Read Biblija - Pe Baltitko Romani čib (Romanes) 2019 Baltic Romani Bible Jezekiljo 30 Bible Online

Jezekiljo 30 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 30

¹I sys ke me Ráskire-Devléskiro lav dasavo:

²“Manušéskiro čhava! Phen pir lav angilphenybén i phen: adiáke rakirél Raj Devél, Devél: ‘Rovén! O! bibahtaló dyvés, aj!

³Poddžála dyvés, poddžála dyvés Ráskire-Devléskiro, kaló dyvés, javdiá narodonengiro časo (cýro).

⁴Kurtála javéla pe Jegípto, traš javéla dre Jefiopija, kóli javéna te perén dro Jegípto domardé manušá, kóli zalena léskiro barvalypén, rosphagirena léskire fundamienty tel vánty.

⁵Jefiopija i Livija, i Lidija, i saró skedynó khetané narodo, i Xubo (Kuvija), i čhavé zavietoskire phuvjátyr peréna khetané lénca kurtalátyr.’

⁶Adiáke rakiréla Raj Devél, Devél: “Perla Jegiptóskiro podrikiribén, jov na javéla te phutjol péskire zorjása, perla Léskiro phut'kiribén. Migdolostyr ke/ žýko Sijena javéna te perén dre léste kurtalátyr”, — phendiá Raj Devél, Devél.

⁷“Javéla jov čhučó maškír čhučé phuvjá; léskire fórja javéna maškír čhučé fórja.

⁸I jone ĥaljona, so Me som Raj Devél, Devél, kóli bičhaváva Me jag pe Jegípto i perla saró léskiro podrikiribén.

⁹Dro kodová dyvés javéna Mándyr manušá, savé lydžána zvies' (nevipen), jone potradena pe pármy (korabli), sob (kaj) te strahakiren birakhibnaskire, Jefioplianen, javéla lénde traš, syr dre Jegiptóskiro dyvés, ake, jov džála.”

¹⁰Adiáke rakiréla Raj Devél, Devél: “Navuhodonosoroskire, Vavilonóskire kralískire vastésa, Me keráva, so na javéla dro Jegípto manušéngiro butypen.

¹¹O Navuhodonosóro, i lésa léskiro narodo, zahalo narodo, javéna, sob (kaj) te xasiakirén daja phuv, vylena péskire kurtaly (miečy) pe Jegípto, pherdiakirena phuv domardé manušénca.

¹²I Me vyšut'kirava réki (leniá), i otdáva phuv dre zahale-manušéngire vastá, javire-phuv'jengire manušéngire vastésa Me keráva, sob (kaj) te javél kadaja phuv i saró, so isyn pe láte, čhučé (pusto). Me, Raj Devél, Devél, phendjom davá.

¹³Adiáke rakiréla Raj Devél, Devél: “Me zalava ídoly, Me xasiakiráva xohané devloré dro Miemfiso, na javéla butedýr thagaris Jegiptóskire phuvjátyr; Me janáva dar pe Jegiptóskire phuv.

¹⁴Me keráva adiáke, so Pafroso javéla čhučó, Me bičhaváva jag pe Coano, Me javáva te sendiakirav No.

¹⁵I vyčhuvava Me Mirí xolý pe Sióno, Jegiptóskiro zoralypén, i xasiakiráva dre léste manušéngiro butypen.

¹⁶I bičhaváva Me jag pe Jegípto: zaizdrala Sin, i No peréla, pe Miemfiso javéna vérgi (vrogi) dyvesé.

¹⁷Terné manušá Onostyr i Bubastyr peréna kurtalátyr, a javír džána dre navolia.

¹⁸Dro Tafniso javéla kaló dyvés, kóli Me rosphagirava odój Jegiptóskiro ĥámo, na javéla butedýr dre léste phut'kirdo zoralypén. Obloko zakerla les, léskire čhaja džána dre navolia.

¹⁹Adiáke javáva Me te sendiakirav Jegípto, i jone ĥaljona, so Me som Raj Devél, Devél.”

²⁰Dro dešupervo berš, dro pérvo čhon, pe eftáto (bitrinéngiro déšto) čhonytko dyvés sys ke me Ráskire-Devléskiro lav dasavo;

²¹“Manušéskiro čhava! Me phagirdjom psikó faraonóske, Jegiptóskire kralíske. Ake, psikó na iščo (inké) isyn obphandlo, sob (kaj) léske te vysastjol, na iščo (inké) zaphandlo vaš sastiakiriben, savéstyr lelas by jov zor te rikirél kurtála (miečo).

²²Paldavá adiáke rakiréla Raj Devél, Devél: “Ake, Me vydžava pe faraonoste, Jegiptóskire kralíste, Me phagirava léskire psiké, sastó i phagirdó, i vyperela kurtála léskire vastéstyr.

²³I rostradava Me Jegiptianen pir narody, i rosphurdava len pir phuvjá.

²⁴A Vavilonóskire-kralískire psiké keráva Me zoralé psikesa, Me dáva léske dre vast Mirí kurtála. Faraonóskire psiké rosphagirava, jov isyn nasvaló, jov javéla te rovel angíl Léste.

²⁵Me keráva Vavilonóskire-kralískire psiké zoralé psikenca, a Faraonóskire vastá mekenape, i jone ĥaljona, so Me som Raj Devél, Devél, kóli Me dáva Mirí kurtála Vavilonóskire kralíske, i jov ĥazdéla la pe Jegiptóskiro phuv.

²⁶I rostradava Me Jegiptianen pir narody, i rosphurdava len pir phuvjá, i jone ĥaljona, so Me som Raj Devél, Devél.”