Read Biblija - Pe Baltitko Romani čib (Romanes) 2019 Baltic Romani Bible Jezekiljo 17 Bible Online

Jezekiljo 17 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 17

¹I sys ke me Ráskire-Devléskiro lav dasavo:

²“Manušéskiro čhava! De, sob (kaj) jone šeré te phagiren i phen pritča Izrailjoskire kheréske.

³Phen: ‘Adiáke rakiréla Raj Devél, Devél: “Baró órlo (kído), baré phakenca, dlugone porenca, šukár, cviatno, priurniandyja pe Liváno, i zlyjá upralypén kiedrytkone kaštéstyr.

⁴Čhindiá upratuny rand' (vetka) léskire terné vetkendyr, jandiá la pe Xanaanóskiri phuv, čhudiá la dro timisiar'jengiro fóro.

⁵I lyjá kadalé-phuvjákire ziarkatyr, i čhurdyjá pe ziarkakiri phuv, pašýl baró paní, syr barjakirena ivakiro kašt.

⁶Joj vybarija, kerdiápe vinagradoskire kaštesa, buĥlesa, navučesa. Lákire randiá (vétki) zmekenaspe ke jov, telo léste sys lákire kórni (rukhá); jaciá vinagradoskire kaštesa, lyjá te barjol, mektia vétki.

⁷I iščo (inké) sys órlo (kído) baré phakenca i porenca. Ake, kadavá vinagradoskiro kašt potyrdyjape ke jov péskire korniénca, protyrdyjá ke jov péskire vétki, sob (kaj) joj te počhuvel les paniésa.

⁸Kašt barjolas pe lačhí félda, pašýl baró paní, adiáke, so moginelas te mekel vétki i te janel barjakirdó (plódo), i te kerélpe šukarone kaštesa.”

⁹Phen: ‘Adiáke rakiréla Raj Devél, Devél: “Javéla li léske baht? Na vyčhinena li léskire kórni (rukhá), na občhinena li léskire baritka (plódy) adiáke, so kašt zašutjola? Saré terné vétki, savé vybarine léstyr, zašutjona. I ci na baredýr zorjása, ci na butedýr manušénca sčhinena les léskire kornjostyr.

¹⁰I, ake, čhudo dre phuv kašt, ne javéla li baht léske? Na zašutjola li jov, kóli čilavéla les vastočno balvál? Ci na zašutjola dre únta (sado), kaj vybarija.”

¹¹I sys ke me Ráskire-Devléskiro lav dasavo:

¹²“Phen kheréske, kaj nikonés na kandéna: ‘Na džinéna xaj, so isyn davá?’ Phen: Ake, javdiá Vavilonóskiro králi dro Jerusalimo, lyjá léskire kralís i léskire ran, jandiá len ke pe dro Vavilóno.

¹³I Jov lyjá javire semencas kralitkone rodóstyr, zagijá lésa dro dorakiribén, phendiá, sob (kaj) javír te del léske sovél, lyjá pésa zoralen dolé phuvjátyr,

¹⁴sob (kaj) te kandel les kralipén, sob (kaj) te na ĥazdelpe, sob (kaj) te zrakhelpe dorakiribén, sob (kaj) te terdjol jov tvardes.

¹⁵Ne kodová (Judejákiro králi) ugija léstyr, bičhadiá péskire poslen dro Jegípto, sob (kaj) te den léske but gren i but manušén. Ci javéla léske baht? Vydživela, xaj, kodová, kon kerél davá? Jov phagirdiá dorakiribén, zrakhélape li jov?

¹⁶‘Te dživáv Me’, — rakiréla Raj Devél, Devél. “Pe štéto, kaj dživéla králi, savó čhudiá les (Judejákire kralís) kralísa, a jov na zrikirdia sovél, saví dyjá kralíske, rosphagirdiá péskiro dorakiribén lésa, jov meréla léste ke Vavilóno.

¹⁷Baré zorjása, buté manušénca faraóno ničí na keréla vaš léske dro davá maribén, kóli ĥazdénape vérgi, sob (kaj) te xasiakirén but manušén.

¹⁸Jov na zrikirdia sovél, sob (kaj) te rosphagirel dorakiribén. Ake, jov dyjá péskiro vast, kerdiá saró davá; jov na zrakhélape.”

¹⁹Paldavá adiáke rakirél Raj Devél, Devél: ‘Te dživáv Me!’ Mirí sovél, saví jov na zrikirdia i Miro dorakiribén, savó jov rosphagirdiá, Me riskiráva pe léskiro šeró.

²⁰Me čhurdava pe léste Mirí khudý (siet'), jov javéla uhtyldo pir Mánde; Me janáva les dro Vavilóno; javáva te sendiakiravpe lésa pal dová, so jov xohadia Man.

²¹A saré léskire manušá, savé našéna saré léskire xaladéngire skedybnendyr, peréna kurtalátyr, a kodolé, savé jačénape, javéna rosphurdyne pir saré balvalia i ĥaljona, so Me, Raj Devél, Devél, phendjom davá.”

²²Adiáke rakirél Raj Devél, Devél: “Lavá Me rand' (vetka) vučé kiedroskire upralypnastyr, Me čhuváva la dre phuv. Léskire upratune vetkendyr Me otčhinava terný vetka, čhuváva la dre phuv pe vučí i šukár bérga.

²³Pe vučí Izrailjoskiri bérga Me čhuváva la dre phuv, i Joj mekéla vétki, i janéla barjakirdó (plódo), i kerlape baré kiedroskire kaštesa; javéna te dživén tel léste čirikliá; čirikliá porenca javéna te dživén tel léskire vétki.

²⁴I ĥaljona saré feldýtka kaštá, so Me, Raj Devél, Devél, vučó kašt teliakirava, a navučo kašt Me keráva upredyr; zeleno kašt keráva šuké kaštesa, a šuko kašt keráva kaštesa cvetenca. Me, Raj Devél, Devél, phendjom i keráva.”