Read Biblija - Pe Baltitko Romani čib (Romanes) 2019 Baltic Romani Bible Roiben 3 Bible Online

Roiben 3 - Biblija - Pe Baltitko Romani čib (Romanes) 2019 Baltic Romani Bible bible

Roiben 3

¹Me som manúš, konés Devél pritasadia destesa Léskire xoliátyr,

²Jov lydžijá man i jandiá te psirav dro kalypén (ciamlypén), kaj nane dud.

³I Jov riskirelas Péskiro vast pe mánde nevés i nevéstyr dyvesenca.

⁴Jov kerdiá adiáke, so miré masá i mirí cýpa tyknyne, i Jov phagirdiá miré kokalý.

⁵Jov ĥazdyjá vánta pe mánde, i Jov obgija trusciál man kirkipnasa i pharipnasa.

⁶Jov čhudiá man dre ciamle štéty, sýrby me ĥará myjom.

⁷Jov občhudiá man tynosa, sob (kaj) me na moginav te džav angíl: Jov pharjakirdia mirí zandir.

⁸Adiáke-pac', kiéli me khardjom roibnasa i dyjom gódla, tedy Jov zarikirdia mirí pátieri (molítva).

⁹Jov zakerdia miré dromá vyčingirde barénca; Jov popentyndia miré dromore.

¹⁰Jov jaciá vaš mánge sýrby rič, so isyn paštó, užakiri te zamarél, sýrby ščer, savó isyn dro čorahano štéto.

¹¹Jov piririskirdia miré dromá i kuscia man pe koterá: Jov pirikerdia man dro nisó.

¹²Jov ĥazdyjá Péskiro lúko, i Jov čhudiá man syr celjo vaš Péskire maribnýtka bustiá (striély).

¹³Jov kerdiá adiáke, so bustiá Léskire kolčanostyr phusadé miré bukore.

¹⁴Me jacjom kadasavó, so saré manušá sanape xoliames mándyr, me jacjom sýrby léngiri gilý pe dyvés.

¹⁵Jov dyjá čalés mánge kirkipen i paniakirdia man palynosa.

¹⁶Jov phagirdiá miré dandá graviljosa i čhakirdia man pieplosa.

¹⁷Jov lydžijá mándyr dur ramánjo (miro) miré diestyr, me bistyrdjom pal mištó džiibén.

¹⁸I me phendjom: ‘Mirí zor i mirí nadiéia pe Raste-Devléste xasiné.”

¹⁹Me ripirava miré mén'ki i mirí bari bída, kirki čar (polyno) i želučo.

²⁰Miro di ŭsa ripirela len i isyn paštó štylés dre mánde.

²¹Davá me otphenava miré godiake i paldavá isyn nadiéia mánde:

²²ame na xasijam pal Ráskire-Devléskiri láska, pal-dová so Léskiri žalima na končyndiape;

²³jone sykadjona nevés kažno zlóko (ránko): savó baró isyn Tyró patiaibén!

²⁴“Mirí dólia isyn dre Devléste” — rakírla miro di — “paldavá me užakirava lačhipén Léstyr.”

²⁵Raj Devél isyn lačhó vaš odolénge, kon užakiréla Les, vaš kodolengiro di, savó rodéla Les.

²⁶Davá isyn mištó, sob (kaj) manúš te rikirél nadiéia, i sob (kaj) te užakirel štylés, syr Raj Devél rakhéla Les.

²⁷Davá isyn mištó vaš manušéske, sob (kaj) jov te lydžál ĥámo Devléstyr péskire tyrnypnastyr.

²⁸Me jov te bešél jekhdžinó i te javél štyl, pal-dová so davá Raj Devél čhudiá davá pe léste;

²⁹mek jov te čhuvél péskiro muj dro práho, — mo, te javél iščo (inké) nadiéia.

³⁰Jov podčhuvela péskiri čham (ščoka) kodoléske, kon marela les; mek te obrakiren les pherdés.

³¹Pal-dová so Raj Devél na jačkiréla pe ŭsády (sak).

