Read Biblija - Pe Baltitko Romani čib (Romanes) 2019 Baltic Romani Bible Jezekiljo 29 Bible Online

Jezekiljo 29 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 29

¹Dro déšto berš, dro déšto čhon, pe dešudujengiro čhonytko dyvés sys ke Me Ráskire-Devléskiro lav dasavo:

²“Manušéskiro čhava! Risjov Tyré mósa ke Faraóno, Jegiptóskiro králi, phen pir lav angilphenybe pe léste i pe saró Jegípto.

³Rákir i phen: ‘Adiáke rakiréla Raj Devél, Devél: “Ake, Me vydžava pe túte faraóno, Jegiptóskiro králi, baró krokodilo, savó pasjola maškír réki (leniá) i rakiréla: “Mirí isyn daja reka (len'), Me kerdjom la vaš péske.”

⁴Ne Me čhurdava nanglo (kriuko) dro tyró kirlo, ke Tyrí cýpa prityrdava mačhen Tyré rekendyr (lenor'jendyr), vytyrdava tut Tyré rekendyr (lenor'jendyr) saré mačhenca, savé isyn prilipindle ke tyré luski (češuia).

⁵I čhurdava Me tut pe čhučí phuv, tut i saré mačhé tyré rekendyr (lenor'jendyr), tu peresa pe otkerdy félda, na zalena, na ĥazdéna, Me tut otdáva, sob (kaj) te xan phuvitka riskiribnáskiro murdalá (zvieri), bolybnýtka čirikliá.

⁶I ĥaljona saré, kon dživéla ke Jegípto, so Me som Raj Devél, Devél, pal-dová so jone sys vaš Izrailjoskiro kher, syr triščynytko (trostnikitko) destó te podrikirél.

⁷Kóli jone uhtyldepe pal túte vastésa, tu rospharadyjanpe, rospusadian saró péskiro psikó, kóli jone lyné te rikirenpe pal túte, tu phadijan, rozrandyjan saré léngire masá.”

⁸Paldavá adiáke rakirél Raj Devél, Devél: “Áke, Me janáva pe túte kurtála, xasiakiráva túte manušén i guruvén.

⁹I skerlape Jegiptóskiri phuv čhučé phuvjása i ĥaljona, so Me som Raj Devél, Devél. Paldová so jov rakiréla: ‘Mirí isyn reka (len'), Me sozdyjom la,’

¹⁰Ake, Me poddžava pe tyré réki (leniá), Me keráva Jegiptóskire phuvjátyr čhučí phuv, so na javéla čhučedyr látyr; miéžy Migdolostyr ke /žýko, Sijena, ke Jefiopijakire miéžy.

¹¹Na javéna te psirén odój manušá, na javéna te psirén odój kherítka murdalá (skoto); na javéna te dživén pe láte štardešá berš.

¹²I Me keráva Jegiptóskiri phuv čhučé phuvjása maškír občorde phuvjá, lákire fórja, maškír fórja, katýr giné manušá, javéna čhučé štardešá berš; Me rostradava Jegiptianen pir narody, rosphurdava len pir phuvjá.”

¹³Adiáke rakirél Raj Devél, Devél: “Kóli prodžána (nakhena) štardešá berš, Me skedáva Jegiptianen narodendyr, maškír savé jone javéna vytradyné.

¹⁴Me riskiráva Jegípto navoliatyr, Me janáva len pe phuv Parfos, pe phuv, kaj jone sys bijandle, odój javéna jone nazorale kralipnasa.

¹⁵Kralipén javéla bizorjákiro, na javéla dasavo, syr javír kralipená, na javéla butedýr te ĥazdelpe pe narody. Me teliakirava len, sob (kaj) te na priphenen jone narodenge,

¹⁶i na javéna butedýr podrikiribnasa Izrailjoskire kheréske, a savó ripirlas léngiro grého, i ĥaljona, so Me som Raj Devél, Devél.”

¹⁷Dre biš te eftáto berš, dro pérvo čhon, pe pérvo čhonytko dyvés, sys ke me lav Rástyr-Devléstyr dasavo:

¹⁸“Manušéskiro čhava! Navuhodonosóro, Vavilonóskiro králi, khiniakirdia péskire xaladén baré butiasa pašo Tíro; pe saré šeré vypyne balá, saré psiké isyn skhosne, a ni léske, ni léngire xaladenge nane lové Tirostyr pal butý, saví jov keréla.

¹⁹Paldavá adiáke rakiréla Raj Devél, Devél: “Áke, Me dáva Navuhodonosoroske, Vavilonóskire kralíske, Jegiptóskiri phuv, sob (kaj) jov te zalel lákiro barvalypén, te občorel la te čorel dová, so joj čordia, davá javéla nagrada (mazúri) léskire xaladenge.

²⁰Syr mazúri pal butý, saví jov kerdiá, Me otdáva léske Jegiptóskiri phuv, paldavá so jone kerdé davá vaš Mánge”, — phendiá Raj Devél, Devél.

²¹“Dro dová dyvés Me keráva zoralesa Izrailjoskiro kher (riskiráva šyng/ rógo Izrailjoskire kheréske), i túke otkerava uštá maškír lénde, i ĥaljona so Me som Raj Devél, Devél.”