Read Biblija - Pe Baltitko Romani čib (Romanes) 2019 Baltic Romani Bible Jezekiljo 24 Bible Online

Jezekiljo 24 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 24

¹I sys ke me Ráskire-Devléskiro lav, dro jeniáto (bijekhéskiro déšto) berš, dro déšto čhon, pe deštone-čhonytko dyvés dasavo:

²“Manušéskiro čhava! Začhin péske syr kharelpe davá dyvés, dro kadavá dyvés Vavilonóskiro králi javéla te obdžal trusciál xaladybnasa Jerusalimo.

³Phen pritča (sykaibén) kheréske, kaj na kandéna nikonés, phen lénge: ‘Adiáke rakiréla Raj Devél, Devél: “Čhuv pirí (kakávi), čhuv, čhuv odorík paní.

⁴Čhuv odorík koterá masytka, saré fededýr koterá, kumpjoskire i psikeskire fedýr kokalý čhuv pherdés.

⁵Vykede lačhé bakrén stadatyr, xačkir jag pe kokalý, keráv vaš xabén mas adiáke, sob (kaj) kokalý te javén kovlé.’

⁶Paldavá adiáke rakiréla Raj Devél, Devél: “Bida foroske, kaj čhuvélape rat, bída kakavjake (pirjake), saví obhačija i savjátyr obhačkirdo štéto na zdžála! Vyčhurden látyr kotér pir kotér, na vykede léndyr pir žriébijo.

⁷Pal-dová so rat isyn maškír fóro, jov jačadia les pe sámo nangi bérga, na čhudiá les pe phuv, sob (kaj) práho te učhakirel rat,

⁸sob (kaj) te ĥazdelpe xoliamipen te kerél zavodo (te othal pale) pe fóro, Me jačadjom léskiro rat pe sámo nangi bérga, sob (kaj) jov te na učhakirelpe.

⁹Paldavá adiáke rakiréla Raj Devél, Devél: “Bida foroske, kaj čhuvélape rat! Me roshačkirava baredýr jag.

¹⁰Čhuv vučedýr kaštá, roshačkir jag, keráv mas; mek saró te vykeravelpe, i mek kokalý te pirihačon.

¹¹A kiéli pirí (kakávi) javéla čhučí, to čhuv la pe vangara, sob (kaj) joj te rostat'kirelpe, sob (kaj) te rostat'kirelpe léskiri xarkóma, savjátyr isyn kerdy pirí, sob (kaj) te rozbilavelpe saró pirjakiro nažužypen, sob (kaj) te na javél dre pirí obhačkirde štéty.

¹²Ĥáda, javéla pharí butý vaš láke; ne pirjakiro nažužypen na zdžála látyr, i dre jag usajékh jov jačélape.

¹³Dro tyró nažužypen isyn tyrdypén te kerél džungalypén, ne pal-dová, so Me žužakirdjom tut, a tu usajékh san nažužo. Kóli vyčhuvava Me pe túte saró Miro xoliamipen, tén'či tu javésa žužakirdy.

¹⁴Me som Raj Devél, Devél, Me rakiráva: kadavá saró javéla, i Me keráva so trej. Me na obrikirava Pes, Me na potanginava, Me na požalinava. Pir tyré dromá, pir tyré réndy javéna te sendiakiren tut”, — rakiréla Raj Devél, Devél.

¹⁵I sys ke me Ráskire-Devléskiro lav, phení:

¹⁶“Manušéskiro čhava! Ake, Me otlava tútyr dová, sóstyr tyré jakhá radynénape, tyrí baht fuiasa (jazvasa), ne tu na tangine, na rov, mek te na čhuvenpe tyré jasva.

¹⁷Piridživ saró davá dre péste pharé diesa, na rov pal romniáte, ne obphande tyró šeró, uri tyré triviki, na zaker tyré uštá, na xa maró čužoné manušéndyr.”

¹⁸I kiéli rakiravas me tasiárles (ránes) lav ke manušá, myjá bel'velié mirí romný, i pe javír dyvés Me kerdjom adiáke, syr sys priphendlo.

¹⁹I phendiá mánge narodo: “Ci phenésa tu aménge, so saré kodolé kole sykavéna aménge, i syr te ĥaljos aménge dová, so tu kerésa?”

²⁰Tén'ci me otphendjom lénge: “Ke me sys Ráskire-Devléskiro lav dasavo:

²¹‘Phen Izrailjoskire kheréske: adiáke rakiréla Raj Devél, Devél: ‘Ake, Me otdáva pe magiripén Miro svénto štéto, savó pherdés délas tuménge zor, savó radynelas tumaré jakhá i tumaró iló, a tumaré čhavé i tumaré čhaja, savén tumé jačade, xasjona kurtalátyr.

²²I tumé javéna te kerén dová, so me keravas: tumé na javéna te zakeren čhora (broda), tumé na javéna te xan maró čužoné manušéndyr.

²³Šeró tumaró javéla obphandlo, triviki javéna pe tumaré ĥerá, tumé na javéna te tuginen jasvénca, i na javéna te rovén, ne javéna te šutjon tumaré čoripnástyr, te tuginen rovibnasa jekh angíl javiréste.

²⁴A Jeziekiljo javéla vaš tuménge sýrby ĥiertýk (znamiénijo); saró, so jov kerélas, tumé javéna te kerén, i syr davá saró kerélape, to tumé ĥaljona, so Me som Raj Devél, Devél.

²⁵A túsa, ake, so javéla, manušéskiro čhavó: dro kodová dyvés, kiéli Me otlava léndyr léngiri sláva, dová, sóske radynenaspe léngire jakhá i léngiro di, léngire čhavén i čhajén:

²⁶dro dová dyvés javéla ke tu manúš, savó zrakhciape odothýr, sob (kaj) te del túke kan;

²⁷dro kodová dyvés, kiéli tu dykhesape zrakhné manušésa, otkernape tyré vastá, i tu javésa te rakirés, na javésa tu butýr bičibakiro, a javésa sykaibnasa vaš lénge, i jone ĥaljona, so Me som Raj Devél, Devél.”