³²Ne kóli Jov bičhavéla ileskiri dukh, tedy Jov adiáke-pac' sykavéla i žalima, pir-dová so barvaly isyn Léskiri láska:

³³pal-dová so Jov na pritasavela ci kaliakirela manušéngire-čhavéngire ile, pir-dová so Léske trej adiáke.

³⁴Kóli tasavena ĥerénca sarén, kon isyn dro štaribén, pir phuv,

³⁵kóli riskirena pe rig čačipén, so isyn pal manušéste angíl Naj Vučedyreskire Devléste;

³⁶kóli načačunes sykavéna manušés dro léskiro réndo, — ci Raj Devél pridžinela čačipén pe davá?

³⁷Kon isyn kadavá, kon phenéla: ‘Davá kerélape adiáke, — mek Raj-Devél i na priphendiá.

³⁸Ci na Naj Vučedyreskire-Devléskire lavéstyr, so javéla čoripén i lačhipén?

³⁹Sóske tedy džidó manúš žalinelape, kóli Raj Devél sendiakiréla les pal léskire gréhi.

⁴⁰Javén, rozĥaljovasa xor i vyphučasa pes pal amaré dromá i risjovasa pale ke Raj Devél.

⁴¹Javén, ĥazdasa ame amaró iló i vastá ke Raj Devél, Savó isyn pe bolybén.

⁴²Ame kerdiám čoripén i búnto: Tu na otmekcian amarí bang.

⁴³Tu čhakirdian Pes xoliása i Tu tradyjan amen, Tu muliakiresas amen i Tu na tanginesas.

⁴⁴Tu čhakirdian pes oblokosa, sob (kaj) amarí pátieri te na prodžal pir léste.

⁴⁵Tu kerdián améndyr šuma i džungalypén (gidota) maškír manušénde.

⁴⁶Saré amaré vérgi psirade péskire muiá pe aménde.

⁴⁷Dar i felý isyn pe amaró drom, čhučipen i xas'.

⁴⁸Miré jakhéndyr prastána panieskire réki (leniá) pal miré manušénde [terné patyvalé džuvliáte-r.s.], savé xasjona.

⁴⁹Miré jakhá thadena, i jone na pirijačena, jone na zarikerenape,

⁵⁰angíl dová, syr Raj Devél na podykhela telé vučipnástyr i, ake, na udykhéla.

⁵¹Miré jakhéndyr džána dukhá dro miro iló pal saré manušénde miré foróstyr.

⁵²Miré vérgi tradenaspe pal mánde bi-pričynakire sýrby pal čirikliate.

⁵³Jone zatradyne ke meribén man dre ĥanbín i čhurdyné bará pe mánde,

⁵⁴paniá ĥazdynépe vučedýr miré šerestyr, tén'či me phendjom: “Me xasijom.”

⁵⁵Me khardjom Tyró lav, Rajo Dévla, telatuné ĥanbiniatyr.

⁵⁶Tu šundián mirí zan: “Na garav Tyró kan, syr me dáva 'gondia, syr me rovava.”

⁵⁷Tu javesas pašyledýr dro dyvés, syr me khardjom Tut. Tu phendián: “Na andarša.”

⁵⁸Rajo Dévla! Tu lydžijan miro réndo; Tu vykindian miro džiibén.

⁵⁹Rajo Dévla! Tu dykhcián, syr načačunes isys mánca. Rossendin miro réndo.

⁶⁰Rajo Dévla! Tu dykhcián saró léngiro fuipén, so jone keréna mánge, i so jone pridumindle pe mánde.

⁶¹O Rajo Dévla! Tu šundián, syr jone obrakirenas man, so sarí léngiri fantazija isys pe mánde;

⁶²syr miré-vergéngire uštá ĥundiarinenas pe mánde dyvesenca.

⁶³Podykh, syr jone bešena, i syr jone uštena; Me jacjom sýrby léngiri gilý.

⁶⁴Otdé pale lénge, O Rajo Dévla, pir dová, so léngire vastá kerdé.

⁶⁵Bičháv lénge kalypén pe iló, mek te javén Tyró prokošybén (armania) pe lénde!

⁶⁶Trade len angíl xoliása, i muliakir len Tyré bolybnástyr, Rajo Dévla!