Read Biblija - Pe Baltitko Romani čib (Romanes) 2019 Baltic Romani Bible Jezekiljo 32 Bible Online

Jezekiljo 32 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 32

¹Dro dešuiavir berš, dro dešuiavir čhon, pe pérvo čhonytko dyvés sys ke me Ráskire-Devléskiro lav dasavo:

²“Manušéskiro čhava! Rov pal faraonoste, Jegiptóskire kralíste, phen léske: ‘Tu san syr ternó ščer (liévo) maškír narody, syr darano murdál (zvierjo) dro mórjo (derjáv), tu čhurdesape dre tyré réki (leniá), ĥazdesa paní tyré ĥerénca.”

³Adiáke rakiréla Raj Devél, Devél: “Me začhurdava pe túte Mirí khudý (siet') dre buté-narodonengiro skedyibén, jone vytyrdena tut lása.

⁴I vyčhurdava Me tut pe phuv, čhurdava Me tut pe otkerdy félda, i javéna te bešén pe túte rázna bolybnýtka čirikliá, javéna te xan tut riskirbnaskire murdalá (zvieri) saré phuvjátyr.

⁵I rosčhurdava Me tyró mas pir bérgi, i doly, i pherdiakirava Me tyré doly trupenca.

⁶Phuvjake, kaj tu plavinesas (desas plima), Me dáva, sob (kaj) te p'jel Tyró rat ke /žýko lákire bérgi, saré rovy odój javéna pherdé túsa.

⁷Kóli tu murdjosa, Me zakerava bolybén, Me murdiakirava léngire čergeniá, Me zakerava kham oblokosa, čhon na javéla te xačol.

⁸Saré duda (svietily), so xačona pe bolybén, Me murdiakirava, Me janáva rat pe tyrí phuv,’ — rakiréla Raj Devél, Devél

⁹Začilavava Me iló buté-narodonengiro, kóli rosphenava pal tyró periben maškír narody, pir phuvjá, savé tu na džinesas.

¹⁰I piritrašavava Me túsa but narody; léngire králja izdrana dre dar pal túte, kóli ĥazdáva Me Mirí kurtála angíl léngiro muj, javéla te izdral kažno léndyr kažno menta (minuta) pal péskiro di dre tyré-peribnaskiro dyvés.

¹¹Adiáke rakiréla Raj Devél, Devél: “Vavilonóskire-kralískiri kurtála javéla pe túte.

¹²Zoralé manušéngire kurtalátyr peréla Tyró narodo, saré jone isyn drieván zahale; jone xasiakirena Jegiptóskiro phut'kiribén; i xasjola saró léskiro butypen.

¹³I Me xasiakiráva saré Léskire kheritkoné murdalén (skoto), pašýl baró paní; na ĥazdéla bláta butedýr dro paní manušeskiri ĥerój, na ĥazdéla bláta dro paní guruvengiro kopyto (naj/khurval).

¹⁴Tén'ci davá Me štylypen léngire panieske, keráva adiáke, so pothadena léngire réki (leniá), syr ksil, — rakiréla Raj Devél, Devél.

¹⁵Kiéli Me keráva Jegiptóskiri phuv čhučé phuvjása, kóli našavela phuv saró, so pherdiakirela la, kiéli xasiakiráva sarén, kon dživéla pe phuv, tén'či jone ĥaljona, so Me som Raj Devél.’

¹⁶Ake, isyn roibnytko gilý, saví javéna te bagán: narodonengire čhaja javéna te bagán la; pal Jegípto, pal saró Léskiro butypen zbagana la”, — rakiréla Raj Devél, Devél.

¹⁷Dro dešuiavir berš, dre dešupandžto čhonytko dyvés sys ke me Ráskire-Devléskiro lav dasavo:

¹⁸“Manušéskiro čhava! Zarov pal Jegiptóskiro narodo, čhurde les, les i slavutnone-narodengire čhajén dre xor štéty tel phuv/odová svéto khetané odolenca, kon skedyjape te merél, kon džála dre maĥila.

