Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 50 Bible Online

Jeriemiéjo 50 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 50

¹Ake, isyn lav, so Raj Devél phendiá proti Vavilóno, i proti phuv Xaldiejéngiri pir Jeriemiejoste, prorokoste:

²“Poden zan (den te džinén) maškír nácyi, i obzaniakiren (rosphenén) sarénge, i ĥazdén sciago (flago); obzaniakiren, i na garaven davá, — phenén: ‘Vavilóno lynó, Vilo ladžakirdó. Mierodaho isyn phagirdó pe koterá, léskire ídoly magirdé, léngire vyčhudé muiá phagirdé pe koterá.

³Vaš odová so paš-ratitkoné (sieviernone) rigátyr džála pašyledýr Midianengiri nacyja proti Vavilóno, jone keréna léngire phuvjátyr čhučó (pusto) štéto, i nijékh (nikón) na javéla te dživél odój: i manušá i murdalá (žyvotna) našéna i džána krig.

⁴Dre dolé dyvesá i dro dová časo’, — rakiréla Raj Devél, — ‘čhavé Izrailjoskire i saré čhavé Judáskire javéna khetané, i jone javéna, rovi, sob (kaj) te rodén Ras-Devlés, péskires Devlés.

⁵Jone javéna te phučenpe drom pe Sióno, i jone javéna te riskirén péskire muiá ke jov, rakirí: ‘Javén i lása te khetaniakiraspe ke Raj Devél viečnone zavietosa, savó na bistrelape.

⁶Miré manušá našadyne syr bakré: léngire čhupnárja (pastyri) lydžiné len krig droméstyr, jone riskirdé len droméstyr pe bérgi. Jone giné te psirén bergátyr pe bérgica i jone bistyrde péskiro štéto te otkhinjon.

⁷Saré, kon lathelas len, xanas len, i léngire namala (vérgi) rakirdé: ‘Ame na sam bangé, pal-dová so jone kerdé gréhi proti Raste-Devléste, dre Savéste dživéla čačipén, Raj Devél, Savéstyr užakirde lačhipén léngire dadá.

⁸Izrailjoskire manušále, prastan Vavilonóstyr, džán krig Xaldiejengire phuvjátyr; i javén syr buzne angíl péskiro ĥurto.

⁹Pal-dová so, ake Me ĥazdáva i janáva pe Vavilóno i kedava khetané proti léste baré nácyi paš-ratitkoné themestyr, i jone javéna te kedenpe te marénpe proti léste, i jone léna Vavilóno. Léngire maribnýtka bustiá (striély) javéna sýrby odolengire, kon isyn maribnaskire spiécy, savé na risjona pale ivjá (darmes).

¹⁰I phuv Xaldiejéngiri javéla phagirdy; saré, kon rosčorela la, javéna čale”, — rakiréla Raj Devél.

¹¹‘Pal-dová so tumé, manušá Vavilonóstyr, radyndlepe, i tumé svenkindle ke vučipén, tumé, savé rosčorde Miro meknó mištypén — Mirí nacyja. Tumé radyndlepe, uhne (uhtyne) péske syr reca (tjolka) pe čar, i tumé grymityndle sýrby ĥenšta (grajo).

¹²Tumarí daj, Vavilóno, javéla xor ladžakirdy (dre bari ladž), joi, saví jandiá tumen pe svéto, javéla te loljol ladžatyr [ladžakirdy-ju.o.]: joj iavéla naj tyknedýr saré nacyiéndyr: javéla sýrby čhučí mal (stiep), šukí phuv i čhučé prahi.

¹³Pir Ráskire-Devléskiro xoliakiribén, pe láte nikón na javéla te dživél, i joj iavéla sarésa čhučí. Kažno (sváko) manúš, kon džála pir Vavilóno, javéla te putravel jakhá trašatyr (te divinelpe) i javéla te del šolia (te svistinel), syr dykhéla maribnýtka fránsy.

¹⁴Terdien tumé te marénpe proti Vavilóno, trusciál léste, saré, savé odtyrdena lúko; den kar'jé dre léste, na tanginen (na žalinen) bustiá, pal-dová so jov kerdiá grého (bizo) proti Raste-Devléste.

¹⁵Godlen proti léste saré trusciál, pal-dová so jov ĥazdyjá vast te poddelpe, fundamienty léskire pyné, léskire vánty rade telé, pal-dová so davá Raj Devél dukhavela pale, syr jov kerdiá adiáke, adiáke-pac' kerén i tumé léske.

