Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 49 Bible Online

Jeriemiéjo 49 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 49

¹Adiáke rakiréla Raj Devél pal Amonoskire čhavénde: “Ci nane čhavén dro Izrailjo? Ci nane léste prilyibnaskiro (nasliedniko) pe meknó mištypén? Sóske tedy o Malhomo prilyjá meknó mištypén Gadostyr, i léskire manušá dživéna dre Gadoskiro fórja?

²Paldavá, ake, javéna dyvesá,” — rakiréla Raj Devél, — “so javéla šundly maribnaskiri zan (glos) dre Rava Amonoskire-čhavengiri. I dalé foróstyr jačénape ruinengire bérgicy, i Ravakire gavá javéna xačkirdé jagása. Tén'ci Izrailjo léla pale daja phuv syr péskiro mištypén odoléndyr, kon lyjá léstyr,” — rakiréla Raj Devél.

³“Tugin jasvénca, Jesievonie, pal-dová so Gajo (Ajo) isyn rosčordo, den gódla, čhaja Ravaskire, podphanden pes balytkone gonenca! Rakirén jasvénca i prastan odorík i pale pir vánty; pal-dová so Malhomo džála dro pliéno khetané léskire rašanca i péskire thagar'jenca.

⁴Sóske tu barjakiresa pes dolenca? Džin, so jone rosthadenape ratésa, tu, buntuítko čhaj Amonoskiri! Saví garadjola pal péskiro kučipén te zrakhelpe, phení: ‘Kon javéla proti mánde?’

⁵Ake, Me janáva dar (traš) pe tuménde,” — rakiréla bolybnáskire-jangoléngiro Raj Devél, Devél. “Kažno (sváko) tuméndyr, kon isyn tuménde, javéla tradyno krig te našél péske, kon karik: i na javéla nijékh manúš te kedel khetané kodolén, kon našné.

⁶Ne paló (poslie) dová Me janáva pale pliennone manušén Amonostyr,” — rakiréla Raj Devél.

⁷Pal Edómo adiáke rakiréla bolybnáskire-jangoléngiro Raj Devél: “So nane butýr godypén dro Fiemano? Ci so baré-godiakire manušá pirijačne te den godý javirénge? Ci so godypén našadyja?

⁸Našén, riskiri péskire dume, bešén dre xor ĥanbiniá (jamy), manušále, savé dživéna ke Diedano, pal-dová so Me janáva Isavoskiro xasibén pe lénde, — davá časo Me javáva te sendiakirav len.

⁹Kóli javné vinagrado-skedyibnaskire ke tu, to naúšto jone te na mekén vari-kicý céla múri? Kóli javénas čora ratý, to jone čorenas péske adákicy, kicý lénge trej?!

¹⁰Ne Me rosčhudjom [ročhuvava-r.s.] Isavos ke nangipén: Me otkerdjom [otkerava-r.s.] saré léskire čorahane štéty, i jov na déla ráda te garadjol. Léskire palál-javibnaskire čhavé pir kherítko ródo (pliémjo) xasjona, léskire pšála i léskire susiédy (kotárja), i jov butýr na javéla.

¹¹Mekén péskire piroten (siroten) Mánge, i Me javáva te rakhav len, i mek tyré pivlia (udovy) te patián zoralés dre Mánde.

¹²Pal-dová so-adiáke rakiréla Raj Devél: “Áke, kodolé javír Judy, savénge na sys prisendindlo te p'jen tahtáj (čaša), dykhén, javéna te p'jen tahtái. I so da tu, Edomie, džása krig, bi sendoskiro? Nad, tu na keresape nikaj, sob (kaj) te vyrakhespe sendostyr, i tu, čačes [usajékh-r.s.], javésa te p'jes davá tahtái.

¹³Pal-dová so Me sovlahadjom Miré Lavésa”, — rakiréla Raj Devél, “so pe Vosoro (Xacoro) javéna te divinenpe trašasa, léske javéla bipatyv, prokošybén (arman) i jov jačéla čhučó. I saré léskire for'jéndyr javéna ŭsády / sak (vsiegda) čhučé štéty.”

¹⁴Me šundjom šunybén Rástyr-Devléstyr i poslo sys bičhadó ke Najudýtka nácyi te phenél: ‘Kedenpe khetané, džán proti léste, i terdjon pe maribén!’

¹⁵“I, ake, Me keráva tútyr, Edomie, tyknes maškír Najudýtka nácyi, so javéna te dykhén vučipnása pe túte.

¹⁶Trašaibén tyró xohadia tumen i phut'kiribén tyré-iléskiro prityrdyne tut, savó dživéla maškír skalakire ščelji, i savó zalela vučipén bergicengiro! Mek tu kerdián péskiri gniázda (kúfo) adiáke vučés, syr órlo (kído), ne Me i odothýr tyrdava [sčhurdava-r.s.] tut telé,” — rakiréla Raj Devél.

¹⁷‘I javéla Edómo syr dívo trašasa; i kažno (sváko) manúš, kon javéla te džal pašé, javéla te divinelpe trašasa, i jov léla te del šolia (te svistinel), syr dykhéla saré léskire meribnytka fránsy,

¹⁸syr sys rade telé Sodómo i Gomóra i léngire pašatuné foricy’ — rakiréla Raj Devél, so nijékh manúš na javéla te dživél odój, so nijékh čhavó Manušéskiro na jačélape te dživél dre léste.

