Read Biblija - Pe Baltitko Romani čib (Romanes) 2019 Baltic Romani Bible Roiben 2 Bible Online

Roiben 2 - Biblija - Pe Baltitko Romani čib (Romanes) 2019 Baltic Romani Bible bible

Roiben 2

¹Syr čhakirdia Raj Devél Sionoskirja Čha cjomnone oblokosa, dre Péskiri xolý! Jov čhurdyjá telé bolybnástyr Izrailjoskiri gožyma i na ripirdia pal Péskire-ĥerengiro predkico dro dyvés, syr Jov xoliásyja.

²Raj Devél xasiakirdiá i na potangindia saré Jakovóskire kherá: Jov čhurdyjá telé xoliátyr Judejákire-čhakire tvárdymi [zoralé štéty-r.s.], Jov phagirdiá sarésa len pe phuv, Jov čhudiá magiripén pe kralipén i léskire thagar'jende.

³Jov čingirdia te xasjol kažno Izrailjoskiro maribnýtko šyng Péskire baré xoliátyr; Jov dyjape pale Péskire vastésa angíl dová, syr javdiá vérgo, Jov roshačkirdia bari jag mamúj Jakovoste, sob (kaj) te xal saró, so sys trusciál.

⁴Jov ĥazdyjá Péskiro lúko pe aménde syr vérgo, Jov terdijá dro stonka Péskire čačé vastésa sýrby vérgo, i Jov muliakirdiá saró, so sys šukár Léskire jakhenge. Jov vyčhudiá Léskiri xolý sýrby jag pe šátra, kaj sys Sionóskiri čhaj.

⁵Raj Devél jaciá syr vérgo: Jov phagirdiá telé Izrailjo, Jov phagirdiá telé saré léskire felatiniá, Jov vymardia pe koterá léskire tvárdymi i Jov dyjá butedýr roibén i túga Judejákire Čhake.

⁶I Jov xoliames rosphagirdiá Péskiri Khangirí sýrby xrústy untatyr (sadostyr), Jov mardia pe koterá štéto, kaj kedenaspe te den patýv Léske. Raj Devél kerdiá adiáke, sob (kaj) te bistren uphendle svénki sávaty i dro Izrailjo, Jov jaciá te na del patýv kralíske i rašáske.

⁷Jov otphendiape ladžasa Péskire altarjostyr, Jov mekciá Péskiro Svénto Štéto; Jov otdyjá felatiniakire vánty Jerusalimóstyr dre vergoskire vastá. Jone ĥazdyné dasaví gódla dro Ráskire-Devléskiro Kher, syr dro svenkengiro dyvés.

⁸Raj Devél priduminde te xasiakirél Sionoskire-Čhakiri vánta: Jov dind'kirdia šelo, Jov na obrikirdia Péskiro vast, sob (kaj) te na xasiakirél, Jov kerdiá adiáke, so valo i vánta lyné te rovén tugatyr, i isyn pašté koterenca khetané.

⁹Foróskire pórty bešné dre phuv: Raj Devél xasiakirdiá i phagirdiá foróskire štaby, foróskire králi i thagárja isyn bičhadé maškír Najudénde. Zakóno butýr nane, i foróskiri proróki na dykhéna suné Rástyr-Devléstyr.

¹⁰Godephuré Sionoskire isyn bešté štylés pe phuv; i isyn jone čhurdena práho pe péskire šeré i jone podphandenape žalobnone gonesa. Jerusalimóskire patyvalé tyrne džuvliá bandiakirena šeré ke phuv.

¹¹Miria jakhá xasjona jasvendyr, saró andrál mánde isyn dre traš, miro kaló buko (piečonka[2]) čhuvélape javrí pe phuv, pir-dová so xasjona miré — manušéngiri čhaj, pal-dová so čhavoré i bijaty našavena zor pe vulícy (gásy) dro fóro.

¹²Jone rakiréna péskire dajenge: ‘Kaj isyn giv i kaj isyn mol?’ Jone meréna [našavena sodžinyben-ju.o.] sýrby dukhade pir foróskire gásy, i jone otdena péskiro di pal léngire — dakiri breg.

¹³Sósa mánge te ramaniakirav tut? Sósa mánge te porovninav tut, Jerusalimóskiri čhaj? Sósa te rovniakirav tut, sob (kaj) mánge te dav lačhó lav túke, patyvalý terný džuvlý, čhaj Sionóstyr? Pal-dová, so tyró bedypen rosčhudiape buĥles syr mórjo (derjáv), kon moginéla te sastiakirel tut?

¹⁴Tyré proróki dykhné vaš túke čhučé i nagod'vare suné; jone na sykade tyró čoripén, sob (kaj) te riskirén pale tumen plienóstyr, ne jone dykhné vaš túke xohané angilphenybena; paldová i vybičhade tumen.

¹⁵Saré, kon džála pašýl, pekavena pir vastá pe túte; jone sipinena i kuninena šerenca pe Jerusalimóskire čhate: “Ci davá isyn fóro, so khardiape Gožymakiro pherdypen, saré — phuvjákiri rádyma?”

¹⁶Saré tyré vérgi psirade péskire muiá pe túte: jone sipinena i jone skriežynena péskire dandenca. Jone rakiréna: “Ame xasiakirdiam davá fóro! Ake, isyn dyvés, so ame užakirdiam, ame lathiam dová, ame dykhciam davá.”

¹⁷Raj Devél kerdiá dová, so Jov pridumindia: Jov vypherdiakirdia Péskiro lav, so Jov priphendiá dre ĥaratuné dyvesá. Jov čhurdyjá telé Jerusalimo, i Jov na potangindia, Jov kerdiá adiáke, sob (kaj) tyró vérgo drieván te radynélpe tyré bibahtiatyr, Jov barjakirdia zor tyré namalenge.

¹⁸Jerusalimóskire — manušéngiro iló lyjá te del gódla roibnasa ke Devél: o Sionoskire-Čhakiri vánta! Mek te prastan tyré jasva syr reka (len') dyvés i rat; na otkhinjov, na de péskire jakhenge te otkhinjon.

¹⁹ĥazdepe, de gódla javrí ratý, kiéli kažno stréga džála, vyčhuv syr paní péskiro iló angíl Raste-Devléste, ĥázde péskire vastá ke Jov vaš džiibén tyré tyrne bijatengiro, savé našavena zor bokhátyr pe kažnoné-gasakiro venglo.

²⁰“Dykh, Rajo Dévla, i obdumin, konéske Tu kerdián adiáke? Sob (kaj) džuvliá te xan péskiro barjakirdó (plódo), konés jone barjakirdé? Sob (kaj), xaj, te muliakirén rašás i prorokós pe Ráskire-Devléskiro Svénto Štéto?

²¹Tyrne i phurané isyn pašté pe phuv pe gásy, i jone miré patyvalé džuvliá i miré terné manušá pyné kurtalátyr; Tu muliakirdian len dro dyvés, syr Tu xoliasyjan, Tu zamardian len i Tu na tangindian (na požalindian).

²²Tu khardian khetané sýrby pe svenkitko dyvés traša, so obgine trusciál man; dro dyvés, syr Tu xoliasyjan, nijékh na nascia, na jaciápe. Kodolén, konéske me davas kolýn i konés me barjakirdjom, miré vérgi vyhane.”