¹⁶Čingiren te xasjol odolés, kon čhuvéla giv dre phuv dro Vavilóno, i kodolés, savó rikiréla sierpo (čhindló), syr te čhinel giv, kurtalakire darátyr, saví javéla te pritasavel, mek so jekh manúš te risjol ke péskire manušá, mek so jekh manúš te našél pe péskiri phuv.’

¹⁷‘Manušá Izrailjoskire isyn sýrby bakré, savé rosčhurdyne, kaj jakhá dykhéna, ščerá (lievy) rostradyne len krig: angledýr králi Asirijákiro pohaia len, i akaná, palatunó (posliédnjo) kadavá Navuhodonosóro, králi Vavilonóskiro, phagirdiá léngire kokalý.’

¹⁸Paldavá adiáke rakiréla bolybnáskire-jangoléngiro Raj Devél, Devél Izrailjoskiro: ‘Ake, Me pharés sendiakirava kralís Vavilonoskires i léskiri phuv, syr Me pharés sendiakirdjom kralís Asirijakires.

¹⁹Ne Me janáva pale Izrailjo pe léskiri čaritko félda (pažyt') i léskire manušá javéna te čaravenpe pe Karmilo i Vasáno; i léskiro di javéla čalo pe bérga Jefraimo i Galaádo.

²⁰Dro dolé dyvesá i dro dová časo’, — rakiréla Raj Devél, — ‘iavéna te rodén čoripén dro Izrailjo, ne nisó na lathéna, i javéna te rodén gréhi Judaste, ne jone ničý na lathéna, ne Me otmekáva bang kodolénge, savén Me jačkirava džidenca (rakhava te dživén).’

²¹‘Džán proti phuv Merataim[15] i koneskire manušá giné krig droméstyr. Čhučakir (pustošyn) i rozmar sarésa len, — rakiréla Raj Devél, — ‘i ker saró, so Me priphendjom túke.

²²Grukato [šumo-r.s.] maribnaskiro šundlo pe phuv i baró xasibén.’

²³Syr davá mloto (svirind/hamlo), so sys pir sarí phuv, jaciá čhindló pe koterá i phagirdó! Syr da Vavilóno jaciá divosa trašasa maškír nácyi?!

²⁴Me rosčhudjom felý (siet') pe túte, Vavilóno, i tut adiáke-pac' léna, i tu na džindian davá. Tut lathné i lyné dro pliéno pir dová, so tu terdijan proti Raste-Devléste.

²⁵Me, Raj Devél, otkerdjom Mirí piralý, i Me lydžijom javrí maribnýtka. Miré xoliátyr — pal-dová so Me, Sarezorjákiro Raj Devél, bolybnáskire-jangoléngiro, lydžáva Mirí butý pe phuv Xaldiejéngiri.

²⁶Džán maribnása pe láte saré jagorendyr (krajéndyr) pe phuv, psiraven (otkeren) lákire piraliá, sčhuven jekh pe jekh syr ĥarby, rozmaren sarésa daja phuv: mek nisó te na jačélpe.

²⁷Čhinen saré lákire guruvén: mek jone saré te džán tel čhuri! Bida pe lénde! Léngiro dyvés javdiá, sob (kaj) len pharés te sendiakiren.

²⁸Šunén manušéngiri zan (glos), savé našéna i rakhenape Vavilonóskire phuvjátyr. Jone podena zan (zvies') dro Sióno, so Raj Devél, amaró Devél dukhavela pale, Jov dukhavela pale pal Léskiri Khangirí.

²⁹Kharén khetané saré kar'jé-dyibnaskiren pe lúko proti Vavilóno. Terdjon khetané (taborosa) saré trusciál, kon odtyrdela lúko: sob (kaj) nijékh te na kerélpe nikaj. Kerén čoripén pale léske pir dová, syr jov kerdiá; pal sarí léskiri butý, so jov kerdiá, kerén i tumé adiáke-pac' léske. Pal-dová so jov jaciá phut'kirdo proti Raste-Devléste, proti Svénto Izrailjo.

³⁰Paldavá léskire terné manušá peréna pe gásy, i saré léskire maribnaskire muršá xasjona dro davá dyvés, — rakiréla Raj Devél.

³¹‘Ake, Me som proti túte, phut'kirdo Vavilóno!’, — rakiréla Raj Devél, bolybnáskire-jangoléngiro; pal-dová so tyró dyvés javdiá, sob (kaj) Me pharés te sendiakirav tut.

³²Naj phut'kirdé obštavenape (obstempinenape) i peréna, i nijékh naĥazdela pes. Me roshačkirava jag dre léskire fórja, i joj pohala saró trusciál léste.’

