Read Biblija - Pe Baltitko Romani čib (Romanes) 2019 Baltic Romani Bible Jezekiljo 16 Bible Online

Jezekiljo 16 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 16

¹I sys ke me Ráskire-Devléskiro lav dasavo:

²“Manušéskiro čhava! Rosphen Jerusalimoske pal saré leskre džungalé réndy (diély).

³“Phen: ‘Adiáke rakiréla Raj Devél, Devél, Jerusalimóskire patyvalé čhake: tyró ródo i tyré dadéskiro kher isyn pe Xanaanóskiri phuv; tyró dad isyn Amoriejo, tyrí daj isyn Xietejanka.

⁴Kóli te phenas pal tyró bijanypén, dro dyvés, kiéli tu bijandyjan, túte na otčingerenas pupko (buryk). Paniésa tu na sánas vymordy vaš žužakiriben; londesa tu na sánas londiakirdy, phernenca tu na sánas pat'kirdy.

⁵Nikón na sykadiá iló ke tu, sob (kaj) tangipnastyr ke tu te kerél túke vari-so daléstyr, ne tu sánas vyčhurdyny pe čhučí (pusto) félda, pal-dová so tu nikonéske na sánas trej, dro dyvés, kiéli tu bijandyjan.

⁶A kiéli Me džavas pašýl odój, kaj sánas tu, dykhcjom tut, so tu san vyčhurdyny, so tu sánas dro tyró rat, i phendjom túke: “Dživ dro tyró rat!” Adiáke me phendjom: “Dživ dro tyró rat.”

⁷Me ubarjakirdjom tut, Izrailjo adiáke but, syr but isyn feldýtka čarjá. Tu vybarijan, jacián bari, jacián drieván šukár baré čhasa, balá túte vybarine, ne tu sánas nangi, naučhakirdy.

⁸Te prodžavas Me odój, kaj tu sánas, i Me udykhavas tut. Ake, davá sys tyró časo, kamlypnaskiro časo. Lyjom Me Miré uribená, učhakirdjom tyró nangipén; dyjom sovél túke, kerdjom dorakiribén túsa, — rakiréla Raj Devél, Devél, — tu jacián Mirí.

⁹Tén'ci vymordjom Me tut paniésa, mordjom Tútyr tyró rat, Me makhcjom tut olivitkone dzetesa (jeliejosa).

¹⁰Me uridjom pe túte vysudy ídia; Me dyjom túke candali bobritkone cypatyr, obphandjom tut pohtanesa, Me učhakirdjom tut pharune dykhlesa.

¹¹I iščo (inké) uridjom Me tut dro uribená šukarjakiribnasa, čhudjom pe tyré vastá kore (vastytka), a pe tyrí men-miriklia [zandirori-ju.o.].

¹²I čhudjom Me túke angrusty ke dro tyró nakh, čenia dre tyré kaná, a pe tyró šeró — šukár koróna.

¹³Adiáke sánas tu šukarjakirdy dre rup i suvnakái; tyró uribén sys kedyno pohtan, phar, rossude thana. Tu xajan maró kučoné jaržestyr, agvin i olivítko dzet, te sánas drieván šukár, tu jacián usá fedýr syr thagarica.

¹⁴I rozgijápe pir Najudytkoné manušénde bari malva pal tyró šukaripén, pal-dová so jov sys pherdó dro dová šukár uribén, dro savó Me uridjom tut”, — rakiréla Raj Devél, Devél.

¹⁵‘Ne tu drieván patiandyjan dro tyró šukaripén, tu jacián biladžakuny i paruvesas kažnonesa, kon džála pašýl odój, kaj tu sánas, i otdesas patýv léske.

¹⁶Tu adiáke-pac' lyjan tyré uribnendyr, šukarjakirdian péske rázna cviatna vučé štéty, tu keresas biladžaipén pe lénde adiáke, so nikoli butýr na kerlape, i na javéla.

¹⁷I tu lyjan tyré ukedybena Miré suvnakástyr i Miré rupéstyr, savé Me dyjom Túke, tu kerdián péske figury sýrby muršén, i kerdián biladžaipén lénca.

¹⁸Tu lyjan tyré rossude uribená, i tu uridian len pe lénde, tu čhuvesas angíl lénde Miro olivítko dzet (jeliejo) i drogoné-smolakiro thuvipen.

¹⁹“I Miro xabén, savó Me davas túke, i maró kučoné jaržestyr i olivkitko dzet, i avgín (meda), savénca Me čaliakiravas tut, tu čhuvesas angíl lénde, sob (kaj) te javél gudló thuvipen, i davá sys,’” — rakiréla Raj Devél, Devél.

²⁰Tu lyjan tre čhavien, tre čhajén, savén tu bijandian Mánge, i tu otdesas len vaš svénto dyibén (žértva), sob (kaj) jone, ídoly, te xan. Ci na uhtýlla (nádosi) li túke te kerés biladžaipén?

²¹Ne tu i Miré čhavén muliakiresas i janesas len lénge, kiéli tu prolydžasas len maškír jag.

