Read Biblija - Pe Baltitko Romani čib (Romanes) 2019 Baltic Romani Bible Jezekiljo 11 Bible Online

Jezekiljo 11 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 11

¹I ĥazdyjá man Dúho (Fáno), i jandiá man ke vastočno pórta (vráty) dro Ráskire-Devléskiro Kher, savó sys čhudo pe vastóko. Ake, pašo zagiibén dro pórta sys biš te pandž manušá. Maškir lénde me dykhcjom Iiezanijas (Jazanijas), Azuroskire čhavés, i Faltijas, Vaniejoskire čhavés. Kadalé sys thagárja maškír manušénde.

²I phendiá Jov mánge: “Manušéskiro čhava! Ake, isyn manušá, savé priduminena čoripén, savé déna beda godypena (soviety) dro davá fóro.

³I rakiréna: Iščo dur. Javása te kerás kherá, jov isyn kakávi (kotlo), ame sam mas.

⁴Phen pe lénde angilphenybén, phen angilphenybén, Manušéskiro čhavó.”

⁵I zgija pe mánde Ráskire-Devléskiro Dúho (Fáno), i phendiá mánge: “Phen,’ adiáke rakiréla Raj Devél, Devél: ‘So da rakiréna tumé, Izrailjoskiro kher, pal-dová so me džinóm, so tuménde isyn pe godý.

⁶Tumé but počhude zamardé manušén dro davá fóro, i tumé pherdiakirde tumaré vulícy (gásy) zamardé manušénca.’

⁷Paldavá adiáke rakiréla Raj Devél, Devél: ‘Tumaré zamardé manušá, savén tumé čhudé, isyn masá, i kadavo fóro isyn kakávi, ne Me janáva tumen krig dalé-foróskire maškiralypnastyr.

⁸Tumé daréna kurtalátyr, ne Me janáva kurtála pe tuménde’, — rakiréla Raj Devél, Devél.

⁹‘I Me lydžáva krig tumen foróskire maškiralypnastyr i Me otdáva tumen dre vastá čužonengire, i Me keráva séndo pe tuménde.

¹⁰Tumé peréna kurtalátyr. Me javáva te sendiakirav tumen pe phuvjákiri miéža Izrailjoskiri. Tén'ci tumé ĥaljona, so Me som Raj Devél, Devél.

¹¹Jov na javéla butýr syr kakávi, i tumé na javéna butýr syr masá vaš léske, Me javáva te sendiakirav tumen pe miéža phuvjákiri dro Izrailjo.

¹²I tumé ĥaljona, so Me som Raj Devél, Devél, pal-dová so tumé na psirdé pir Miré statúty (ustavy), i tumé na kerdé pir Miré statutna uphenybená, ne tumé kerdé pir prisykliaibena, Najudytkoné nacyiengire, savé isyn pašýl tuménde.’”

¹³I kerdiápe adiáke, so syr me angilphenavas, to Faltija, čhavó Vanejaskiro, myjá. Tén'ci Me pyjom péskire mósa i dyjom gódla zoralés i phendjom: “O, Rajo Dévla! Naúšto Tu kamésa te muliakires manušéndyr ke kónco (jagóro)?”

¹⁴Nevéstyr sys ke me lav Rástyr-Devléstyr, savó phenelas:

¹⁵“Čhavó manušéskiro! Tre pšalénge, tre semencake, tre rodóske i saré kheréske Izrailjoskireske, sarénge, konéske phendlé džiibnáskire manušá dro Jerusalimo: ‘Durjon Rástyr-Devléstyr, kadaja phuv dyné aménge syr meknó mištypén.’

¹⁶Paldavá phen: Adiáke rakiréla Raj Devél, Devél: “Mek Me rosčhudjom te dživén len maškír Najudýtka nácyi, i mek Me piričhudjom len te dživén dre javír thema, ne Me usajékh javáva vaš lénge syr tyknó Svénto Štéto pe odolé phuvjá, karik jone giné.”

¹⁷Tén'ci phen adiáke: “Me skedáva tumen javire nacyiéndyr, Me janáva khetané tumen themendyr, ke savé Me rosčhudjom te dživén tumen, i Me dáva túke phuv Izrailjoskiri.’”

¹⁸“I jone javéna odój, i jone léna krig saré magirdé vieščy (čysy) i saré džungalé priedmiety.

¹⁹I Me dáva lénge jekh iló, i Me čhuváva nevó dúho (fáno) dre tuménde, i Me láva krig baruno iló tumaré ločatyr (plotiatyr), i Me dáva lénge iló ločatyr,

²⁰sob (kaj) jone te psirén pir Miré statúty, i te rikirenpe ke Miré uphenybená, i te kerén pir lénde i jone javéna Miré manušá, a Me javáva léngiro Devél.

²¹A kodolénge, saveskire ile tyrdenaspe pale magirdé i džungalé priedmiety, Me otdáva pale pal léngire réndy pe léngire šeré”, — rakiréla Raj Devél, Devél.

²²Tén'ci xieruvimy ĥazdyné péskire phaká (kryly), i róty sys pal lénde, i sláva Izrailjoskire-Devléskiri sys uprál vučé lénde.

²³I sláva Ráskire-Devléskiri gazdyjape foróskire maškiralypnastyr i terdijá pe bérga, so sys pe vastokoskiri rig dro fóro.

²⁴Tén'ci Dúho (Fáno) ĥazdyjá man i jandiá man ke Xaldeja dro dykhibén Devléskire Duhóstyr ke odolé manušá dro pliéno. I, ake, dykhibén, so me dykhcjom, gijá krig mándyr.

²⁵I adiáke me rosphendjom dykhibén kodolénge, kon sys dro pliéno, pal saré čačipená, so Raj Devél, Devél sykadiá mánge.