Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 6 Bible Online

Jeriemiéjo 6 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 6

¹O, Vieniaminóskire čhavé, kedenpe te našén krig Jerusalimóstyr! Phurdén dre rógi (truby) dre Tiekuia i kerén jag, syr signalo dro Bec-Xaceremo; bari bibáht džála paš-ratiakire rigátyr (sievierostyr) i bari bída.

²Tumé san góža i bučindle čhaja Sionóstyr, bari bída javéla pe tuménde.

³Čhupnárja péskire bakréngire gurtenca javéna ke tumé, ke Jerusalimo. Jone rosčhuvena péskire šátry trusciál fóro; kažno (sváko) léndyr javéla te čaliakirel peskiren pe péskiro štéto.

⁴“Javén skedyné te marénpe dalé forosa!” — kadalé vérgi godlena. “Uštén, i javén, džása pe lénde dyvesé.” Bida pe aménde, syg dyvés končynelape, dykhén syr bel'velitka zerja (tiéni) barjona.

⁵Uštén, džása pe lénde ratý, i javén, rozmarasa léngire felatiniá.”

⁶I phendiá adiáke Raj Devél, bolybnáskire — jangoléngiro: “Čingiren telé kaštá, i čhuvén phuv te javél valo trusciál Jerusalimo. Davá fóro te džal tel pharó-sendiakiriben: manušá tasavena jekh jekhés dro davá fóro.

⁷Syr ĥanyngatyr čhuvélape krig lákiro paní, adiáke-pac' dalé foróstyr čhuvélape krig léskiro fuipén: manušá isyn nahrata jekh ke jekh, isyn šundlo isyn, syr jone tasavena jekh jekhés. Saró časo džála ke Me túga i dukhaiben”, — rakiréla Raj Devél.

⁸“Sykljon (obduminenpe) tumé, Jerusalimóskire manušá, sob (kaj) Miro di te na durjol (te na otdžal) tuméndyr, sob (kaj) Me te na čhučakirav tumen adiáke, so phuv javéla bimanušengiri.”

⁹Adiáke rakiréla Raj Devél — bolybnáskiro-jangoléngiro: “Jone javéna zoralés te obtrinskiren manušén Izrailjostyr, kon jačnépe sýrby vinagradoskiri rand', rískir pale péskiro vast sýrby vinagradone — obkedyibnaskiro (obiratieljo), kon čhuvéla múri dre korzíny (khudé).

¹⁰Konéske me, Jeriemiéjo te phenáv, i te dosykavav, sob (kaj) jone mogindlé te šunén? Ake, léngiro kan isyn naobčhindlo i jone naštý te šunén. Ĥáda, Ráskire-Devléskiro lav nane dre patýv lénde; jone na radynénape léstyr.

¹¹Me som pherdó xoliása Rástyr-Devléstyr, Me som khiniakirdo te pririkirav daja xolý.” Phendia Raj Devél mánge: “Vyčhuv la pe bijatende pe ĥasy (vulícy), i pe skedyni (sobranijo), kaj isyn khetané terné manušá: pal-dová so až romes romniása léna dro pliéno, manušés dre beršá i phurané manušés.

¹²I léngire kherá déna javire manušénge, léngire romnién i féldy khetané; pal-dová so Me ĥazdáva Miro vast pe manušénde pe kodoia phuv”, — phendiá Raj Devél.

¹³Pal-dová so kažno (sváko) léndyr, naj tyknedýr manušéstyr ke naj baredýr isyn prisyklyno ke ĥalkima, i, kažno (sváko) léndyr, prorokostyr ke rašáj keréla načačunes.

¹⁴Jone sastiakirde [sastiakirena-r.s.] čhindló fránso (rana) miré-manušéngiri vari-syr, phení: “Ramánjo, ramánjo (miro)!” Kiéli nane ramánjo.

