Read Biblija - Pe Baltitko Romani čib (Romanes) 2019 Baltic Romani Bible Jezekiljo 2 Bible Online

Jezekiljo 2 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 2

¹Kóli me dykhcjom davá, to me pyjom pe péskiro muj i šundjom Odoleskiri zan (glos), Savó rakirdiá mánca. Jov phendiá mánge: “Manušéskiro čhava! Uštý pe tyré ĥerá, Me javáva te rakiráv túsa.”

²A kóli Jov rakirélas, to zagijá dre mánde Dúho (Fáno) i čhudiá man pe miré ĥerá, i me šundjom Odolés, Savó rakirélas mánca.

³Jov phendiá mánge: “Manušéskiro čhava! Me bičhaváva tut ke Izrailjoskire čhavé, ke manušá, savé nikonés na kandéna, savé ĥazdynépe pe Mánde. Jone i léngire dadá otginé Mándyr ke/ žýko adadyvés.

⁴Adalé čhavé isyn biladžakirde mósa i zahale ilésa; Me bičhaváva tut ke jone, a tu phenésa lénge: “Adiáke rakiréla Raj Devél, Devél!

⁵Javéna jone te šunén ci na javéna, pal-dová so jone isyn buntuítka manušá, — ne, sob (kaj) jone te džinén, so maškír lénde sys proróko.

⁶A tu, Manušéskiro čhavó, na dar léndyr, i na dar lengre lavéndyr, kóli jone javéna vaš túke nalačhé čarjasa (phusadytkone drevicosa) i žyltone phusadytkone xrustenca, kiéli tu javésa te dživés maškír lénde (syr maškír skorpionende). Na dar lengre lavéndyr, na dar lengre móstyr, pal-dová so jone isyn kher, kaj nikonés na kandéna.

⁷Rákir lénge Miré lavá, javéna jone te šunén, ci na javéna, pal-dová, so jone isyn kher, kaj nikonés na kandéna.

⁸A tu, Manušéskiro čhavó, šun, so Me javáva te rakiráv túke: na jav dasavo narto (upriamo), syr davá Kher, kaj nikonés na kandéna, otker péskre uštá, i xa, so Me dáva túke.”

⁹Me dykhcjom: ake, isyn protyrdyno vast ke me, a dre vast sys lylvarí (svítko).

¹⁰I Jov otkerdia la angíl mánde, i sys lylvarí začhindly angle i pale, i sys začhindló dre lylvarí: “Roviben, i tugipen jasvénca, i bibáht.”