Read Biblija - Pe Baltitko Romani čib (Romanes) 2019 Baltic Romani Bible Jezekiljo 20 Bible Online

Jezekiljo 20 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 20

¹Dro eftáto berš (bitrinéngiro déšto), dro pándžto čhon, pe déšto čhonytko dyvés, javné muršá Izrailjoskire phurydyrendyr te phučén Rástyr-Devléstyr. Jone sys bešté angíl miré jakhá.

²I sys ke me Ráskire-Devléskiro lav dasavo:

³“Manušéskiro čhava! Rákir Izrailjoskire phurydyrenca, phen lénge: ‘Adiáke rakiréla Raj Devél, Devél: ‘Tumé javné te phučén Mándyr? Te dživáv Me, na phenáva tuménge ničí’, — rakiréla Raj Devél, Devél.

⁴Ci kamésa tu te sendiakirespe lénca, ci kamésa te sendiakirespe, Manušéskiro čhavó? Rosphen lénge pal saró džungalypén (sarí brytkima), saví kerénas léngire dadá.

⁵Phen lénge: ‘Adiáke rakiréla Raj Devél, Devél: ‘Pe kodová dyvés, kóli Me vykedyjom Izrailjo, ĥazdyjom Miro vast te sovlahav pe kherítko ródo Jakovóskire kheréstyr, Me otkerdjom lénge Pes pe Jegipietóskiri phuv, ĥazdyjom Miro vast i phendjom lénge: ‘Me som tumaró Raj Devél, Devél.’

⁶Pe kodová dyvés Me ĥazdyjom Miro vast te sovlahav lénge, so Me lydžáva krig len Jegiptóskire phuvjátyr pe phuv, saví Me vydykcjom vaš lénge, pe doiá phuv, kaj čhuvenape thud i javgin (meda), sar'jengire-phuv'jengiro šukariben.

⁷I phendjom Me lénge: ‘Mek kažno (sváko) tuméndyr te čhurdel krig péstyr saró džungalypén péskire jakhéndyr, sob (kaj) te na magirén pes Jegiptóskire idolenca, Me som tumaró Raj Devél, Devél.’

⁸Ne jone ĥazdynépe pe Mánde, jone na kamenas te kandén Man, nikón na otčhurdyja džungalé ídoly péskire jakhéndyr, nijékh na mekciá Jegiptóskire ídoly. I Me phendjom: “Vyčhuvava me pe lénde Miro xoliamipen i Me othava Mirí xolý pe lénde pe phuv.

⁹Ne Me kerdjom davá vaš Miro lav, sob (kaj) jov te na magirelpe angíl Najudýtka nácyi, kaj jone dživénas, i kaj Me otkerdjom/sykadjom Pes lénge, sob (kaj) te vylydžav len Jegiptoskkire phuvjátyr.

¹⁰I Me vylydžijom len Jegiptóskire phuvjátyr, jandjom len pe čhučí phuv.

¹¹I Me dyjom lénge Miré uphenybená, sykadjom lénge Miré zakóny, savénca dživelas by manúš, kóli jov te kerél, syr Me phendjom.

¹²I Me adiáke-pac' dyjom lénge Miré sávaty (suboty), sob (kaj) te javén jone giertykasa (sykaibnasa) maškír Mánde i lénde, sob (kaj) jone saštý (moginénas) te džinén, so Me som Raj Devél, Devél, Savó keréla len sventonenca.

¹³Ne Izrailjoskiro kher ĥazdyjápe pe Mánde pe čhučí phuv, jone na kerénas syr Me phendjom zoralés, jone otčhurdyne Miré lavá, pir savé dživelas by manúš, kóli kerélas, syr Me phendjom, jone zoralés magirenas Miré sávaty, i Me phendjom: Me vyčhuvava pe lénde Miro xoliamipen pe čhučí phuv, sob (kaj) te xasiakiráv len.

¹⁴Ne Me kerdjom davá vaš Miro lav, sob (kaj) jov te na magirelpe angíl Najudýtka nácyi, savé dykhenas, syr Me vylydžijom len.

¹⁵Paldavá Me ĥazdyjom Miro vast pe lénde pe čhučí phuv sovlahasa angíl lénde, so Me na janáva len pe phuv, saví Me lathjom, pe phuv, kaj čhuvenape thud i avgín, sarengire-phuv'jengiro šukariben.