¹⁵“I ci ladžandyne jone, syr jone kerdé džungalé réndy (diély)? Nad, jone na ladžandyne, i jone na džinéna, so isyn dasavo te loljon. Paldavá jone peréna maškír odolénde, savé peréna pe meribén”, — phendiá Raj Devél.

¹⁶Raj Devél rakiréla adiáke: “Terdjon pe dromá, i dykhén, i phučén pal phurané dromá, kaj isyn lačhó drom i džán pir davá drom, i tumé lathéna diéske te otkhinjon. Ne jone otphendlé: “Ame na džása pir davá drom.”

¹⁷Raj Devél adiáke-pac' čhudiá stregar'jen (rakhibnar'jen) vaš adalé manušénge: “Šunén rogoskiri zan!” Ne jone phendlé: “Ame na javása te šunas.”

¹⁸Paldavá šunén tumé, Najudýtka nácyi, i džinén, so javéla Miré-manušytkoné skedyibnasa.

¹⁹Šun, phuv! Ake Me janáva bibáht (xasibén) pe adalé manušénde, i pe dová, so jone priduminena; pal-dová so jone na šundlé Miré lavá, i so jone otphendepe Miré Zakonóstyr.

²⁰Vaš so Mánge aromatytkone-smolengiro (ladonoskiro) thuv, so džála Sabatyr, i gudly triščyna (trasniko) duratuné themestyr? Me na prilava Tumaré xačkiribnaskire janybená i tumaré — svénta dyibená na radynena Man.”

²¹Paldavá rakiréla Raj Devél adiáke: “Ake, Me čhuváva bar te obštavenpe angíl kadalé manušénde: dadá i čhavé khetané peréna pir davá bar. Pašatuno manúš i léskiro mal xasjona.”

²²Haladé (manušá) paš-ratiakire themestyr (sievierostyr) džána pe Jerusalimo. I ake, rakiréla Raj Devél: “Ake, bari manušýtko nacyja ĥazdélape duratuné jagorendyr pe phuv.

²³Jone lydžána lúko i maribnýtko bust te phusaven, jone isyn bidiéskire i na lačhé-ilytka, léngire zaniá ĥryminena sýrby mórjo (derjáv), jone tradéna uklisté pe grénde, jone isyn kedyne te marén tumen, čhajo Jerusalimóstyr.

²⁴“Ame šundiám zvies' pal lénde, — amaré vastá jačné bizorjákire, bari túga uhtyldia amen, dukh, sýrby dre džuvliáte, kon isyn dre pharí men'ka.

²⁵Ame na vydžasa pe félda, i ame na psirasa droménca, pal-dová so vergoste isyn kurtála, saví doreséla saré rigéndyr i traš pe kažno rig.”

²⁶“Miré-manušéngiri čhajo, čhuv pe péste žalobno gonó, i katynpe dre práska! Zoralés tugin sýrby pal jekhore čhavoreste, kirkes obrov pal-dová so jekhátyr peréla (javéla) pe aménde zamaribnari”, — phendiá Raj Devél.

²⁷Me čhudjom tut, Jeriemiéjo, sýrby rakhibnaskiri vučardý (bašnia) pe Miré manušénde, sýrby tvárdyma, sob (kaj) tu te džinés, i te propatiakires léngiro drom;

²⁸Saré jone isyn pharé-šeritka (nahrata) buntiarja, i jone isyn kalia — keribnaskire (klievietniki); jone isyn pharé sýrby xarkóma (mied') i sastýr; saré jone isyn biladžakire.

²⁹Mieho (pišot) kutý (nábut) so na shačija sarésa, molovi (svinco) pohaia jag; biliakeribnaskiro (plavil'ščyko) biladia ivjá (naprásnes), pal-dová so šlaki [nalačhé manušén-r.s.] na ukedyne.

³⁰Manušá javéna te kharén len “čhurdynó rup”, pal-dová so Raj Devél na prilyjá len.”