²²I kóli keresas saré tyré džungalypena i biladžakuné réndy, tu na ripirdian tyré terné beršá, kiéli tu sánas nangi, naučhakirdy i čhurdyny dro tyró rat.

²³Kóli prodžanas saré tyré beda réndy — ‘Bida, bída túke!’ — rakiréla Raj Devél, Devél,

²⁴tu kerdián péske mangipnytko štéto, i kerdián péske vučé štéty pe kažno gása [foruný/plóšča-r.s.],

²⁵pašýl zagiibén pe kažno drom tu kerdián péske vučé štéty, i tu ladžakiresas tyró šukaripén. Tu na sánas patiaibnýtko tre romeske kažnonesa, kon by te na prodžalas, inké (iščo) butýr keresas tyré biladžakuné réndy.

²⁶Tu adiáke-pac' keresas biladžaipén Jegiptóskire čhavénca, savé dživénas pašýl túte, drieván vučé manušénca, iščo (inké) butýr keresas tyró napatiaiben, i xoliakiresas Man.

²⁷Ake, paldavá Me protyrdyjom pe túte Miro Vast, tykniakirdjom kotér doléstyr, so sys tyró, otdyjom Filistimijákire čhajenge, savé bidykhenas tut, savé ladžanas doléstyr, so tu kerdián, sob (kaj) te kerén jone túsa dová, so kaména.

²⁸Tu adiáke-pac' kerdián ladžaipén Asuroskire čhavénca, ne tu na čalyjan, čačes tu keresas ladžaipén lénca, i na uhtyllas (nádosi) túke davá.

²⁹Tu butýr keresas tyró ladžaipén pe Xanaanoskiro phuv ke Xaldeja i, dykh ža, na uhtyllas (nádosi) túke.

³⁰Syr khinija, ĥaljov, tyró iló, — rakiréla Raj Devél, Devél, kóli tu keresas saré kadalé réndy (diély), syr biladžakiri manušny, savjá nane konéske te štyliakirel!

³¹Kóli tu keresas péske mangipnytka štéty vaš tyré biladžakire réndy pašýl zagiibén pe kažno drom, keresas péske vučé štéty pe kažno vulíca (gása). Ne tu na sánas tén'či biladžakuné džuvliása, pal-dová so tu na kamdian te priles pleskiriben.

³²A tu san, syr džuvlý, saví nane patiaibnýtko romeske, saví rodéla na péskre romes, a čužoné manušén.

³³Sarénge biladžakuné džuvlienge muršá déna počastúnki (lovore), a tu kokori desas počastúnki saré tyré kamlenge, tu podkinesas len, sob (kaj), jone saré rigéndyr te javén te kerén biladžaipén túsa.

³⁴Túte dre tyré biladžakuné réndy na sys dasavo, so isyn javire džuvliende: na pal túte prastanas, a tu desas počastúnki (lovore), a túke nijékh na délas počastúnki, paldavá tu keresas na adiáke, syr javír.

³⁵Paldavá vyšún, biladžakuny džuvlije, Ráskire-Devléskiro lav!

³⁶Adiáke rakiréla Raj Devél, Devél: ‘Pal dová, so tu adiáke čhurdesas tyré lové i dre tyré biladžakuné réndy, sys otkerdo tyró nangipén angíl tyré kamlytkonende, angíl saré tyré nalačhé ídoly, i pal tyré-čhavéngiro rat, savén tu otdesas lénge,

³⁷paldavá, ake, Me skedáva saré tyré kamlytkonen, savén tu kamesas i sarén odolén, savén tu drieván na kamesas. Me kedava len saré rigéndyr pe túte, i Me otkerava angíl lénde tyró nangipén, sob (kaj) jone te dykhén sarí tyrí ladž.

³⁸I Me javáva te sendiakirav pharés tut sendosa, savésa sendiakirena kodolén, savé paruvena péskire romeske; sendosa, savésa sendiakirena kodolén, kon pročhuvela manušéngiro rat, Me otdáva tut pale zoralé xolynasa i zevlynypnasa.

³⁹Me otdáva tut dre léngire vastá, jone rosphagirena mangipnytka štéty vaš tyré biladžakuné réndy, jone rosphagirena tyré vučé štéty, riskirena krig tútyr tyró uribén, jone léna tyró šukarjakiriben, jone jačavena tut i tu javésa nangi, naučhakirdy.

⁴⁰Jone adiáke-pac' kharéna pe túte skedyibén, jone domarena tut barénca, i rosčingirena tut péskire kurtalenca.

⁴¹I jone xačkirena sarésa tyré kherá jagása, javéna te sendiakiren tut angíl buté-džuvlengire jakhá. Me keráva adiáke, so tu na javésa te kerés butýr tyré biladžakuné réndy, i tu na javésa duredýr te des počastúnki.

⁴²Adiáke Me pirijačava te xoliasovav drieván pe túte, i otdžala tútyr Miro zevlynypén, i Me pirijačava te xoliasovav.

