Read Biblija - Pe Baltitko Romani čib (Romanes) 2019 Baltic Romani Bible Jezekiljo 31 Bible Online

Jezekiljo 31 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 31

¹Dro dešupervo berš, dro tríto čhon, pe pérvo čhonytko dyvés sys ke me Ráskire-Devléskiro lav dasavo:

²“Manušéskiro čhava! Phen faraonóske, Jegiptóskire kralíske i léskire narodoske: ‘Konesa tu kerésa pes ravnonesa dro tyró baripén?’

³Ake, Asuro sys kiedro pe Liváno, šukarone randienca (vietkenca), buté patrienca (listenca); sys vučó kašt; léskiro upralypén sys maškír baré vétki.

⁴Pani les barjakirelas, phuv les ĥazdelas, lákire réki (leniá) sys pašýl léste; joj bičhavelas péskiro paní ke saré feldýtka kaštá (drevy).

⁵Paldavá léskiro vučipén sys vučedýr saréndyr feldytkone kaštendyr; sys pe léste but senkicy; barjonas léskire randiá (vétki), senki léskire kerenaspe dlugonenca panieskiro butypnastyr, kóli rozbarjolas davá kašt.

⁶Pe léskire senkicy kerénas péske gniázdy (kúfy) rázna bolybnýtka čirikliá; telál léskire vétki barjakirenas tyknoren (čhavrinen) rázna feldýtka murdalá (zvieri); telo kadalé-kašteskiri zer (tien') dživénas rázna narody, konés sys but.

⁷Jov sykavelas péskiro gožypen péskiro vučipnástyr, péskire dluga vétki, pal-dová so léskiro kornjo (rukh) sys pašýl baró Jegiptóskire paní.

⁸Kiedry dre Devlýtko únta (sado) na zakerenas les pésa, kiparisy na sys ravna léskire senkicenge, ni jekh kašt (drévo) dre Devlýtko únta na sys dasavo šukár, syr jov.

⁹Me ukedyjom les buté léskire randienca, saré Edemoskire kaštá dre Devlýtko únta (sado) dykhenas pe léste.

¹⁰Paldavá adiáke phendiá Raj Devél, Devél: “Pal dová, so jov vybarija drieván vučó, i čhudiá tyró upralypén maškír baré senki, i léskiro iló phutija léskire slavatyr,

¹¹paldavá Me otdyjom les dre narodonengire-kralískire vastá; jov kerdiá lésa, syr trej; pal léskiri zlydnima Me otgijom léstyr.

¹²I sčindle les javire-phuv'jengire manušá, dasavé zahale, so nane butedýr dasaven dre narody, i jone čurdyne les pe bérgi, pe saré féldy pyné léskire vétki, léskire, senki obphagirdepe pe saré lengi; giné krig zerjatyr (tienjostyr) saré phuvitka narody, i jačiade les.

¹³Pe léskire rophagiribena lyné te dživén rázna bolybnýtka čirikliá, dre léskire senki sys rázna feldýtka murdalá (zvieri).

¹⁴Vaš dová, sob (kaj) nisave kaštá pašýl paní te na phutjonas, so vybarine jone dasavé baré, na ĥazdenas péskiro upralypén baré senkicendyr, sob (kaj) na tyrdenaspe ke jone, pal-dová so jone isyn dasavé baré kaštá, savé p'jena paní; saré jone meréna, džána péske pe dová svéto khetané manušéskire čhavénca, savé myné.”

¹⁵Adiáke rakiréla Raj-Devél, Devél: “Dro dová dyvés, kóli jov myjá, Me kerdjom roibén pal léste, zakerdjom vaš léske phuv, na dyjom, sob (kaj) te thaden lákire réki (leniá), zakerdjom baró paní, i dyjá tangipén pal léste Liváno, i saré feldýtka kaštá tanginenas Les.

¹⁶Šumibnasa léskire peribnastyr Me dyjom dar narodenge, kóli otlydžijom les pe dová svéto, ke manušá, savé myné, i radynenaspe pe dová svéto saré Edemoskire kaštá, saré lačhé Livanoskire, saré, kon p'jela paní.

¹⁷I jone giné lésa pe dová svéto ke domardé kurtalása, i kodolé, savé sys lésa dro dorakiribén, savé dživénas tel léste, maškír narody.

¹⁸Adiáke, konesa Edemoskire kaštendyr tu ravninesa dre Tyrí sláva, dro Tyró baripén? Ne akaná khetané Edemoskire kaštenca tu džása pe dová svéto, tu javésa te pasjos maškír naobčhindlende, khetané domardé kurtalása. Kadavá isyn faraóno i léskire-narodoskiro butypen,” — rakiréla Raj Devél, Devél.