Read Biblija - Pe Baltitko Romani čib (Romanes) 2019 Baltic Romani Bible Roiben 1 Bible Online

Roiben 1 - Biblija - Pe Baltitko Romani čib (Romanes) 2019 Baltic Romani Bible bible

Roiben 1

¹Pharó isyn dro Jerusalimo: jov (fóro) isyn bi manušéngiro, sýrby pivly (udova), saví sys rany maškír manušypnaskire nácyi! Ake, kon sys thagári pe phuvjákire rigá, odová manúš, jaciá dynarisa.

²Jov[1] rovela kirkes ratý, i jasva isyn pe léskire čhama (ščoki): nane nijékh podrikiribnaskiro maškír sarénde, konéske sys drógo davá fóro. Saré foróskire malá bikindle les, i jone jačné léskire vergenca (vrogenca).

³Judejákire manušá giné dre navolia, kaj menčynena len i jene isyn pharé — butiakire andynarščyki. Jone dživéna maškír Najudénde, jone na otkhinjona. Saré, kon tradyne len, javné naŭžakirdes pe lénde, syr lénge jaciá pharó te dživén.

⁴Sionoskire dromá tuginena, pal-dová so nijékh na javéla te svenkinel. Saré léskire pórty isyn čhučé, léskire rašaja déna ĥondiá, léskire patyvalé tyrne džuvlién pritasavéna, Sionoske, kokoreske, isyn pharó.

⁵Léskire namala jačné raja (ranca), léskire vérgi ziainena mištypnasa, pal-dová so Raj Devél pritasadia Sionoskire manušén pir dová, so jone kerdé but čoripén. Léskire čhavoré giné dro pliéno angíl namaleste.

⁶Sarí šuk Sionoskire čhatyr xasijá, lákire thagárja jačné sýrby mirga (olienjo), savjate nane čaritko phuv, savé giné bizorjákire angíl tradypnaskireste.

⁷Dre dyvesá, kiéli jone menčyndlepe i len tradenas, tedy Jerusalimo ripirdia saré kuč réndy, so sys ĥaredyr léste, syr xasiné léskire manušá vergoskire vasténdyr i nijékh na dyjá vast léske. Namala dykhné les i jone sandlepe xoliames léskire bedypnastyr.

⁸Jerusalimo kerdiá baró grého, paldavá jov jaciá magirdó. Saré, kon kutiakirde les, mekné te kerén patýv; pal-dová so jone dykhné léskiro nangipén. Jov, čačó, dyjá ĥondiá i gijá krig.

⁹Léskiro magiripén isyn pe léskire ídia, jov na dumindia pal péskiro džiibnáskiro kónco (jagóro), paldavá jov pyjá adiáke namištes, léste nane podrikiribnaskiro. Rajo Dévla! Dykh miré mén'ki, pal-dová so vérgo barjakirdia pes.

¹⁰Vérgo (vrogo) dind'kirdia péskiro vast pir kučipén, so sys léste; Jerusalimo dykhciá syr Náiudy giné andré Svénto Štéto, konéske Tu priphendian te na džán andré Tyrí Khangirí.

¹¹Saré léskire manušá déna ĥondiá, jone radena maró; jone dyné suvnakaja i kuč bará pal xabén, sob (kaj) te rakhén džiibén. “Dykh, Rajo Dévla, obdumin, syr sanape xoliames mándyr!” — rakiréla Jerusalimo.

¹²“Sarénge tuménge davá nisó, kon džála péske (nakhela) mamúi! Ĥáda, dykhén: ci isyn iščo (inké) vari-konéste dasaví dukh syr mánde — so pyjá pe mánde, — savjása Raj Devél pritasadia man dro dyvés, kiéli Jov xoliásyja zoralés.

¹³Vučipnástyr Jov bičhadiá jag pe miré kokalý, i jag lyjá zor pe miro fóro; Jov rosčhudiá felý vaš mirí ĥerój i riskirdiá man pale; Jov kerdiá adiáke, sob (kaj) me te javav čhučó (pusto), sob (kaj) me te mlosnjovav (te našavav zor) saró dyvés.

¹⁴Raj Devél phandia zoralés Péskire vastésa ĥámo miré čoripnástyr; joj isyn khudý i zarescia pe mirí men. Jov kerdiá adiáke, so mirí zor zamyjá. Jov zdyja man dre vastá, savéndyr me na mogináva te ĥazdavpe.

¹⁵Raj Devél štakirdia tel ĥerá saré miré zoralypnaskire manušén maškirál miro fóro, Jov khardiá khetané skedyibén pe mánde te zatasaven saré miré tyrnen manušén: Raj Devél štakirela sýrby dro prieso patyvalia ternia džuvliá, kon isyn Judejakiri čhaj.

¹⁶Paldavá me i rovava, mirí jakh čhuvélape paniésa, pal-dová so miro podrikiribnaskiro, kon moginelas te del pale džiibén miré dieske, isyn dur mándyr. Miré čhavé našadyne, pal-dová so vérgo pirilyja upralypén.”

¹⁷Sióno d(z)ind(z)'kirela péskire vastá, ne nane nijékh te podrikirél léskiro dúho (fáno). Raj Devél priphendiá adiáke, sob (kaj) te javén léskire malá trusciál Jakovoste (Jakuboste), ne me, Jerusalimo, jacjom magirdó maškír lénde.

¹⁸Raj Devél isyn čačipnáskiro, pal-dová so da me kerdjom búnto pe Léskire priphenybená. Šunén, kakaná, saré manušypnaskire nácyi, i, ĥáda, me pyjom dro dúho (fáno), a me, miré čhaja i miré tyrne manušá giné dro pliéno.

¹⁹Me khardjom odolén, kon sys miré drúgi (malá), ne jone xohade man; miré rašaja i miré phuré phurdyne péstyr palatunó (posliednjo) dúho (fáno) dro miro fóro, rodyi péske maró te rakhén džiibén.

²⁰Dykh, Rajo Dévla, syr bari bibáht pyjá pe mánde; miro di isyn dre traš, miro iló riskirdiape upré dre mánde, pal-dová so me keravas dová, so me kamamas. Javriestyr kakaná kurtála (miečo) čingirela šeró, ne kheré isyn sýrby meribén.

²¹So me dáva ĥondiá, so nane kon te podrikirél man. Saré miré vérgi šundlé pal mirí bari bída, jone radynénape daléstyr, so Tu kerdián davá. Bičháv dová dyvés, so Tu, Rajo Dévla, phendián statečnes, mek jone te jačénpe dasavé-pac', syr me som.

²²Mek saró léngiro fuipén te sykadjol angíl Túte, i ker lénge dová, so Tu kerdián mánge pal miro čoripén, pal-dová so me pharés davá ĥondiá, i miro iló našavela zor.”