Read Biblija - Pe Baltitko Romani čib (Romanes) 2019 Baltic Romani Bible Jezekiljo 14 Bible Online

Jezekiljo 14 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 14

¹I javné ke me vari-kicý manušá Izrailjoskire phurydyrendyr, i sys bešté angíl mánde.

²I sys ke me Ráskire-Devléskiro lav dasavo:

³“Manušéskiro čhava! Adalé manušá mekné péskre kerdé devloré (ídoly) dre péskre ile, čhudé péskire kerdé devloré angíl péste: syr že saštý (moginen) jone Mándyr te phučén?

⁴Paldavá rákir lénca i phen lénge: ‘Adiáke rakiréla Raj Devél, Devél: kóli vari-kon Izrailjoskire kheréstyr domekela péskre kerdé devloré (ídoly) dro peskro iló, i čhuvéla péskre kerdé devloré angíl léste te obštavelpe i jov javéla ke proróko, to cji, phenáva li Me, Raj Devél, Devél, léske, kóli isyn but léste leskre kerdé devloré?

⁵Mek te ĥaljon Izrailjoskiro kher dre péskiro iló, so pal saré jone péskre kerdé devloré kerdépe jone čúža vaš Mánge.’

⁶Paldavá phen Izrailjoskire kheréske: “Adiáke rakiréla Raj Devél, Devél: ‘Risjon ke Devél risjon krig tumaré kerdé devlorendyr, riskirén tumaré muiá saré tumaré džungalypnastyr (brytkimatyr)!

⁷Kóli vari — kon Izrailjoskire kheréstyr i čužoné manušéndyr i, savé dživéna dro Izrailjo, durjola kokoró Mándyr, i domekela péskre kerdé devloré dro péskiro iló, i čhuvéla péskre kerdé devloré angíl péskiro muj i javéla ke proróko te phučelpe léstyr pal Mánde, to Me, Raj Devél, Devél, otphenava léske?

⁸Me risjováva Miré mósa pe odolé manušéste, Me keráva adalé manušésa adiáke, sob (kaj) javír manušá te dykhén, i te rakirén, Me zalava les Miré manušéndyr, Izrailjostyr, i Me tedy tumé ĥaljona, so Me som Raj Devél, Devél.

⁹A kóli proróko domekela te xohavél pes, i phenéla lav adiáke, sýrby Me, Raj Devél, Devél, vysykliakirdjom les, to Me protyrdava pe léste Miro vast, xasiakiráva les Miré manušéndyr, Izrailjostyr.

¹⁰I jone léna pharó sendiakiriben pal péskre čoripena: savó bangó javéla dová, so phučela, kadasavó bangó javéla i proróko,

¹¹sob (kaj) te na durjol butýr Izrailjoskiro kher Mándyr, i te na kerén pes magirdesa péskre čoripnástyr, ne, sob (kaj) te javén jone Miré manušá, i sob (kaj) Me te javav Léngiro Raj Devél, Devél.’”

¹²I sys ke me Ráskire-Devléskiro lav:

¹³“Manušéskiro čhava! Kóli vari-saví phuv te kerél gréhi angíl Mánde, i te javél usá napatiaibnytko ke Me, to Me protyrdyjomas pe léste Miro vast, Me zalyjom by léstyr saró maró, savó déla džiibén, Me bičhadjom pe léste bokh i lyjom te xasiakiráv pe léste manušén i kheritkoné murdalén.

¹⁴Kóli b te lathenpe pe doiá phuv dalé trin manušá: Nojo, Danila i Ióvo, to jone féni (tóka) péskre sventoné džiibnasa, to rakhenas by peskro di i butýr ničí”, — rakiréla Raj Devél, Devél.

¹⁵Ci, kóli b Me bičhadjom pe daja phuv zahale murdalén te prodžan pir láte, savé zalenas by látyr (phuvjátyr) čhavorén, i te kerélpe daja phuv murdaléndyr čhučí (pusto), i nijékh te na prodžal pir daja phuv pal zahale murdalénde.

¹⁶Kadalé trin manušá te javén maškír láte, — te dživáv Me, — rakiréla Raj Devél, Devél, to na zrakhenas jone ni péskre čhavén, ni péskre čhajén, a jone, trindžine jone, zrakhenaspe, ne phuv javélas čhučí.

¹⁷Ci, kóli Me te janav kurtála pe daja phuv i te phenáv: “Kurtála, prodža pir phuv!” I lyjom te xasiakiráv manušén i murdalén,

¹⁸to kadalé trin manušá maškír te javén te láte, — te dživáv Me — rakiréla Raj Devél, Devél na zrakhné by ni péskre čhavén, ni péskre čhajén, a jone féni trindžine zrakhnepe.

¹⁹Kóli Me te bičhavav pe doiá phuv meribnytka fránsy, i te vyčhuvav pe láte Miro xoliamipen te čhuvelpe dro rat, sob (kaj) te xasiakiráv pe phuv manušén i kheritkoné murdalén (skoto),

²⁰to až Nojo, Danijéljo i Ióvo te javén pe láte, — te dživáv Me, — rakiréla Raj Devél, Devél, — to te na zrakhenas ni péskre čhavén, ni péskre čhajén; ne péskre sventoné džiibnasa jone féni zrakhenas by trindžine peskro di.’

²¹Adiáke rakiréla Raj Devél, Devél: kóli štar pharé bidy Miré: kurtála, bokh, zahale riskiribnáskire murdalá (zvieri), meribnytka fránsy te bičhavav Me pe Jerusalimo, sob (kaj) te xasiakiráv dre léste manušén i murdalén,

²²I tén'či jačénape dre léste manušá, čhavé i čhaja, konés vylydžana odothýr. Ake, jone vydžána ke tumé, tumé dykhéna, so jone keréna i, savé isyn léngire réndy, i tumé bistrena pal doiá bibáht, saví Me jandjom pe Jerusalimo, pal saró, so Me jandjom pe léste.

²³Jone keréna adiáke, so tumé bistrena pal bibáht, kóli dykhéna, so jone keréna i, savé isyn léngire réndy. I ĥaljona, so Me na ivjá (naprásnes) kerdjom saró dová, so Me kerdjom dro Jerusalimo”, — rakiréla Raj Devél, Devél.