¹⁶Pal dová, so jone jačné te dykhén vučipnástyr pe Miré lavá, i jone na kerénas, syr Me phendjom zoralés, a jone magirdé Miré sávaty, pal-dová so léngiro iló tyrdelaspe ke léngire ídoly.

¹⁷Ne usajékh Mirí jakh jaciá kovly te na xasiakiráv len; Me na xasiakirdjom len pe čhučí phuv.

¹⁸I rakiravas Me léngire čhavénge pe čhučí phuv: ‘Na psirén, syr sykliakirenas tumaré dadá, na kerén, syr jone rakirénas, na magirén pes léngire idolenca.’

¹⁹‘Me som tumaró Raj Devél, Devél: Kerén, syr Me uphenava, rakhén Miré lavá, kerén, syr Me priphendjom.

²⁰Kerén sventonenca Miré sávaty, sob (kaj) te javén jone ĥiertykasa (sykaibnasa) maškír Mánde i tuménde, sob (kaj) tumé te džinén, so Me som tumaró Raj Devél, Devél.’

²¹Ne čhavé ĥazdynépe pe Mánde, na kerénas pir Miré uphenybená, na rakhenas, sob (kaj) te rikirenpe ke Miré zakóny, so kóli jone te kerén dová, sóstyr dživelas by manúš, ne jone magirdé Miré sávaty, i Me phendjom, so Me vyčhuvava pe lénde Miro xoliamipen, keráva pir Mirí xolý i Me xasiakiráva len pe čhučí phuv.

²²Ne Me obrikirdjom Miro vast i kerdjom vaš Miro lav, sob (kaj) jov te na magirelpe maškír Najudýtka nácyi, savé dykhenas, syr Me vylydžijom len.

²³Adiáke-pac' Me ĥazdyjom Miro vast pe čhučí phuv sovlahasa angíl lénde, so Me rosčhuvava te dživén len maškír Najudýtka nácyi, i rostradava len pir phuvjá.

²⁴Pal dová, so jone na kerénas, syr Me priphendjom, otčhurdyne, a jačné te dykhén vučipnása pe Miré uphenybená, magirdé Miré sávaty, i léngire jakhá tyrdenaspe ke léngire — dadengíre ídoly.

²⁵I domekcjom Me iščo (inké), sob (kaj) jone te dživén pir péskire uphenybená, savé na sys lačhé, i pir zakóny, savéndyr lénge naštý sys te dživén.

²⁶I domekcjom, sob (kaj) jone te magirenpe péskire prisykliaibnytkone dyibnástyr, kiéli jone jačné te lydžán pir jag péskire pervoné bijatén, savé vydžána ločoviátyr (utrobatyr), domekcjom, sob (kaj) jone te javén čhučé, sob (kaj) jone te džinén, so Me som Raj Devél, Devél.

²⁷Paldavá rákir Izrailjoskire kheréske, Manušéskiro čhavó, phen lénge: Adiáke rakiréla Raj Devél, Devél: “‘Ake, sósa kaliakirde Man tumaré dadá, kiéli jone sys napatiaibnytka angíl Mánde.

²⁸Pal-dová so, kiéli Me jandjom len pe phuv, pal saví dre sovláh te dav lénge, Me ĥazdavas Miro vast, a jone vydykhne vaš péske kažno vučí bérgica, kažno kašt baré ĥenstone randienca (vetkenca), i jone lyné te janén odój péskire dyibená, savénca vykharenas Mirí xolý; i janénas odój péskire thuva gudlé, i vyčhuvenas odój péskire thadune svénta dyibená (žertvy).

²⁹I Me rakiravas lénge: “So za vučé štéty, karik tumé psiréna? Paldavá “Bama” kharén la iščo (inké) ke/ žýko adadyvés.”

³⁰Paldavá phen Izrailjoskire kheréske: adiáke rakiréla Raj Devél, Devél: ‘Na magirén tumé pes, syr tumaré dadá prisyklyne, na kerén léngiro džungalypén!

³¹Kiéli tumé janéna tumaré dáry, i lydžána pir jag tumaré čhavorén, dalésa tumé magirena pes saré tumaré idolenca až ke/ žýko adadyvés i kaména te phučien Mándyr, Izrailjoskiro kher? Te dživáv Me, — rakiréla Raj Devél, Devél, — na phenáva tuménge ničí.”

