Read Biblija - Pe Baltitko Romani čib (Romanes) 2019 Baltic Romani Bible Jezekiljo 1 Bible Online

Jezekiljo 1 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 1

¹I sys: dro (dešutrito) berš, dro štárto čhon pe pándžto čhonytko dyvés, kóli me sómas maškír odolénde, konés tradyne dro pliéno, pašýl reka (len') Xovar — otkerdiape bolybén, i me dykhcjom dykhibena Devléstyr.

²Pe pándžto čhonytko dyvés davá sys pándžto berš, kiéli zalyne dre navolia kralís Ioakimos (Jahimos).

³Sys Ráskire-Devléskiro lav ke Jezekiljo, Vuzijaskire čhavéske, rašáske pe Xaldiejengiri phuv, pašýl reka (len') Xovar, i sys pe léste odój Ráskire-Devleskro vast.

⁴I me dykhcjom: ake, riskiribnaskiri balvál džálas paš — ratiatyr (sievierostyr), baró óbloko, i jag ĥazdelaspe dre léste, i davá ziainelaspe pašýl léste.

⁵A maškír saró sys sýrby dud (svéto) jagatyr maškirál: i maškír léste sys dykhné sýrby štar murdalá (žyvotna), i adiáke jone vydykhenas, a lengro muj sys, syr muj manušéste.

⁶Kažnonéste sys štar muiá, i kažnonéste léndyr sys štar phaká (kryly).

⁷Ĥerá lengre sys roŭna (vorta), a piré/podešvy (stupni) sys syr guruvoreste, i ziainenenaspe, syr žužakirdy (čysto) xarkóma (mied').

⁸A tel léngire phaká sys manušýtka vastá pir štar rigá, sarénde štarende sys muiá i phaká.

⁹Muiá lénde i vastá lénde — sarénde štarende pritasavenaspe jekh ke javír: kóli jone džánas, jone na obrisjonas, a giné, karik dykhélas léngiro muj.

¹⁰Dová, so zdžála pe muj léngiro, kažno sys dasavo sýrby manušéskiro muj i ščereskiro muj jekh rigátyr lénde sarénde. A javire rigátyr sys guruvoreskiro muj i orlóskiro (kidóskiro) muj lénde sarénde.

¹¹Muiá i phaká léngire upré sys roskerde, ne kažnonéste duj phaká pritasavenaspe jekh ke javír, a duj phaká učhakirenas léngire masá.

¹²I džánas jone, kažno dre doiá rig, saví sys angíl léskiro muj; karik kamelas te džal dúho (fáno), odorík jone džánas, a kóli džánas, to na obrisjonas.

¹³I vydykhenas dalé murdalá, syr xačkirdé vangara, syr momolia (sviečki) dre khangirí. Jag psirelas maškír lénde, i dud jagatyr, i bliskavica vydžálas jagatyr.

¹⁴Murdalá sýges psirenas angle i pale, syr bliskavica.

¹⁵Me dykhcjom pe dalé murdalénde: ake, pe phuv, pašýl lénde sys piró jekh rota angíl štar léngire muiá.

¹⁶Róty vydykhenas, i sys kerdé syr kuč bar topazo, saré štar vydykhenas, syr jekh, i sykavelaspe: syr jone vydykhenas, i syr jone sys kerdé, so isyn rota andré dre javír rota.

¹⁷Jone džánas pe péskire štar rigá, ne kóli jone džánas, to na obrisjonas.

¹⁸A léngire obody jone sys vučé i darane; sys pherdé jakhénca sarénde štarende.

¹⁹I kóli džánas murdalá, to džánas pašýl lénde róty, a kóli murdalá ĥazdenaspe phuvjátyr, tén'či ĥazdenaspe róty.

²⁰Karik kamelas dúho (fáno) te džal, odorík jone džánas, i jone karik by te na džal dúho (fáno), i róty ĥazdenaspe lénca, pal-dová so murdalengiro dúho sys dre róty.

²¹Kóli džánas murdalá (žyvotna), to džánas i róty; kóli murdalá sys terdé, sys terdé róty, a kóli murdalá ĥazdenaspe phuvjátyr, tén'či róty ĥazdenaspe lénca khetané, pal-dová so murdalegiro dúho (fáno) sys dre róty.

²²Uprál murdalengire šeré sys syr svódo pe bolybén, savó vydykhelas, syr darano bar kristalo. Jov sys rostyrdyno uprál léngire šeré.

²³A tel svódo pe bolybén sys léngire phaká, savé obrisjonas mamúj iekh ke javír. Kažnonéste sys duj phaká, savé učhakirenas len, kažnonéste duj phaká učhakirenas léngire masá.

²⁴I kóli jone džánas, me šunavas, syr šuminenas léngire phaká, kodová sys sýrby buté-panieskiro šumo, sýrby zan Sarezorjakireskiri, zoraló šuminyben, sýrby šuminyben dro xaladéngiro skedyibén; a kóli jone sys terdé, to jone zmekenas péskre phaká.

²⁵I sys zan svodostyr pe bolybén, savó sys uprál léngire šeré; kóli jone sys terdé, tén'či zmekenas péskire phaká.

²⁶A upré dolé svodostyr pe bolybén, savó sys uprál lengre šeré, sys sýrby trono, savó vydykhelas sýrby kuč bar sapfirostyr, a uprál pe štéto sys dová, so sys sýrby manúš pe léste.

²⁷I me dykhcjom sýrby xačkirdy xarkóma, sýrby jag, saví sys dre léste i pašýl léste, léskire trušulendyr, i léskire trušulendyr, i vučedýr, i teledýr dykhcjom me sýrby jag i ziainyben sys pašýl léste.

²⁸Syr vydykhela bangi (raduga) pe bolybén dro bryšyndeskiro dyvés, adiáke vydykhelas dasavo ziainyben, savó sys pašýl léste. Adiáke vydykhelas Ráskire-Devléskiri sláva.