³³Adiáke rakiréla bolybnáskire-jangoléngiro Raj Devél: “Čhavé [bijaty-ju.o.] Izrailjoskire isyn pritasade, adiáke syr i čhavé [bijaty-ju.o.] Judáskire. Saré, kon lyné dro pliéno len, rikiréna len zoralés; jone otphenenape te mekén len pe vólia.

³⁴Léngiro Vyrakhibnaskiro isyn zoraló; bolybnáskire-jangoléngiro Raj Devél isyn Léskiro lav: Jov dobusoves (staratiel'nes) obsendiakirela (roskedela) léngiro réndo, sob (kaj) jov saštý (moginel) te del otkhinyben phuvjake, so isyn tel Xaldiejénde, i napokojo (dar) manušénge, kon dživéla ke Vavilóno.

³⁵Kurtála džála pe Xaldiejénde, — rakiréla Raj Devél, — i pe manušénde, kon dživéla ke Vavilóno, i pe léskire thagar'jénde i pe léskire godé manušénde.

³⁶Kurtála pe podphenybnaskirende [zumakiribnaskirende-r.s.], i jone javéna dylynin'ka. Kurtála pe saré maribnaskire muršende, i jone zamerena darátyr.

³⁷Kurtála pe léngire grénde, i pe maribnaskire vurdená, i pe saré javire-rodengire (miešanone) manušénde, savé isyn maškír lénde, i jone jačéna syr džuvliá. Kurtála pe léngire kučipena, i léndyr len čorena.

³⁸Baró šukipen te javél pe léskire paniá, sob (kaj) jone te vyšutjon. Pal-dová so daja isyn phuv vyčhindlé mujenca, i manušá odój jačné bigodiakire péskire darakune idolendyr.

³⁹Paldavá riskiribnáskire murdalá maliatyr/ stiepatyr [čhučé prahendyr-ju.o.] javéna te dživén pe daja phuv khetané šakalenca, i strausy javéna te dživén pe daja phuv. Pe daja phuv butýr nijékh manúš na javéla te dživél, i nikón na javéla pe daja phuv rodendyr ke ródo.

⁴⁰Syr Devél radia telé Sodómo i Gomóra i léngire pašatuné fórja, adiáke-pac' nijékh manúš na javéla te dživél adái, i nijékh čhavó manušéskiro na jačélape te dživél syr čúžo dro davá fóro.

⁴¹Ake, manušá džána paš-ratitkoné (sieviernone) rigátyr, daja isyn bari nacyja i but králja, savé ĥazdénape jagorendyr (krajendyr) pe phuv.

⁴²Jone rikiréna lúko i pika (lonho), jone isyn bidieskire, i jone na potanginena. Léngiri zan isyn syr mórjo (derjáv) brilinela (šuminela), jone tradéna uklisté pe grénde, jone kedenape te marénpe so ke jekh manúš ke saré pe túte, e čhaj Vavilonoskiri.

⁴³O králi Vavilonóskiro šundiá daja zan (zvies'), syr phukade (piriphendle) pal lénde, i léskire vastá jačné bizorjákire. Ilytko dukh uhtyldia les, dukhá, sýrby džuvliáte, savjá menčynena dukhá te bijanél.

⁴⁴Ake, vérgo Vavilonóskiro, javéla syr ščer (liévo) Iordanoskire bergicendyr [haščatyr/logovostyr-ju.o.] proti zorjakirde kheratune štéty, ne Me keráva adiáke, so jov jekhátyr našela krig Vavilonóstyr. Kon isyn odová vykedyno manúš, sob (kaj) Me saštý (moginavas) te ĥazdav les upré pe léste? Kon isyn kadasavó syr som Me? Kon isyn murškanó te phučelpe Mándyr otphenybén? I kon isyn adasavó čhupnári (pastyrjo), savó javéla te terdjol proti Mánde?’”

⁴⁵Paldavá šunén godó lav Rástyr-Devléstyr, savó Jov čhudiá pe godý proti Vavilóno i so Jov kamdiá te priduminel proti phuv Xaldiejéngiri: naj tyknedýr léngire čhavéndyr [stadatyr-r.s.] Midianengire xaladé lydžána krig i, čačes, Jov — Raj Devél — čhučakirela (opustošynela) léngiro kheratuno štéto (kherá) khetané lénca.

⁴⁶Phuv javéla te izdral godlatyr Vavilonóstyr, kiéli les léna, i godlypen javéla te šunelpe maškír Najudýtka nácyi.