Read Biblija - Pe Baltitko Romani čib (Romanes) 2019 Baltic Romani Bible Jezekiljo 33 Bible Online

Jezekiljo 33 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 33

¹I sys ke me Ráskire-Devléskiro lav dasavo:

²“Manušéskiro čhava! Phen lav ke čhavé Tyré narodóstyr, phen lénge: ‘Kóli Me janáva kurtála pe vari-saví phuv, i dolé-phuvjákiro narodo léla péstyr manušés, i čhuvéla les péste rakhibnarisa (stražosa).

³Jov dykhéla kurtála, saví džála pe phuv, zabašavela dro rógo (truba), phenéla pal davá narodoske.

⁴I kóli vari-kon javéla te šunél bašaibnytko zan, ne na zrakhéla pes, tén'či, kiéli kurtála javéla i zauhtylela les, léskiro rat javéla pe léskiro šeró.

⁵Bašaibnytko zan jov šunelas, ne na rakhelaspe, léskiro rat javéla pe léskiro šeró, a kon rakhelaspe, odová zrakhciaia péskiro džiibén.

⁶Kóli ž rakhibnaskiro dykhciá, so džála kurtála, ne na zabašadia, na phendiá pal davá narodoske, tén'či, kiéli javéla kurtála i zalela džiibén vari-konés léndyr, kadavá javéla uhtyldo pal péskiro grého, ne léskiro rat Me vyrodava rakhibnariskire vastéstyr.

⁷Tut, manušéskiro čhava, Me čhudjom rakhibnaskiresa Izrailjoskire kheréske, tu javésa te šunés lav Miré uštendyr, te javésa te sykliakires len Mándyr.

⁸Kóli Me phenáva zlydnitkone manušéske: ‘Zlydnia manúš! Merésa meribnasa’, — a tu na javésa te rakirés ničí, sob (kaj) te zrakhes zlydnitkone manušés léskire droméstyr, kodová manúš meréla pal péskiri zlydnima, ne léskiro rat Me vyrodava Tyré vastéstyr.

⁹Kóli ž tu zrakhesas zlydnitkone manušés léskire droméstyr, sob (kaj) jov te džal krig odothýr, ne jov na gijá péskire droméstyr, tén'či jov meréla pal péskiro grého, a tu zrakhcián Tyró di.

¹⁰Tu, manušéskiro čhava, adiáke phen Izrailjoskire čhavénge: “Tumé rakiréna adiáke: amaré nalačhé réndy, amaré gréhi isyn pe aménde, ame xasjovasa dre lénde, syr že aménge te dživás?

¹¹Phen lénge: ‘Te dživáv Me’, — rakirél Raj Devél, Devél: — na kamám grehitkoné-manušéskire meribén, ne sob (kaj) te džal krig grehítko manúš péskire droméstyr i te javél džidó. Džán krig, džán tumaré nalačhé dromendyr, sóske trej te merén tuménge, Izrailjoskiro kher?’

¹²Tu, manušéskiro čhava, phen čhavénge tyré narodóstyr: patiaibén devlytkoné-manušéskiro na zrakhéla les dro dyvés, kiéli jov keréla grého; grehítko manúš na xasjola pal peskro grého dro dyvés, kiéli gijá péskire grehostyr, a devlýtko manúš na jačélape džidó pal péskiro lačhó džiibén dro dyvés, kóli kerdiá grého.

¹³Kóli Me phenáva devlytkoné manušéske, so jov javéla džidó, a jov poduminela, so na jačkiréla les léskiro devlýtko džiibén i jov keréla xohaibén — to na priripirnape saré léskire devlýtka réndy, jov meréla péskire xohaibnastyr, savó kerdiá.

¹⁴A kóli Me phenáva grehitkoné manušéske: ‘Merésa meribnasa’, i jov jačkiréla péskire gréhi, i javéla te kerél séndo i čačipén.

¹⁵To kóli adavá grehítko manúš otdéla symadý (zalogo), i jov zapleskirela pal péskiro čoriben, i jov javéla te psirél pir džiibnáskire zakóny, i na javéla te kerél čoripén, — kadavá manúš javéla džidó, na meréla.