¹⁹Fedýr konéstyr tu san? Džá telé, pasjov khetané odolenca, savé isyn naobčhindle.

²⁰Jone peréna maškír manušénde, savé isyn domardé kurtalása, i jov isyn otdynó kurtalake; terden les i péskiro butypen.

²¹Pe dová svéto javéna te rakirén pal léste i pal manušénde, savé sys lésa dro dorakiribén pérva muršarja-manušá; jone pyné, jone isyn pašté odój maškír odolénde, savé isyn naobčhindle, kurtála domardiá len.

²²Odój isyn Asuro i saró léskire-xaladéngiro skedyibén paš léste, odój isyn léngire mulykane (groby), saré domardé, kon pyjá kurtalátyr.

²³Léskire mulykane čhudé dre dolé-svetoskiro xoripén; léskire-xaladéngiro skedyibén isyn pašýl léskiri koplíca, saré domardé, kon pyjá kurtalátyr, saré odolé, savé janénas dar pe džidé-manušéngiri phuv.

²⁴Jelamo saré péskire butypnasa isyn pašýl léskiri koplíca, saré jone isyn domardé, saré pyné kurtalátyr, saré na sys občhindlé i adiáke giné pe dová svéto; odolé sys manušá, savé janénas dar pe džidé-manušéngiri phuv i lydžána péskiri ladž khetané manušénca, savé myné.

²⁵Maškir domardende dyné čhuibén léske Jelamoske i saré léskire butypnaske; pašýl léste isyn léngire mulykane, saré isyn naobčhindle, pyné kurtalytyr, pal-dová so jone janénas pésa dar pe džidé-manušéngiri phuv, jone lydžána pe péste ladž khetané odolenca, kon myjá; len čhudé maškír domardende.

²⁶Odój isyn Miešefo i Fuvalo saré léngire butypnasa; pašýl léste isyn léngire mulykane (groby), saré isyn naobčhindle, domardé kurtalása, pal-dová, so jone janénas dar pe džidé-manušéngiri phuv.

²⁷Ci na trej lénge te pasjon slavutnone muršar'jenca-manušénca, savé na sys občhindlé, savé péskire xaladytkone skedyibnasa giné pe dová svéto/liúno, čhudé péskire kurtaly péske telo šeró, i jaciápe léngiro čoripén pe léngire kokalý, pal-dová so jone, syr zoralé, sys darása pe džidé-manušéngiri phuv.

²⁸I tu javésa domardo maškír naobčhindlende, tu javésa te pasjos odolenca, kon sys domardo kurtalása.

²⁹Odój isyn Edómo, i léskire králja, i saré léskire thagárja, savé na darenas nikonestyr, ne čhudé len maškír odolénde, kon sys domardo kurtalása; jone pasjona khetané odolenca, kon sys nabčhindlo, kon myjá.

³⁰Odój isyn odolé, kon sys thagárja pe paš-rat (sieviero), saré jone i saré Sidoniani, savé giné odorík khetané domardé manušénca. Jone lyné ladž péskire zoralypnastyr, savó strahakirelas saré manušén, i isyn pašté jone khetané, naobčhindle manušénca, savé pyné kurtalátyr, i lydžána péskiri ladž khetané odolenca, kon myjá.

³¹Dykhéla len faraóno, i na javéla te tanginél pal péskiro butypen, savó pyjá kurtalátyr, faraóno i saró léskire-xaladéngiro skedyibén, — rakirél Raj Devél, Devél.

³²Me rozbuĥliakirava Mirí dar pe džidé-manušéngiri phuv, javéla čhudo faraóno i saré léskiro butypen maškír naobčindlende, khetané domardé kurtalása manušénca”, — rakiréla Raj Devél, Devél.