¹⁹Ake, o Navuhodonosóro ĥazdélape syr ščer (liévo) Iordanoskire bergicendyr proti zorjakirde kheratune štéty, i Me začhuvava Edómo te našél léskire šteténdyr. I kon isyn vykedyno manúš, savés Me ĥazdyjom upré pe lénde? Pal-dová so kon isyn adasavó syr Me som? I kon phučelape otphenybén Mándyr? Kon vykharela Man? I kon isyn adasavó čhupnári (pastyrjo), kon déla ráda te terdjol angíl Mánde?

²⁰Paldavá šunén godó lav Rástyr-Devléstyr, savó Jov čhudiá tedy pe Edómo, so Jov kamdiá te priduminel pe manušénde, kon dživéna ke Fiemano: až tykné-zorjakire Xaldiejéngire gurtostyr javéna te tyrden len krig; čačes, jone keréna léngire kheratune štéty čhučé.

²¹Phuv javéla te izdral šumostyr, kiéli jone peréna, i zan léngire godlatyr javéla šundly pe Loló mórjo (derjáv).

²²Ake, o vérgo ĥazdélape syr órlo (kído) i jov javéla te vurnial i te rosčhuvel péskire phaká upralestyr pe Vosoro (Bocra). Dre davá dyvés jačélape iló zoralé-muršengiro sýrby iló džuvliákiro, savjá menčynena dukhá te bijanél.

²³Pal Damásko. — “Jemafo [Hamato-ju.o.] i Arpado ladžakirdé, pal-dová so jone šundlé fuj nevipen. Léngiro iló biladyja (zamyjá) krig; mórjo (derjáv) kuninelape tugatyr; jov na déla ráda péske te javél štyl.

²⁴Damásko jaciá bizorjákiro, i risijá te našél, dar (traš) uhtyldia les. Ilytko dukh i tugi lyné zor pe léste sýrby pe džuvliáte, savjá menčynena dukhá te bijanél.

²⁵Syr da slavútno fóro na jaciápe célo, fóro, savéstyr radynenaspe manušá!

²⁶Paldavá terné manušá dalé foróstyr peréna pe léskire vulícy (gásy), i saré maribnaskire muršá xasjona dro davá dyvés, — rakiréla bolybnáskiro-jangoléngiro Raj Devél.

²⁷‘Me roshačkirava jag pe vánta Damaskoskiri, i joj pohala saré felatiniá Vienadadoskire [Ben-Xadadoskire-ju.o.].”

²⁸Pal Kidaro i pal kralipená Asoroskire, savé o Navuhodonosóro, králi Vavilonóskiro, rozmardiá. Adiáke rakiréla Raj Devél: “Uštén, džán upré proti Kidaro i lučkiren manušén [čhavén-r.s.] vastokóstyr.

²⁹Léna léngire šátry i bakréngire ĥurty, léngire pologi (pokrovy) dre šátry i saré léngire pirja, i léngire vierbliuden lydžána péske Xaldiei. Jone javéna te godlen: ‘Dar kažnoné rigátyr!’”

³⁰“Našén, prastan duredýr adathýr, garadjon xor, manušále, kon dživéla ke Asoro,’” — rakiréla Raj Devél. ‘O Navuhodonosóro, králi Vavilonóskiro, čhudiá pe godý te perél pe tuménde, i jov pridumindia plano proti tuménde.

³¹Uštý, Navuhodonosóro, džá pe barvaly nacyja, so dživéla bi darákiro’, — rakiréla Raj Devél, — ‘konéste nane ni pórty, ni štaby, savé dživéna kokoré péske.

³²Léngire vierbliuden saštý javéla te len syr doresybén, i but-but léngire murdalá javéna čorde. I Me rosčhuvava te dživén pe saré balvalia odolén, savénde jagóry (kraí) pe balengire piéisy isyn občhindlé, i Me janáva bibáht (bída) pe lénde saré rigéndyr’, — rakiréla Raj Devél.

³³‘Asoro javéla štéto vaš šakalenge te dživén, i jov usady (sak) (vsiegda) javéla čhučó, i nijékh manúš na javéla te dživél odój i nijekhe-manušéskiro čhavó na terdjola te dživél odój’”

³⁴Ráskire-Devléskiro lav, so sys Jeriemiejoske, prorokoske proti Jelamo, kiéli o Sedekíia, králi Judejákiro, lyjá te kralinél:

³⁵Adiáke rakiréla Raj Devél, bolybnáskire-jangoléngiro: “Ake, Me phagirava lúko Jelamoskiro, sámo-glavnyma léngire-zorjakiri.

³⁶Me janáva štar balvalia štaré jagorendyr pe bolybén, i Me rosčhuvava te dživén len pir saré dalé balvalia; i na javéla nijékh nacyja, ke saví, sob (kaj) te na javén bikhereskire Jelamostyr.

³⁷Me keráva adiáke, sob (kaj) manušá Jelamostyr te zameren darátyr angíl léngire vergénde, i angíl odolénde, kon rodéla léngiro di. Me janáva bari bibáht (bída) pe lénde, Mirí zoralý xolý” — rakiréla Raj Devél, — ‘i Me bičhaváva kurtála pal lénde adiáke ĥará (dlúges), angíl Me domarava len.

³⁸I Me čhuváva Miro trono dro Jelamo, i Me muliakirava léngire kral'jén i thagar'jen’ — rakiréla Raj Devél.

³⁹‘Ne dro sámo kónco (jagóro) dyvesengiro Me janáva pale plienonen Jelamoskiren’” — rakiréla Raj Devél.