Read Biblija - Pe Baltitko Romani čib (Romanes) 2019 Baltic Romani Bible Roiben 4 Bible Online

Roiben 4 - Biblija - Pe Baltitko Romani čib (Romanes) 2019 Baltic Romani Bible bible

Roiben 4

¹Syr kalyja suvnakái! Syr parudyja žužó suvnakái! Bará sventoné štetóstyr rosčhurdyne pir kažno venglo, kaj gásy rozdžana.

²Dróga Sionoskire čhavé, savé isyn mol syr žužó suvnakái, syr da lénge déna patýv sýrby ĥlejakire sudinkenge, so kerdiá kučikengiro (goršečniko).

³Až i rupuči [čudoviščy / šakalihi-ju.o.] déna ciucia te čaraven péskire tyknen, ne miré — manušéngire čhaja jačné pharé-iléskire sýrby strausy čhučé prahendyr.

⁴Tykné-masengiri čibori uhtylelape zoralés pal taloj dro léngiro mujoro, syr kaména paní: tykné bijaty mangena maró, ne nijékh na phagiréla (na déla) koteroro lénge.

⁵Kodolé, kon xaja delikatesy, isyn nábut so džidé pe vulícy (pe gásy); kodolé, konés barjakirdé dro loló plaščo, oblena kučy ĥnejo.

⁶Pharó-sendiakiriben pal čoripén, so kerdé miré-manušéngire čhaja, isyn zoraledýr pharé-sendiakiribnastyr, so doresné pal Sodomoskiro grého. Dová fóro sys rado telé pal jekh menta (minuta) adiáke, so nijékh na dyjá ráda te podel vast.

⁷Jerusalimóskire thagárja sys jasnedyr ivestyr i parnedyr thudestyr; jone sys lolikanedyr, dre masá rubinendyr; jone vydycjonas sýrby sapfiry.

⁸Kakaná jone vydycjona kaledyr boveskire meliatyr, jone džána pir gásy, len na pindžkirena. Léngiri cýpa uhtylelape zoralés ke léngire kokalý, joj vyšutija i jaciá syr kašt.

⁹Kodolenge, konés muliakirdé kurtalása, isyn bahtaledyr adalendyr, savé meréna bokhátyr. Pal-dová so jone našavena povolin'kes (liéntes) zor i kljoko, pir dová, so na uhtyléla (nádosi) feldýtka aplody.

¹⁰Vastá lačhé-iléskire džuvlién kerade péskire bijatén: jone sys mas lénge, kiéli pyjá bedypen pe Jerusalimóskire manušénde.

¹¹Raj Devél vypherdiakirdia péskiri bari xolý, Jov vyčhudiá Péskire-xoliakiri jag. Jov xačkirdiá jag pe Sióno, i joj pohaia sarésa foróskire fundamienty.

¹²Králja pe phuv i saré džiibnarja pe svéto na patiandyné, so namal i vérgo zadžála dre Jerusalimóskiri pórta, —

¹³saró davá pal foróskire prorokénde i pal léngiro — rašángiro čoripén, kon pročhude čačuné — manušéngiro rat maškír davá fóro.

¹⁴Jone psirdé syr kororé pir gásy, jene magirdé pes ratésa adiáke, so nijekhe manušéske sys naštý te čilavel léngire ídi.

¹⁵Manušá dénas gódla pe lénde: “Džán krig, magirdé! Džán krig! Džán krig! Džán! Na čilaven amen.” Syr jone psirdé trusciál Najudénde, isys phendló maškír lénde: “Jone na dživéna butýr adái!”

¹⁶Ráskire-Devléskiri xolý roskerdiá len pe pašá. Jov na javéla te kerél patýv lénge. Nikón na kutiakirdia ni rašán, ni sykadiá láska ke godephuré.

¹⁷Amaré jakhá khinyne te dykhén ivjá (darmes), so vari-kon podela vast aménge. Ame dykhciam amaré vučardiatyr (bašniatyr) pal manušénde, savé na dyné ráda te zrakhen amen.

¹⁸Amaré vérgi tradynepe pal aménde pir amaré špery (sliady), so ame na mogindiam te džas javrí pe gása. Amaró kónco (jagóro) isyn pašýl, amaré dyvesá syg končynenape, pal-dová so javdiá amarí xas'.

¹⁹Amaré šale[3] sys sygedýr kidendyr (orlendyr) pe bolybén, jene tradynepe pal aménde dre bérgi; jone užakirde čorahanés amen pe čhučé prahi.

²⁰Amaré kralís, savó isyn sýrby maró dre amaró džiibén, konés Raj Devél pomakhcia syr kralís, uhtyldé dre léngire ganbinia. Pal léste ame phendiam: “Ame javása te dživás maškír Najudénde tel léskiri zer (tienjo).”

²¹Rádynpe i jav viesjolo (xotno), Edomoskiri Čhaj, kon dživéla pe phuv Uz. Tahtáj adiáke-pac' javéla pirdál ke tu: tu matjosa, i tu nangiakiresa pes.

²²O, Sionóskiri Čhaj, pharó sendiakiriben končyndiape: Raj Devél na javéla te lydžál tut krig dro pliéno. Ne Jov sendiakiréla tut pal Tyró čoripén, Edomoskiri Čhaj. Jov otčhakirela tyré gréhi.