¹⁶Nijékh léskire grehéndyr, savé jov kerdiá, na priripirlape léske; jov jaciá te kerél séndo i čačipén, jov javéla džidó.

¹⁷A čhavé tyré narodóstyr rakiréna: ‘Nane čačunó Ráskire-Devléskiro drom’, kóli davá léngiro drom isyn xohanó.

¹⁸Kóli devlýtko manúš gijá péskire sventoné džiibnastyr, i lyjá te kerél čoripén — jov meréla pal dová.

¹⁹I kóli zlydnia manúš jačadia péskiri zlydnima, lyjá te kerél séndo i čačipén, to jov javéla džidó paló davá.

²⁰A tumé rakiréna: ‘Nane čačunó Ráskire-Devléskiro drom!’ Me javáva te sendiakirav tumen, Izrailjoskiro kher, kažnones pir péskire dromá.”

²¹Dro dešuiavir berš, kóli amen piričhude te dživén ke Vavilóno, dro déšto čhon, pe pándžto čhonytko dyvés, javdiá ke me jekh manúš, savó zrakhciape Jerusalimóstyr i phendiá: “Fóro isyn rosphagirdo!”

²²Ne jov iščo (inké) na javdiá ke me, a bel'velié sys pe mánde Ráskire-Devléskiro vast. Jov otkerdia mánge uštá angledýr, sósa odová manúš javdiá ke me zlokosa (rankosa). Otkerdepe Miré uštá, Me na sómas bičibakiro.”

²³I sys ke Me Ráskire-Devléskiro lav dasavo:

²⁴“Manušéskiro čhava! Odolé, kon dživéla pe štéty, savé jačné čhučé, pe Izrailjoskiri phuv, rakiréna: “Avraámo sys jekhdžinó i léske doresciape adáia phuv, amen isyn but; paldavá aménge sys dyný daja phuv”

²⁵Paldavá phen lénge: Adiáke rakiréla Raj Devél, Devél: “Tumé xána ratésa, i gazdena tumaré jakhá ke tumaré ídoly, čhuvéna rat, i kaména, sob (kaj) adáia phuv te javél tumarí?”

²⁶Tumé duminéna, so kurtála podrikiréla tumen, tumé keréna džungalé réndy, jekh tuméndyr magirela — javireskire romniá, i kaména, sob (kaj) phuv te javél tumarí?

²⁷Ake, so phen lénge: Adiáke rakiréla Raj Devél, Devél: ‘Te dživáv Me!’ Odolé, kon isyn pe občorde štéty, peréna kurtalátyr, a odolés, kon isyn pe félda, Me otdáva, sob (kaj) te xan les riskibnaskire murdalá (zvieri), a odolé, savé isyn dre tvárdymi, dre ĥiebará (pieščery), jone meréna meribnytkone fujendyr.

²⁸Me keráva daja phuv čhučedyr saréndyr čhučé phuv'jendyr, na javéla butydyr lákiro phut'kirdo zoralypén; bérgi Izrailjoskire jačéna čhučé, nikón na prodžála odój.

²⁹I jone ĥaljona, so Me som Raj Devél, Devél, kóli piriskirava phuv čhučedyr saré čhučé phuv'jendyr, pal saré léngire džungalé réndy, savé jone kerénas.

³⁰A pal túte, manušéskiro čhava, rakiréna čhavé Tyré narodóstyr pašýl vánta, dre kherítka vudará, rakiréna jekh jekhéske, pšal pšaléske: ‘Džán pašýl, pošunen, savó lav vygijá Rástyr-Devléstyr.’

³¹Jone javéna ke tu syr pe manušéngiri skedyny (shodka): bešena angíl tyró muj, Miro narodo, šunéna Tyré davá, ne jone na dživéna pir lénde. Jone sýrby khelenape lénca dre péskire uštá; léngiro iló tyrdelpe pal barvalypén.

³²Ake, tu san vaš lénge syr bagibnaskire kučoné zaniása, savó kuč bašavela: jone šunéna tyré lavá, ne na dživéna pir lénde.

³³Ne kóli pherdiakirelape — ake, kakaná pherdiakirelpe, tén'či jone ĥaljona, so sys maškír lénde proróko.”