Read Biblija - Pe Baltitko Romani čib (Romanes) 2019 Baltic Romani Bible Jezekiljo 12 Bible Online

Jezekiljo 12 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 12

¹I sys ke me Ráskire-Devléskiro lav dasavo:

²“Manušéskiro čhava! Tu dživesa maškír odolénde, savé nikonés na kandéna. Isyn lénde jakhá, sob (kaj) te dykhén, ne jone na dykhéna; isyn lénde kaná, sob (kaj) te šunén, ne jone na šunéna, pal-dová so jone isyn kher, kaj na kandéna nikonés.

³A tu, manušéskiro čhava, ker péske dová, so trej vaš piritradypen, i piritrade dyvesé angíl léngire jakhá. Piritrade jekhe štetóstyr pe javír štéto angíl léngire jakhá, sob (kaj) jone te ĥaljon. Ne jone isyn kher, kaj na kandéna nikonés.

⁴I vylydža tyró mištypén syr dová, so trej vaš piritradypen, dyvesé, angíl lengre jakhá, i kokoró vydža bel'velié angíl léngire jakhá, syr vydžána manušá, kóli tradéna dre navolia.

⁵Angíl lengre jakhá phagir vygiiben dre vánta, i lýdža tro mištypén pir davá prophagiriben.

⁶Angíl léngire jakhá le mištypén pe psikó, lýdža krig les ratý, zaker tyró muj, sob (kaj) te na dykhés phuv, doléstyr, so Me čhudjom tut ĥiertykasa Izrailjoskire kheréske pal bída.”

⁷Me kerdjom, syr Jov priphendiá mánge. Vylydžyjom dyvesé miro mištypén, syr dová, so trej vaš piritradypen, a bel'velié syr kaljola, Me prophagirdjom péske vastésa vygiiben dre vánta, vylydžijom mištypén ratý i ĥazdyjom les pe psikó angíl lengre jakhá.

⁸I sys ke me Ráskire-Devléskiro lav pe zlóko (pe ránko):

⁹“Manušéskiro čhava! Na rakirlas li túke Izrailjoskiro kher, kher, kaj nikonés na kandéna: ‘So tu kerésa?’

¹⁰Phen lénge: ‘Adiáke rakirél Raj Devél, Devél: “Kadavá isyn angilphenybén pal pharipén ráske dro Jerusalimo i vaš saró Izrailjoskiro kher, savó isyn odój.

¹¹Phen: ‘Me som ĥiertýk vaš tuménge. So me keráva, kadavá javéla lénca. Javéna te tradén len dre navolia’.

¹²I thagári, savó isyn maškír lénde, léla angíl syr kaljola léskiro mištypén pe psikó i džála krig. Prophagirena vánta, sob (kaj) jov te vydžál odothýr; jov zakerela peskro muj adiáke, sob (kaj) te na dykhél adáia phuv jakhénca.

¹³I Me čhurdava pe léste Mirí khudý (sietka), i uhtylava les feliasa, i lydžáva les ke Vavilóno, pe Xaldiejengiri phuv. Ne jov, thagári na dykhéla la, i meréla odój.

¹⁴A sarén, savé isyn lésa, i kodolén, savé podrikirenas les i leskre xaladén, Me rostradava pir saré balvalia, i Me ĥazdáva kurtála pal lénde.

¹⁵I jone ĥaljona, so Me som Raj Devél, Devél, kóli Me rosčhuvava te dživén len ke javír narody i rostradava len pir phuvjá.

¹⁶Ne nábut manušén léndyr Me zrakháva kurtalátyr, bokhátyr i fransendyr, sob (kaj) jone te rosphenén Najudytkoné manušénge, ke savé jone javéna, vaš saré péskire nalačhipena, tén'či jone ĥaljona, so Me som Raj Devél, Devél.”

¹⁷I sys ke me Ráskire-Devléskiro lav dasavo:

¹⁸“Manušéskiro čhava! Xa tyró maró darása, pi tyró paní te izdras, i mek te javél túke pharó pe iló.

¹⁹I phen manušénge pe phuv: “Adiáke rakiréla Raj Devél, Devél vaš Jerusalimóskire manušénge, vaš Izrailjoskiri phuv: ‘Jone javéna te xan peskro maró jasvénca, javéna te p'jen peskro paní pharé trašasa, pir dová, so na javéla butýr pe phuv barvalypén pal manušéngiro načačipén, savé dživénas pe láte.

²⁰Tén'ci rosphagirena fórja, i phuv javéla čhučí, i jone ĥaljona, so Me som Raj Devél, Devél”

²¹I sys ke me Ráskire-Devléskiro lav dasavo:

²²“Manušéskiro čhava! So za phenybnytko lav rakiréna tumé, pe Izrailjoskiri phuv: ‘Prodžána (nakhena) but dyvesá i xasjola angilphenybnaskiro dykhibén?’

²³Paldavá phen lénge: ‘Adiáke rakiréla Raj Devél, Devél: Me xasiakiráva dalé lavá, butýr na javéna te rakirén dasavé lavénca dre Izrailjo. Phen lénge: ‘Javéna syg dyvesá i pherdiakirelape kažno angilphenybnaskiro dykhibén.”

²⁴Na jačélape ivjá (naprásnes) nisavó angilphenybnaskiro dykhibén; na javéla xohanó nisavó angilphenybén dro Izrailjoskiro kher.

²⁵Pal-dová so Me som Raj Devél, Devél, Me rakiráva, i pherdiakirelape lav, savó Me rakiráva, i Me na paruvava les. Dre tumaré dyvesá, tumé san kher, kaj na kandéna nikonés, Me phendjom lav i Me keráva, so Me kamám”, — rakiréla Raj Devél, Devél.’”

²⁶Nevéstyr sys ke me Ráskire-Devléskiro lav, so rakirélas:

²⁷“Manušéskiro čhava! Ake, Izrai-ljoskiro kher rakiréla: ‘Angilphenybnaskiro lav, savó jov dykhciá, pherdiakirelape (spolninelape), kóli prodžána but dyvesá adadyvesestyr; jov rakiréla vaš anglypén.’

²⁸Paldavá phen lénge: ‘Adiáke rakiréla Raj Devél, Devél: nijékh Miré lavéndyr na javéla parudo butýr, ne lav, savó Me phenáva, pherdiakirelape,” — rakiréla Raj Devél, Devél.