⁴³Pal dová so tu na priripirdian pal tyré terné beršá, ne xoliakiresas Man sarésa kadalesa, ake, Me otdáva túke pir tyré dromá pe tro šeró, — rakiréla Raj Devél, Devél sob (kaj) tu te na keresas butýr saré Tyré biladžakuné réndy, kiéli proginé (nakhle) saré Tyré džungalypena (brytkimy).

⁴⁴Ake, kažno (sváko), kon rakiréla pritčenca (primierenca), phenéla pal túte: “Saví isyn daj, adasavi isyn čhaj!”

⁴⁵Tu san dasaví, syr tyrí daj, saví čhurdyjá péskire romes i péskire čhavorén, — tu san tyré-pheniengiri phen, a tyrja pheniá čhurdyné péskire romen i péskire čhavorén. Tumarí daj isyn Xietejanka, tumaró dad isyn Amoriejo.

⁴⁶Phuredýr tyrí phen — Samárija, saví dživéla péskire čhajenca pe zérvo (liévo) rig tútyr, a tyknedýr isyn tyrí phen, saví dživéla pe čačí (pravo) rig tútyr, saví isyn Sodómo lákire čhajenca.

⁴⁷Ne tu na psiresas léngire droménca, i tu na keresas léngire džungalypena, nad, odová sys sýrby nábut, ne túte tre biladžakuné réndy pe saré tyré dromá isyn butedýr léndyr.

⁴⁸‘Te dživáv Me!’ — rakiréla Raj Devél, Devél tyrí phen lákire čhajenca na kerélas dová, so kerénas tu i tyré čhaja.

⁴⁹Ake, savó isyn Sodomoskiro čoripén, tyré-pheniakiro i lákire-čhajengiro bedypen: joj sys phut'kirdy, joj xalas na dre péste, na kamelas te kerél nisaví butý; joj na podrikirelas čororé-manušéskiro vast ci kodolés, savó sys dre trébima.

⁵⁰I jačné jone te zadenpe, i kerdé džungalypén angíl Mánde. Me dykhcjom kadavá i gijom léndyr.

⁵¹Samárija na kerdiá paš adákicy gréhi, kicý tu kerdián; tu butedýr léndyr lyjan te kerés džungalypén; tyré džungalé rendéndyr, savé tu keresas, tyré pheniá vyginé čačunedyr tútyr.

⁵²Lýdža tyrí ladž, tu, saví obsendiakiresas péskire phenien. Tu ladžakirdian pes tyré džungalypnasa butýr léndyr, jone isyn čačunedyr tútyr. Jav loly adiáke-pac' ladžatyr, lýdža tyrí ladž, tu kerdián tyré phenien čačunedyr tútyr.

⁵³Me keráva adiáke, so risjona manušá léngire plienóstyr, Sodomóskire i lákire-čhajengiro pliéno, a maškír lénde Me riskiráva odolengiro pliéno, konés tu zauhtyldian dro pliéno,

⁵⁴sob (kaj) tu te lydžas tyrí ladž, te ladžas patýv saréstyr odoléstyr, so tu kerdián, sob (kaj) te javes podrikiribnasa vaš lénge.

⁵⁵Tyré pheniá, Sodómo [Sodóma-r.s.] i lákire čhaja, javéna adasavé, savé sys angledýr; Samárija i lákire čhaja javéna adasavé, savé sys angledýr; i tu i tyré čhaja javéna adasavé, savé sys angledýr.

⁵⁶Pal tyré pheniate Sodomate tu na priripiresas dre kodolé dyvesá, kiéli sánas drieván phut'kirdy.

⁵⁷“Kóli na sys iščo (inké) otkerdo tyró načačipén, syr dro časo, kiéli lyjan tu ladž Sirijakire čhajendyr i saréndyr, kon dživelas pašýl láte, Filistimijákire čhajendyr, savé obsendiakiribnasa dykhenas pe túte saré rigéndyr.

⁵⁸Pal tyré biladžakirde réndy, pal tyré džungalypena (brytkimy) tu doresesa’”, — rakirél Raj Devél, Devél.

⁵⁹Adiáke rakiréla Raj Devél, Devél: “Me keráva túsa, syr kerdián tu: na zrikirdian sovél, rosphagirdian dorakiribén.

⁶⁰Ne Me priripirava Miro dorakiribén túsa, savó Me čhudjom dre tyré terné beršá; iščo (inké) keráva Me viéčno dorakiribén (sojuzo) túsa.

⁶¹A tu priripiresa pal tyré dromá, i jačéla ladžavo túke, kóli javésa te priles ke péskire pheniá phuredýr tútyr i tyknedýr tútyr, kóli Me javáva te dav len dre čhaja túke, ne na tyré dorakiribnastyr.

⁶²Me ĥazdáva Miro dorakiribén túsa, tu dykhésa, so Me som Raj Devél, Devél,

⁶³sob (kaj) tu te ripires i te ladžas, sob (kaj) naštý sys túke lav te phenés ladžatyr, kóli Me otmekáva túke saró, so tu kerdián”, — rakiréla Raj Devél, Devél.