Read Biblija - Pe Baltitko Romani čib (Romanes) 2019 Baltic Romani Bible Jezekiljo 22 Bible Online

Jezekiljo 22 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 22

¹I sys ke Me Ráskire-Devléskiro lav dasavo:

²“A tu, manušéskiro čhava, ci kamésa tu te sendiakires? Kamésa tu te sendiakires fóro, kaj čhuvélape rat? Phen léske pal saró léskiro džungalypén (sarí léskiri brytkima).

³Phen: ‘Adiáke rakiréla Raj Devél, Devél: o, fóro, savó čhuvéla rat maškír péste, sob (kaj) te javél léskiro časo, i savó keréla péste ídoly, sob (kaj) te magirel pes!

⁴Ratestyr, savó tu pročhudian, tu san bangó, idolendyr, savén tu kerdián, tu san magirdó. Podginé tyré dyvesá, javdiá tyrí štúnda (ĥodina). Pal kadavá Me otdáva tut pe manušéngiro saben, pe saré — phuv'jengiro prosaiben.

⁵Kodolé, savé isyn pašýl túte, i kodolé, savé isyn dur tútyr, javéna te košenpe pe túte, kon magirdia tyró lav, proslavindepe dolesa, so dro búnto na kandenas nikonés.

⁶Ake, Izrailjoskire thagárja: kažno (sváko) péskire zorjása sys túte, sob (kaj) te čhuvén rat.

⁷Túte namišto rakiréna pal date i dadéste: keréna namištes manušésa, savó javdiá javire phuvjátyr; maškír túte nakuč keréna pirotosa (bidadeskire čhavésa), pivliasa (biromeskire manušniasa).

⁸Tu na désa patýv miré sventoneske, i phagiresa Miré sávaty (suboty).

⁹Manušá, savé namištes rakiréna pal javire manušénde, isyn dre túte, sob (kaj) te čhuvén rat; pe bérgi xána túte sventoné — dyibnytko xabén idolénge, maškír túte keréna fuipén.

¹⁰Dadéskiro nangipén otkerena túte, jone javéna zorjása ke džuvlý, kóli joj žužakirelpe lákire nažužipnastyr.

¹¹Javír keréla biladžaipén čužoné romniása, javír magirela peskirjá borja, javír keréla biladžakiro grého pheniasa, péskire — dadéskire čhasa.

¹²Ke tu manušá léna myto (vziatka), sob (kaj) te čhuvén rat, tu desas lové telo kófo (procento), i lesas baredýr bažyn (lihva) tu zorjása otlesas mištypén tyré pšalestyr, a pal Mánde bistyrdian, — rakiréla Raj Devél, Devél.

¹³Ake, paldavá Me divinavpe, so až mardjom pes pir vastá tre načačipnastyr, syr tut tyrdela ke barvalypén, syr rat čhuvélape maškír túte.

¹⁴Ci vyrikirla tyró iló, ci na obmekenape Tyré vastá dre kodolé dyvesá, kóli Me vydžava pe túte? Me, Raj Devél, Devél, phendjom i keráva davá.

¹⁵I Me rosčhurdava tut pir narody te dživés, rosphurdava tut pir phuvjá, i tu na javésa te kerés butýr sarésa džungalypén maškír péste.

¹⁶Tu kokoró pes magiresa angíl manušéngire jakhá, i tu ĥaljosa, so Me som Raj Devél, Devél.’”

¹⁷I sys ke me (Jezekiljo) Ráskire-Devléskiro lav dasavo:

¹⁸“Manušéskiro čhava! Izrailjo kerdiápe Mánge syr šlako, syr nažužo rup, saré jone isyn — volyvo (olovo), xarkóma (mied'), sastýr, molovi (svinco) — kerdépe dro bov, syr šlako rupéstyr.

¹⁹Paldavá adiáke rakiréla Raj Devél, Devél: ‘Kóli saré tumé kerdépe šlakosa rupéstyr, ake, Me skedáva tumen dro maškirál Jerusalimo.’

²⁰Syr dro bov manušá čhuvéna saró khetané rup, i xarkóma, i sastýr, i molovi, i volyvo, sob (kaj) te rosphurden jag pe lénde, sob (kaj) te rozbilaven (te rostopinen) len, adiáke Me, dre Miro xoliamipen, skedáva i čhuváva i rozbilavava tumen.

²¹Ake, Me skedáva tumen, i Me phurdava pe tuménde Miré xoliamipnaskire jagása, i tumé rozbilavenape maškír láte.

²²Syr rup rozbilavelpe dro maškirál bov, adiáke i tumé rozbiladjona, i ĥaljona tumé, so Me, Raj Devél, Devél, vyčhudjom pe tuménde Miro xoliamipen.”

²³I sys ke me Ráskire-Devléskiro lav:

²⁴“Manušéskiro čhava! Phen léske: “Tu san nažuži phuv, pe saví na džála bryšýnd dro dyvés, kiéli peréla xoliakiri zor!

²⁵Lákire proróki zrakirenape maškír láte, syr ščer (liévo), savó rykinela, riskiréla péskiro doresybén: jone xána manušéngiro di, zalena mištypén i drógima, jačkirena džuvlién biromeskiro.

²⁶Lákire rašaja phagirena Miro Zakóno, magirena Miro svénto, jone na dykhéna, kaj isyn svénto, kaj isyn nasvento; na sykavéna, kaj isyn žužó, a kaj isyn nažužo; pe Miré sávaty (suboty) jone zakerde jakhá; Me som sýrby magirdó maškír lénde.

²⁷Lákire thagárja isyn syr ruvá, savé rodéna xabén, čhuvéna rat, xasiakirena manušéngiro di, sob (kaj) te lathén barvalypén napatyvales.

²⁸A lákire proróki makhena saró blatane obmakhibnasa, jone dykhéna čhučipen (pustota), angilphenena xohaibén i rakiréna: ‘Adiáke rakiréla Raj Devél, Devél”, — a Raj Devél, Devél ničí na rakirélas.

²⁹A manušá narodóstyr keréna namištes jekh javireske; čorena, zalena čororestyr i manušéstyr, savó mangéla, keréna namištes manušésa, savó javdiá javire phuvjátyr.

³⁰Rodyjom Me lénde manušés savó čhuvelas vánta i terdielas dro prophagiriben angíl Mánde pal daja phuv, sob (kaj) Me te na rasphagirav la, ne Me nalathjom.

³¹Adiáke javéla: Me vyčhuvava pe lénde Miré xoliakiri jag, Miré xoliakire jagása Me xasiakiráva len, i Me otdáva pale pal léngire réndy pe léngiro šeró” — rakiréla Raj Devél, Devél.