Read Biblija - Pe Baltitko Romani čib (Romanes) 2019 Baltic Romani Bible Jezekiljo 25 Bible Online

Jezekiljo 25 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 25

¹I sys ke me Ráskire-Devléskiro lav dasavo:

²“Manušéskiro čhava! Risjov tyré mósa pe Amonoskire čhavénde, rákir pe lénde angilphenybén.

³Phen Amonoskire čhavénge: ‘Šunén Ráskire-Devléskiro lav: adiáke rakiréla Raj Devél: ‘Kóli tu rakirésa pal Miro svénto: “A!”, paldová so jov isyn magirdó, rakirésa pal Izrailjoskiri phuv, pal dová, so joj isyn čhučí, rakirésa pal Judáskiro kher, pal dová so len tradyne dre navolia,

⁴paldavá, ake, Me otdáva tut čhavénge, savé javéna vastokóstyr syr mištypén; jone javéna te kerén túte péskire bakréngire gražy (zagony), jone čhuvéna túte péskire šátry, — i javéna te xan Tyró xabén, javéna te p'jen tyró thud.

⁵Me keráva adiáke, so dre Rava javéla štála vaš vierbliudenge, a Amonoskire čhavé javéna te čaraven bakrén. I tén'či tumé galjona, so Me som Raj Devél, Devél.’

⁶Adiáke rakiréla Raj Devél, Devél: pal dová, so tu maresas dre vastá, štavesas ĥerénca, radynesaspe ilésa, so na kamesas te dykhés pe Izrailjoskiri phuv,

⁷paldavá, ake, Me protyrdava ke tu Miro vast, Me keráva adiáke, sob (kaj) te občoren tut Najudýtka nácyi, Me čhurdava krig tut saré manušéndyr, vyčhinava tut phuv'jengiro ginybnastyr, rosphagirava tut i tu ĥaljosa, so Me som Raj Devél, Devél.”

⁸Adiáke rakiréla Raj Devél, Devél: “Pal-dová so Moávo i Sieiro (Edómo) rakiréna: ake, Judáskiro kher jaciá dasavo, syr saré narody (manušýtka nácyi),

⁹to pal davá Me láva te keráv for'jéndyr, saré léskire for'jéndyr, savé isyn pašýl miéža (granica), phuvjákiro šukaribnastyr, Bien-Ješymofostyr, Vaal-Mieonostyr i Kiriafaimostyr, i Me otkerava Moavoskiri rig,

¹⁰vaš manušénge, savé javné vastokóstyr, Me otdáva les lénge khetané Amonoskire manušénca, sob (kaj) te na ripirén butedýr Amonoskire manušén maškír narody.

¹¹I Me javáva te sendiakirav Moávo, i jone ĥaljona, so Me som Raj Devél, Devél.’”

¹²Adiáke rakiréla Raj Devél, Devél: ‘Pal-dová so Edómo xoliása ĥazdyjápe pe Judáskiro kher, i kerdiá baró grého, kiéli othalas xolý pe léste.

¹³Paldavá adiáke rakiréla Raj Devél, Devél: “Me protyrdava Miro vast ke Edómo, Me xasiakiráva léste manušén i murdalén; Me keráva léstyr čhučí phuv; dro Fiemano, dro Diedano, saré peréna kurtalátyr.

¹⁴Me othava xolý pe Edómo Miré narodoskire, Izrailjoskire vastésa; jone javéna te kerén dre Idumeja pir Mirí xolý i Miro xoliamipen, i jone ĥaljona, syr Me vyrodava léndyr,” — rakiréla Raj Devél, Devél.

¹⁵Adiáke rakiréla Raj Devél, Devél: “Paldová, so Filistimliáni ĥazdenaspe pe lénde xoliása, na ginenas len dre péskiro iló pal manušénde, te xasiakirén len pir ĥaratuno nakamiben te dykhén pe lénde,

¹⁶paldavá, adiáke rakiréla Raj Devél, Devél: Áke, Me protyrdava Miro vast ke Filistimliáni, Me xasiakiráva Kritianen, xasiakiráva pe morjoskiro (derjavéskiro) brégo léngiro jačaibén (ostatko).

¹⁷Me othava bari xolý pe lénde i baré xoliása vyrodava léndyr, — i jone ĥaljona, so Me som Raj Devél, Devél, kiéli Me vyrodava léndyr.’”