Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 52 Bible Online

Jeriemiéjo 52 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 52

¹Sedekijaske sys biš te jékh berš, syr jov jaciá kralísa, i jov sys kralísa dešujékh berš dro Jerusalimo. Léskire-dákiro lav sys Xamutal', saví sys Jeriemiejoskiri čhaj Livnatyr.

²I Sedekíia kerdiá fuipén angíl jakhá Ráskire-Devléskire, saró dová, so i Ioakimo kerdiá.

³Davá sys pal Ráskire-Devléskiri xolý, so kerdiápe dro Jerusalimo i Judéia i Jov riskirdiá Péstyr léngire manušén. Tén'ci Sedekíia ĥazdyjápe proti kralíste Vavilonóstyr.

⁴I sys adiáke: pe jeniáto (bi trinengiro déšto) berš, syr o Sedekíia sys králi, Navuhodonosóro, králi Vavilonóskiro, javdiá dro déšto čhon, pe déšto dyvés dolé čhonéskiro, jov i léskiro xaladybén pe Jerusalimo, jov občhudiá fóro trusciál xaladenca: i jone kerdé valo trusciál fóro proti léste.

⁵I fóro sys dro občhuiben trusciál ke dešujékho berš, syr králi Sedekíia lyjá te rainel (te kralinél).

⁶Dre štárto čhon pe jeniáto dyvés dalé-čhonéskiro bari bokh ĥazdyjápe, i na sys maró manušénde dolé-phuvjakirende.

⁷Tedy foróskiri vánta phagirdé andré: i saré maribnaskire muršá našné, i ratý giné krig foróstyr, pašé pórta maškír duj vánty, so sys pašýl dre kralískiri únta, na dykhí pe dová, so Xaldiéi sys trusciál pašýl fóro. I Judy giné dromésa pir mal (stiep).

⁸I xaladé Xaldiejéngire tradynepe šale[18] pal kralíste, i jone uhtyldé Sedekijas pe malia (loščyny) Jerihonoskire[19]; i saró léskiro xaladybén nastiá, kon péske léstyr.

⁹I jone lyné Sedekijas, i jandlé les ke králi Vavilonóskiro dre Rivla pe Jemafoskiri [Hamafoskiri-ju.o.] phuv i o Navuhodonosóro kerdiá séndo (čačipén) pe léste.

¹⁰I čhindiá králi Vavilonóskiro čhavén Sedekijaskiren angíl léskire jakhá; i jov adiáke-pac' čhindiá saré thagar'jén Judejátyr dre Rivla.

¹¹I jov vyphusadia jakhá Sedekijaske, i jov phandia les xarkuné zandir'jenca (kandalenca), i jov lydžijá les ke Vavilóno i čhudiá les dro štaribén angíl dyvés, syr jov myjá.

¹²I dro pándžto čhon, pe jeniáto dyvés dalé čhonéskiro, so sys dro jeniáto berš, syr králi Vavilonóskiro o Navuhodonosóro lyjá te kralinél, o Navuzardano, raj pe kralískiri stréga, kon sys čačó vast kralískiro, javdiá dro Jerusalimo,

¹³i jov xačkirdiá Khangirí Ráskire-Devléskiri, i kher kralískiro, i saré kherá dro Jerusalimo, i saré kherá baré manušéngire, jov xačkirdiá jagása.

¹⁴I saré xaladé Xaladiejéngire, savé sys rása pe kralískiri stréga, phagirdé telé saré vánty trusciál (krugom) Jerusalimo.

¹⁵Tén'ci o Navuzardano, raj pe kralískiri stréga, lydžijá dro pliéno vari-savé čororé manušén, i javír manušén, kon jaciápe dro fóro, i kodolén, savé (našné) Judendyr ke králi Vavilonóskiro, i kodolén, savé jačnépe spiecendyr dre vastytka butiá.

¹⁶Ne Navuzardano, o raj pe kralískiri stréga, mekciá vari-savé čororé manušén dolé phuvjakiren, syr vinagradytkone-barjakiribnaskiren, i syr phuvjákire butiar'jen.

¹⁷I bronzytka [harkuné (miédna)-r.s.] stýlby, so sys dre Khangirí Ráskire-Devléskiri: skamindore pe rotycy (podstavy), i xarkuno mórjo (derjáv) (bari cysciérna paniésa), saró so sys dre Khangirí Ráskire-Devléskiri, Xaldiéi phagirdé i lydžiné sarí bronza (xarkóma) ke Vavilóno.