³²I dová pal so tumé duminéna, na javéla, kóli tumé rakiréna: “Javása, syr Najudytkoné — nacyiengire manušá, syr kherítka ródy dre javír thema (strany), javása kašteske i bareske te das patýv.”

³³Te dživáv Me, rakiréla Raj Devél, Devél! — zoralé burnykasa, protyrdyne vastésa, zoralé xoliása javáva Me te rainav pe tuménde.

³⁴I vylydžava Me tumen narodendyr, themendyr (stranendyr), pir savé tumé san rosčhude te dživén, skedáva tumen zoralé vastésa, masniasa (myšcasa) xoliamipnasa, so vyčhuvelape.

³⁵Me janáva tumen pe čhučí phuv, kaj dživéna manušá, odój javáva te sendiakirav mósa ke muj.

³⁶Syr Me sendiakiravas réndo tumaré dadénca pe Jegiptóskire phuvjákiri čhučí phuv, adiáke Me javáva te sendiakirav tumaró réndo (diélo), — rakiréla Raj Devél, Devél.

³⁷Me lydžáva tumen telo kralítko destó (žezlo), janáva tumen dro Zavieto, phandava tumen zavietoskire zorjása.

³⁸Me vykedava tuméndyr manušén, savé ĥazdynépe pe Mánde, i savé kerdé čoripén proti Mánde. Vylydžava Me len kodolé phuvjátyr, kaj jone dživénas, ne pe Izrailjoskiri phuv jona na zadžána, i ĥaljona, so Me som Raj Devél, Devél.

³⁹A tumé, Izrailjoskiro kher, — adiáke rakiréla Raj Devél, Devél, džán kažno (sváko) ke péskire ídoly, dynarinén (služynen) lénge, kóli Man na šunéna, ne na magirén butedýr Miro svénto lav tumaré darenca i tumaré idolenca.

⁴⁰Pal-dová, so pe Mirí svénto bérga, pe vučí Izrailjoskiri bérga, — rakiréla Raj Devél, Devél, — odój javéla te dynarinél Mánge saró Izrailjoskiri kher, saré manušá léstyr, kicý isyn len pe phuv, odój Me prilava len radymása, odój phenáva Me, sob (kaj) te janén tumé tumaré dyibená pervoné phabendyr, saré tumaré sventoné dyibnenca.

⁴¹Me prilava tumen syr gudló thuv smolendyr, kiéli vylydžava Me tumen javire nacyiéndyr, skedáva Me tumen themendyr, kaj tumé san rosčhude te dživén, Me javáva Svénto maškír tuménde, sob (kaj) te dykhén Najudýtka nácyi.

⁴²I ĥaljona tumé, so Me som Raj Devél, Devél, kiéli Me janáva tumen pe phuv Izrailjoskiri, dro them (strana), pal savó Me ĥazdyjom Miro vast sovlahasa te dav tumaré dadénge.

⁴³I javéna te ripirén odój pal tumaré dromá, pal saré tumaré réndy (diély), savénca tumé magirenas pes, so tumé javéna te na den patýv kokoré péske pal saré tumaré namište réndy, savé tumé kerdé.

⁴⁴I ĥaljona, so Me som Raj-Devél, kóli javáva te keráv tuménca vaš Miro lav na pir fuj tumaré dromá, i tumaré biladžakuné réndy, Izrailjoskiro kher, — rakiréla Raj Devél, Devél.’”

⁴⁵[1] I sys ke me Ráskire Devléskiro lav dasavo:

⁴⁶“Manušéskiro čhava! Risjov tyré mósa pe drom ke paš-dyvés (jugo), phen lav pe paš-dyvés, phen pir lav angilphenybén pe veš, savó isyn pe paš-dyvesýtko félda.

⁴⁷Phen paš-dyvesytkoné vešeske: “Šun Ráskire-Devléskiro lav; adiáke rakirél Raj Devél, Devél: Ake, Me roshačkirava jag dre túte, joj zhala dre túte kažno zeleno kašt i kažno šuko kašt; zoralý jag, saví na murdjola, a shačkirla saró pe paš-dyvés i paš-rat, i saré muiá obhačona.

⁴⁸I dykhéla kažno loč (plot'), so Me, Raj Devél, zahačkirdjom la, i joj na murdjola.’”

⁴⁹Tén'ci me phendjom: “O, Rajo Dévla, Dévla! Jone rakiréna pe mánde: “Na rakiréla, xaj, Jov primiéro (pritča).”