Read Biblija - Pe Baltitko Romani čib (Romanes) 2019 Baltic Romani Bible Jeriemiéjo 9 Bible Online

Jeriemiéjo 9 - Biblija - Pe Baltitko Romani čib (Romanes) 2019 Baltic Romani Bible bible

Jeriemiéjo 9

¹O, te javél Miro šeró pherdó paningenca, sob (kaj) te javén Miré jakhá sýrby jasvengiri ĥanýng, sob (kaj) Me moginavas te rovav dyvés i rat pal Miré-manušéngiro-čhakiro xasibén.

²O, te javél Mánge štéto pe čhučí phuv syr dromeskireske (putnikoske), sob (kaj) Me moginavas te mekav Miré manušén, i te džav péske léndyr. Jone saré isyn biladžaipnarja, biladžaipén-keribnaskire (prieliubodiei), jone isyn skedyné vaš zdyibnaskire manušénge.

³I jone bandiakirena péskire čibá te xohaven sýrby lúko, ne jone na bidaripnaskire vaš patiaibén pe phuv: pal-dová so jone piridžana jekhe bibahtiatyr (xoliátyr) ke javír, ne jone na džinéna Man, — rakiréla Raj Devél.

⁴Kažno (sváko) te rikirélape rigasa péskire malestyr, i na dopatia zoralés dre péskire pšaléste, pal-dová so kažno pšal zadžála frotymasa pe drom javireske, i kažno mal isyn kalia-keribnaskiro (pljotkari).

⁵Kažno léndyr xohavela péskire pašatunes, i na rakiréla patiaibén: jone vysykliakirde péskire čibá te rakirén xohaibén, i jone khiniakirena pes, keri čoripén.

⁶Odój, kaj jone dživéna, maškirál isyn xohaibén, jone otphenenape te džinén Man pir péskiro xohaibén’, — rakiréla Raj Devél.

⁷‘Paldavá rakiréla bolybnáskire-jangoléngiro Raj Devél: ‘Ake, Me biliakirava len i Me sprobinava len; pal-dová so iščo (inké) Mánge te keráv miré-manušéngire čhasa?

⁸Léngiri čib isyn muliakiribnaskiri bust (striéla), joj rakiréla xohaibén. O manúš rakiréla kučes (ramanjosa) ke péskiro pašatuno péskire čibása, ne jov andrál péste sýrby podrakhela te zamarél les.

⁹Ci Me na sendiakirava pharés len pal saró davá, — rakiréla Raj Devél. ‘Ci Me na otdáva pale xolynasa dasavé nacyjake syr daja?’

¹⁰Me, Jeriemiéjo, ĥazdáva roibén pal bérgi, i me obrovavape pal čaraibnytka féldy pe čhučé malia (stiepi), i me javáva te rakiráv jasvénca pal-dová, so čhučé malia xačine adiáke, so nikón na déla ráda te džal pirdál lénde. Zan kheritkoné-žyvjolengiri (murdalengiri) isyn na šundly. Syr bolybnýtka čirikliá, adiáke-pac' i kherítka murdalá (skoto) xasiné, jone giné krig.

¹¹Me keráva Jerusalimóstyr ruíny, štéto, dro savó dživéna šakaly. Me keráva Judejákire for'jéndyr čhučó štéto, so nikón na dživéla.

¹²Kon isyn godó manúš, sob (kaj) jov te del ráda te ĥaljol saró davá? I konéske Ráskire-Devléskire uštá phendlé, sob (kaj) jov moginelas te phenél statečnes sarénge? Sóske daja phuv xasijá, shačija sýrby šukí čhučí phuv mal adiáke, so nikón na džála pir láte?’

¹³I otphendiá Raj Devél: “Pal-dová, syr jone mekné Miro Zakóno, savó Me dyjom lénge, i syr jone na šundlé Mirí zan, i jone na kerdé pir Miro Zakóno,

¹⁴a jone kerdé pir péskire pharé ile, i otdenas patýv Vaaloske, syr léngire dadá sykliakirdé len;”

¹⁵paldavá adiáke rakiréla bolybnáskire-jangoléngiro Raj Devél, Izrailjoskiro Devél: “Ake, Me čaliakirava kadalé manušén palynosa i Me paniakirava len paniésa želučosa.”

¹⁶I Me rosčhuvava len te dživén maškír Najudénde, konés na džindlé ni jone, ni léngire dadá. I Me bičhaváva kurtála pal lénde, angíl dová, syr Me sarésa xasiakiráva len.’

¹⁷Adiáke rakiréla bolybnáskire-jangoléngiro Raj Devél: “Obduminen i kharén džuvlién, savé tuginena roibnasa, sob (kaj) jone moginen te javén; i bičhaven pal džindlé džuvliende, sob (kaj) jone moginénas te javén.

¹⁸Mek te javén jone sygedýr, i me te ĥazdén jone roibén pal aménde adiáke, sob (kaj) te prastan (te čhuvenpe) jasva amaré jakhéndyr, i sob (kaj) amaré cymblendyr te thaden (čhuvenpe) paniá.

¹⁹Pal-dová isyn šundly zan, syr tuginela zoralés džuvlý Sionóstyr: “Syr amen občorde! Syr ame sam ladžakirdé, pal-dová so ame mekciam phuv pir-dová, so amen tradyne krig amaré kherendyr!

²⁰Džuvliale! Šunén Ráskire-Devléskiro lav, i mek tumaré kaná te prilén Léskiro lav; sykliakirén tumaré čhajén te tuginen roibnasa, i te bagán roibnytka giliá jekh jekhéske.

²¹Pal-dová so meribén džála pirdál amaré fenšry i džála dre amaré felatiniá te muliakirél amaré čhavorén pe ĥasy (vulícy), i terné manušén pe foruný (plóšča) dro fóro.

²²Phen, Jeriemiéjo: ‘Adiáke rakiréla Raj Devél: “Manušéngire trúpy javéna te ravenpe (te pasjon) syr ĥnejo pe otkerdy félda, i syr ĥarby palál pal givačhinybnaskireste, i na javéla butýr nikón te skedel len.”

²³Adiáke, rakiréla Raj Devél: “Mek godó manúš te na barjakirel pes péskire godypnasa (godiása), mek zoraló manúš te na barjakirel pes péskire (šarelpe) zorjása; i mek barvaló manúš te na barjakirel pes (te na šarelpe) péskire barvalypnasa:

²⁴ne mek jov, kon barjakiréla pes, te šarelpe (te barjakirel pes) dalésa, so jov ĥaljola i, so jov džinéla Man; pal-dová so davá Me som, Raj Devél, Kon sykavéla drógo láska, čačunó séndo i čačipén pe phuv. Pal-dová so Me zoralés radynavpe saréstyr daléstyr”, — rakiréla Raj Devél.

²⁵“Ake, syg javéna dyvesá”, — rakiréla Raj Devél, — kiéli Me pharés sendiakirava kodolén, savé isyn občhindlé i savé isyn naobčhindle:

²⁶dro Jegípto, i dre Judéia i dro Jedomo čhavorén Amonostyr i Moavostyr, savénde jagóry (kraí) pe balengire piéisy isyn občhindlé i savé dživéna pe čhučí phuv. Pal-dová so saré dalé Najudýtka nácyi isyn naobčhindle i, saró Izrailjoskire-kheréskire-manušéngiro iló isyn na občhindlo.”