Read Biblija - Pe Baltitko Romani čib (Romanes) 2019 Baltic Romani Bible Jezekiljo 26 Bible Online

Jezekiljo 26 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 26

¹I sys adiáke dro dešujekhto berš, dro pérvo čhon, pe pérvo čhonytko dyvés, so sys ke me Ráskire-Devléskiro lav:

²“Manušéskiro čhava! Paldová, so Tíro rakiréla pal Jerusalimo: ‘A! Jov isyn rosphagirdo — narodengiro vudár; jov obrisjola ke me; me pherdiakiravape, jov isyn čhučó (pusto).’

³Pal dová, — adiáke rakiréla Raj-Devél, Devél — ake, Me som proti túte, Tíro, Me ĥazdáva pe túte but nácyi, syr mórjo (derjáv) ĥazdéla péskire valny (velny).

⁴I jone rozmarna Tiroskire vánty (sciany), i rosphagirena léskire vučardia (bašni) i Me vyšulavava léstyr léskiro práho, keráva Léstyr nangi bérga.

⁵Jov javéla maškír mórjo (derjáv) štetosa, kaj rosčhuvena khudia, pal-dová so Me phendjom davá, — rakiréla Raj Devél, Devél, les občorena javír narody.

⁶Léskire čhajén, savé isyn pe félda, — muliakirena kurtalása, — i tén'či ĥaljona, so Me som Raj Devél, Devél.”

⁷“Adiáke rakiréla Raj Devél, Devél: “Áke, Me janáva pe Tíro paš-ratiatyr Navuhodonosoros, Vavilonóskire kralís, kral'jengire kralís; Me janáva les grenca, maribnytkoné vurdenca, manušénca, savé tradéna uklisté, xaladybnasa buté manušénca.

⁸Tyré čhajén pe félda jov muliakiréla kurtalása, keréla maribnýtka tury, čhuvéla valo proti túte, javéla pe túte maribnása.

⁹Jov čhuvéla maribnýtka tarany te rosphagirel tyré vánty, rosphagirela tyré tury péskire toverenca.

¹⁰Léskire-grengire butypnastyr tu učhakiresape prahosa, kiéli zašuminena léskire manušá, savé tradéna uklisté, rotendyr i maribnytkoné vurdenendyr, to léna te izdran tyré vánty, syr jov zadžála dre tyré pórty (vráty), sýrby zadžána manušá dro rozmardo fóro.

¹¹Péskire grengire petalenca jov pirištavela saré Tyré vulícy (gásy); tyré manušén jov muliakiréla kurtalása; ripiribén tre zoralé stylbendyr jov čhurdéla pe phuv.

¹²Jone rosčorena tyró barvalypén, dová, so tu biknesas, jone rosphagirena pe koterá (kuski) tyré vánty, rozmarna tyré goža kherá, tyré bará, tyró veš, tyrí phuv čhurdena dro paní.

¹³Me keráva adiáke, so tu na javésa te bagas butedýr Tyré giliá, na javéla šundlo, sob (kaj) tu bašavesas pe luty (cytry).

¹⁴Me keráva tútyr nangi bérga; tu javésa syr štéto, kaj rozčhuvena khudia (sieti), tu na čhuvésa butedýr tyré kherá, pal-dová so Me, Raj Devél, Devél, phendjom kadavá”, — rakiréla Raj Devél, Devél.

¹⁵Adiáke rakiréla Raj Devél, Devél Tiroske: “Tyré peribnaskire šuminybnastyr, manušéngire roibnastyr, kiéli javéna te muliakirén maškír túte, ci na javéna te izdran ostrovy?

¹⁶Zdžana saré morjoskire (derjavéskire) thagárja péskire tronendyr, zlena péstyr léskire uribená, zlena péstyr rozsude rizy, ne jone ur'jenape darása, bešena pe phuv, javéna te izdran, javéna te divinenpe trašasa pal túte.

¹⁷I jone ĥazdéna roibén pal túte, jone phenéna túke: “Syr xasijan tu fóro, kaj dživénas manušá, savé tradenas piró mórjo (derjáv), slavútno fóro, savó sys zoraló pe mórjo (derjáv), sys zoraló jov kokoró i léskire manušá, konéstyr saré darenas!

¹⁸Kakaná, dro dyvés, kóli tu pyjan, izdrandyne ostrovy; ostrovenge pe mórjo (derjáv) jaciá pharó pal tyró xasibén.’”

¹⁹Adiáke rakiréla Raj Devél, Devél: “‘Kóli Me keráva tútyr čhučó fóro, syr fórja, kaj nikón na dživéla, kiéli ĥazdáva Me pe túte morjoskiro (derjavéskiro) xoripén, to učhakirena tut baré valny.

²⁰Tén'ci Me janáva telé tut khetané kodolenca dre maĥila, ke narodo, savó sys ĥará, Me čhurdava tut dro phuvjákiro xoripén, dre viečna čhučé phuvjá xor tel phuv mulé manušénca, sob (kaj) tu te na dživés butýr; i sykaváva Me baripén pe phuv, kaj isyn džidé.

²¹Me keráva tútyr traš, na javéla tut butedýr; mek i javéna te rodén tut, ne na lathéna nikoli,” — rakiréla Raj Devél, Devél.