¹⁸Jone adiáke-pac' lydžiné krig vučé pirja i šuhlicy, i čhurja, i kučyka i baré roia, i saré bronzytka sudinki, savénca rašaja kerdé Devléskiri butý dre Khangirí.

¹⁹I baré čaré, i cymty (ščypcy), i tahtaja, i pirja, i šandale, i baré roia, i kučyka, saró so sys čačuné suvnakástyr i so sys rupéstyr, — saró raj pe kralískiri stréga leja péske.

²⁰Adiáke-pac' duj stýlby, jekh bari cysciérna paniésa (mórjo (derjáv)), dešudúj bronzytkone guruvorén, so sys telál, i skamindore pe rotycy, so králi Solomóno kerdiá vaš Khangirjake Ráskire-Devleskirjake — xarkóma sys phagirdy saré, so sys naštý te ublaves (te važynes).

²¹Akaná pal stýlby: kažno stýlbo sys vučipnása dešuohto kuniá (lokti), buĥlypnajea, trusciál (vokrug) te pričhuves mieribnytko šelo, sys dešudúj kuniá dlengipnása, i grubipnasa (grembipnasa) sys štar angušta (pal'cy), i iščo (inké) sys čhučó maškirál dre léste.

²²I frizo (vienco) pe stýlbo sys bronzytko, i kažno frizo sys pandž kuniá vučipnása, khudo uzoro i granatytka phabá sys pir saró stýlbo trusciál, saró sys xarkuno. Javír stýlbo granatytkone phabenca sys dasavo-pac'.

²³Pe kažno rig stylboskiri sys jeniá deša šov granatytka phabá, saré granatytka phabá, so ke jekh sys xarkuné pir khudo uzoro, sys len šel frukty.

²⁴O raj pe kralískiri stréga lyjá Sieraijas, šeralé rašás, i Cefanijas, javire rašás, i triné pašvudarengire stregar'jén (rakhibnar'jén).

²⁵I jov lyjá jevnuhos, kon sys barydyró pe maribnaskire muršende, i iščo (inké) eftá manušén, savé sys kralískire pomogipnaskire, i savén lathné dro fóro, šeralé lylá-čhinybnaskires pe xaladénde, kon začhinelas manušén dolé phuvjátyr dro xaladybén i šovdešá javire manušén, savén lathné maškír fóro.

²⁶I o Navuzardano, raj pe kralískiri stréga, lyjá len i jandiá len ke králi Vavilonóskiro dre Rivla.

²⁷I králi Vavilonóskiro pekadiá len i zamardiá len dre Rivla pe phuv Jemafoskiri. Ake, syr Judáskire manušén lydžiné dro pliéno léskire phuvjátyr.

²⁸Ake, isyn ginybén manušéngiro, savén o Navuhodonosóro lydžijá dro pliéno: pe eftáto (bitrinéngiro déšto) berš 3023 Judén;

²⁹dro dešuohtoto berš Navuhodonosoroskiro jov lydžijá dro pliéno Jerusalimóstyr 832 manušén;

³⁰dro beš te tríto berš Navuhodonosoroskiro, o Navuzardano, raj pe kralískiri stréga lydžijá krig dro pliéno 745 Judén. Saré manušá, konés lydžiné dro pliéno, sys 4600.

³¹I sys adiáke: dro trijánda-eftáto berš, syr Judejákire kralís Ioakimos lyné dro pliéno, dro dešuiavir čhon, pe biš te pándžto dyvés čhonéskiro, so Jevil'-Mierodaho, králi Vavilonóskiro, ĥazdyjá angíl manušénde Ioakimos, kralís Judejakires, i mekciá pe vólia les štaribnastyr.

³²I o Jevil'-Mierodaho kučes rakirdiá lésa i dyjá léske patyvaledyr štéto, syr javire kral'jéngiro, savé sys lésa dro Vavilóno.

³³I Ioakimo parudia péskiri štaribnytko ídia, i jov xaja maró saró časo angíl kralíste dre saré dyvesá léskire džiibnáskire.

³⁴I králi Vavilonóskiro na pirijačelas te del xabén léske, kažno dyvés léske delaspe léskiri paš ke léskiro dyvés te merél, dre saré dyvesá, syr jov sys džidó.