire rigá, kaj zadžána dre gebar (pieščera).

²⁹Ame šundiám pal phut'kiribén Moavoskiro: jov isyn drieván phut'kirdo — léste isyn vučí mina pe muj, — jov barjakiréla pes, — jov phutjola, — i jov duminéla vučés pal péste dro péskiro iló.

³⁰Me džinóm léskiro xoliakiribén’ — rakiréla Raj Devél, — ‘léskiro rakiribén isyn čhučó, léstyr nisó na vydžála čačunó.

³¹Paldavá Me javáva te rovav zoralés pal Moávo, i Me javáva te dav gódla pal sarénde Moavostyr; Me javáva te tuginav jasvénca pal manušénde Kir-Xariesostyr.

³²O vinagrádniko dre Siévma! Me javáva te rovav butýr pal túte syr pal Iaziéro (Jazero): tyré otbarjakiribena piribarine mórjo (derjáv), jone doginé ke ziero Iaziéro (Jazero). O rosčoribnaskiro pyjá pe tumaré lynaitka múri i pe tumaré-moliakiro (vinoskiro) obkedypen.

³³Rádyma i viesjolyma (loš) lyné krig phabune feldatyr i Moavoskire phuvjátyr; Me kerdjom adiáke, so nisó na javéla dro priéso vaš mol (vino), jone butýr na javéna te štakiren (te topčynen) radymitkone godlása, na javéla butýr gódla radymása.’

³⁴Pal léngiri gódla Jesievonostyr (Xieševonostyr) ke Jelieala (Jelaleja), ke Jaaca (Jahazo) jone ĥazdyné gódla Siorostyr ke Oronaimo, ke tríto Eĥla (Eĥla-Šelišyja); pal-dová so adiáke-pac' i paniá Nimrimoskire pirišutjona.

³⁵I iščo (inké) Me keráva adiáke, so dro Moávo pirijačena te janén svénta janybená pe vučé štéty i Me muliakirava kodolés, savó xačkirelas dróga smóly péskire devlorénge’, — rakiréla Raj Devél.

³⁶‘Paldavá Miro iló javéla te obrovelpe pal Moávo sýrby svirol'ka, i Miro iló javéla te obrovelpe pal manušénde Kir-Xariesostyr; pal-dová so baró barvalypén, so jone kedyne xasijá.

³⁷Kažno šeró isyn murado i kažna čhora (broda) isyn muradé, pe kažno vast isyn počhinybena, i pe trušula isyn balytksa goné.

³⁸Saré rakiréna jasvénca pe saré kheréskire strehi (čhakinia), i pe gásy dro Moávo, pal-dová so Me rozmardjom Moávo sýrby pirí, saví na trej” — rakiréla Raj Devél.

³⁹Jone rovena zoralés — syr da Moávo rozmardo? Syr da Moávo riskirdiá paluj ladžasa! I javéna te sanpe Moavostyr, i léstyr javéna te trašadjon saré, kon isyn pašýl léste.

⁴⁰Pal-dová so rakiréla Raj Devél: “Ake, Vavilóno javéla te vurnial syr órlo (kído), i jov rosčhuvela péskire phaká pir rigá upralestyr pe Moávo.

⁴¹Fórja javéna lyné i tvárdymi (kriéposti) zauhtylena. Dro dová dyvés iló zoralé-muršengire Moavostyr javéla syr iló džuvliákiro, savjá menčynena dukhá te bijanél.

⁴²I javéla Moávo vymardo syr nacyja pir dová, so jov barjakirdia pes [gijá-r.s.] proti Raste-Devléste.

⁴³Dar, ĥanbín i felý javéna pe túte, manúš Moavoskiro!” — rakiréla Raj Devél.

⁴⁴‘Kon našela darátyr, odová peréla dre ĥanbín, i kon vydžála ĥanbiniatyr, odolés uhtyléla felý, pal-dová so Me javáva ke Moávo,” — rakiréla Raj Devél.

⁴⁵“Odolé, savé našné, terdiné tel Jesievóno (Xieševono), pal péskiro bizorjakiriben. Ne javéla jag Jesievonostyr, javéla bari jag maškiralypnastyr Sigonostyr i pohala miéža Moavoskiri i šereskiro gutup (tiemjo) pe čhavénde buntar'jénde.

⁴⁶Bida pe túte, Moavie! Manušá Xamosostyr xasiné; pal-dová so tyré čhavén lyné dro pliéno, i tyré čhaja isyn dre navolia.

⁴⁷Ne Me riskiráva pale Moavoskire plienonen dre palatuné (posliednia) dyvesá’”, — rakiréla Raj Devél. Ake, dasavo isyn séndo pe Moávo.