Read Biblija - Pe Baltitko Romani čib (Romanes) 2019 Baltic Romani Bible Jezekiljo 3 Bible Online

Jezekiljo 3 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 3

¹I phendiá Devél mánge: “Manušéskiro čhava! Xa dová, so isyn angíl túte, xa kadaja lylvarí (svítko), i džá, rákir Izrailjoskire kheréske!”

²Tén'ci me otkerdjom péskire uštá, i Jov dyjá mánge, sob (kaj) me te xav kadaja lylvarí.

³I phendiá mánge: “Manušéskiro čhava! Čaliakir peskro per, pherdiakir les lylvarjasa (svitkosa), saví Me dáva túke.” Me xajom, i sys gudló dre miré uštá syr avgín (meda).”

⁴I Jov phendiá mánge: “Manušéskiro čhava! Uštý, džá ke Izrailjoskiro kher, — rákir lénca Miré lavénca.

⁵Me bičhaváva tut na ke narodo, savó rakiréla naĥalyibnytkes, konéste isyn pharí čib, a ke Izrailjoskiro kher.

⁶Na ke but narody, savé rakiréna naĥalyibnytkes, i konéste isyn pharí čib, konés tu na galjosas by; ne kóli b Me te bičhavav Tut ke jone, to jone na kandenas tut.

⁷A Izrailjoskiro kher na zakaméla te šunél tut, pal-dová so jone na kaména te šunén Man, pal-dová so saró Izrailjoskiro kher isyn pharé-šeritka, i zahale ilésa.

⁸Ake, Me keráva tyró muj i dúho zoraledýr, syr léngire muiá isyn, i čekat tyró zoraledýr, syr léngire čekáta isyn.

⁹Syr almazo (diamanto), so isyn zoraledýr barestyr, kerdjom Me tyró čekat, na dar léndyr, na dar te javes angíl léngiro muj, pal-dová so jone isyn kher, kaj na kandéna nikonés.”

¹⁰I phendiá Jov mánge: “Manušéskiro čhava! Saré Miré lavá, savé Me javáva te rakiráv túke, prilé tyré ilésa i vyšún tre kanenca.

¹¹Uštý, džá pašyledýr ke odolé, konés tradyne dro pliéno, ke čhavé tyré narodóstyr, rákir lénge, i phen lénge: “Adiáke rakiréla Raj Devél, Devél: Ci javéna jone te šunén ci na javéna.”

¹²I ĥazdyjá man Dúho (Fáno), i šundjom me pal péste zoralý zan sýrby gromo: “Te javél bahtiakirdy Ráskire-Devléskiri sláva dalé štetóstyr!”

¹³I adiáke-pac' šundjom me šumo murdalengire phakendyr, savé pritasavenaspe jekh ke javír. I syr šuminena róty palál pašýl lénde, i zoraló gromo.

¹⁴I ĥazdyjá man Dúho (Fáno), i lyjá man. I džavas me pharé ilésa, xoliása, i Ráskire-Devléskiro zoraló vast sys pe mánde.

¹⁵I javdjom me dro Tiel'-Avivo ke odolé, konés vytradyné péskre phuvjátyr, savé dživdé pašýl reka (len') Xovar, i Me sómas maškír lénde eftá (bitrinéngiro deš) dyvesá, i zoralés divinavaspe.

¹⁶Kóli ž proginé eftá dyvesá, sys ke me Ráskire-Devléskiro lav:

¹⁷“Manušéskiro čhava! Me čhudjom tut rakhibnarisa Izrailjoskire kheréske. Tu javésa te šunés lav Miré uštendyr, a tén'či tu javésa te sykliakires len Mándyr.

¹⁸Kóli Me phenáva grehitkoné manušéske: ‘Tu merésa!’, a tu na sykliakiresa les, na phenésa, sob (kaj) te zrakhes grehitkoné manušés leskre grehitkoné droméstyr, sob (kaj) te javél jov džidó, adavá grehítko manúš meréla dre péskre gréhi, a tu javésa bangó angíl Mánde pal léskiro rat.

¹⁹Ne kóli tu sykliakiresas grehitkoné manušés, a jov na jačadia péskiro grého (bedypen) i péskiro grehítko drom: to jov meréla dro péskiro čoripén, a tu zrakhcián tyró di.

²⁰I nevéstyr, kóli devlýtko manúš otdžala péskre čačipnastyr i skerla čoripén, to Me čhuváva angíl léste vari-so, sóstyr jov peréla, i meréla devlýtko manúš, pal-dová so tu na sykliakiresas les. Jov meréla pal péskiro grého, i na priripirlape léskiro čačipén, so jov kerélas, a tu javésa bangó angíl Mánde dro léskiro rat.

²¹Kóli ž tu javésa te sykliakires devlytkoné manušés, sob (kaj) jov te na kerél grého, i na kerla jov grého, tén'či jov javéla džidó, pal-dová so sys sykliakirdo, a tu zrakhcián tyró di.”

²²I sys pe mánde odój Ráskire-Devléskiro vast. Jov phendiá mánge: “Uštý, vydža pe félda. Me javáva te rakiráv túsa.”

²³Me uštyjom, i gijom pe félda. Ake, odój sys terdy Ráskire-Devléskiri sláva, syr sláva, saví me dykhcjom pašýl reka (len') Xovar. Me pyjom pe péskiro muj.

²⁴I zagijá dre mánde Dúho (Fáno), i čhudiá man pe miré ĥerá. I Jov rakirlas mánca, i phendiá mánge: “Džá, zaphandepe dro tyró kher.

²⁵Manušéskiro čhava! Ake, léna šele i phandena tut lénca, i tu na javésa te psirés maškír lénde.

²⁶Čib tyrí Me otlava tútyr, i tu javésa bičibakiro, i na phenésa čačipén pal lénde, pal-dová so jone isyn kher, kaj na kandéna nikonés.

²⁷A kóli Me javáva te rakiráv túsa, tén'či me otkerava tyré uštá. Tén'ci tu phenésa lénge: “Adiáke rakiréla Raj Devél, Devél! Kon kaméla te šunél-šun, a kon na kaméla te šunél-na šun, pal-dová so kadavá isyn kher, kaj na kandéna nikonés.”