Read Biblija - Pe Baltitko Romani čib (Romanes) 2019 Baltic Romani Bible Jezekiljo 34 Bible Online

Jezekiljo 34 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 34

¹I sys ke me Ráskire-Devléskiro lav dasavo:

²“Manušéskiro čhava! Phen pir lav angilphenybén pe Izrailjoskire čhupnar'jende (pastyriende), phen pir lav angilphenybén, phen len, čhupnar'jenge: Adiáke rakiréla Raj Devél, Devél: ‘Bida Izrailjoskire čhupnar'jenge, savé kokoré pes čaravenas! Ci na bakrén trej te čaraven čhupnar'jenge?

³Tumé xanas bakrengiro mas, ur'jenaspe dre výlna bakréndyr, čhinenas lačhé bakrén, a javirén bakrén na čaravenas.

⁴Nazoralen na podrikirenas, nasvalia bakriá na sastiakirenas, na piriphandenas bakriá, savjá dukhade, na riskirenas bakriá, savjá utradyne, na rodén bakriá, saví našadiape, a sys vaš zahale lénge i bikovlypnaskire xulanca.

⁵I rosprastyndynepe jone bi čhupnariskiro, a kóli rosprastyndynepe, to kerdépe kažnoné feldytkone murdaleske (zvierjoske) xabnasa.

⁶Psiréna Miré bakriá pir saré bérgi, pir kažno vučí bérgica, pir sarí phuv rosprastandynepe Miré bakriá, i nikón na rosphučelpe pal lénde, nikón na rodéla len.

⁷Paldavá, čhupnarjale, šunén Ráskire-Devléskiro lav!

⁸“Te dživáv Me!” — rakiréla Raj Devél, Devél; pal dová, so jačade Miré bakrén, sob (kaj) te čoren len, bi čhupnariskiro kerdépe Miré bakriá xabnasa vaš kažno feldytkone riskiribnáskire murdaleske (zvierjoske) i Miré čhupnárja na rodenas Miré bakrén, čaravenas čhupnárja kokoré pes, a Miré bakrén na čaravenas, —

⁹paldová, čhupnarjale, pošunen Ráskire-Devléskiro lav.

¹⁰Adiáke rakiréla Raj Devél, Devél: ‘Ake, Me vydžava syr vérgo pe čhupnar'jende, zalava Miré bakrén léngire vastéstyr, Me na davá, sob (kaj) te čaraven jone bakrén duredýr, na javéna butedýr čhupnárja te čaraven kokoré pes; Me zalava Miré bakrén léngire dandendyr, i na javéna jone léngire xabnasa.’

¹¹Adiáke rakiréla Raj Devél, Devél: ‘Ake, Me Kokoró lathava Miré bakrén i obdykhava len.

¹²Syr čhupnári propatiakirela péskire bakrén dro dová dyvés, kóli jone rosprastandynepe, adiáke Me piridykhava saré Miré bakrén, Me zrakháva len saré šteténdyr, karik jone sys rostradyne dro kaló dyvés oblokénca.

¹³I Me vylydžava len narodendyr, Me skedáva len rigéndyr, Me janáva len pe léngiri phuv, Me javáva te čaravav len pe Izrailjoskiri bérgi pašýl panieskiro potoko, pe saré adalakire-phuvjákiro štéty.

¹⁴Me javáva te čaravav len pe lačhé féldy, léngiri štála javéla pe vučé Izrailjoskire bérgi; odój jone javéna te otkhinjon dre lačhí štála, jone javéna te čaravenpe pe lačhí félda, pe bérga Izrailjoskiri.

¹⁵Me javáva te čaravav Miré bakrén, Me javáva te rakhav len,” — rakiréla Raj Devél, Devél.

¹⁶“Saví našadiape — odolia lathava, saví sys utradyny — odolia riskiráva, saví sys dukhady — odolia piriphandava, a odolia, saví jaciá drieván thuly i odolia, saví na kandéla — len xasiakiráva Me; Me javáva te čaravav len čačipnása.

¹⁷A tumen, Miré bakrén, — adiáke rakiréla Raj Devél, Devél, — ake, Me javáva te sendiakirav maškír jekhe bakriate i javire bakriate, maškír bakriate i buzneste (kozloste).

¹⁸Nauhtylla (nádosi), xaj, tuménge, so tumé čaravenpe pe lačhí félda? Ne tumé vymaren ĥerénca dová, so jaciápe pe tumarí félda; p'jen žužó paní, a dová, so jaciápe, tumé ĥazdéna tumaré ĥerénca dre bláta.

¹⁹A Miré bakrenge pridžalpe te xan dová, so vyštade (vytopčyndle) tumaré ĥerá; pridžalpe te xal dová, so tumaré ĥerá meliakirde.”

²⁰Paldavá adiáke rakiréla Raj Devél, Devél: “Ake, Me Kokoró javáva te sendiakirav maškír thule bakriate i maškír šuké bakriate.

²¹Kóli tumé špulena (pihinena) ĥerénca i psikenca, i bodynena (marena) saré nazorale (bakrén) péskire šyngenca (rogénca), sob (kaj) te vytraden len javrí,

²²to tén'či Me zrakháva Miré bakrén, na javéna butedýr te čoren len; Me keráva séndo maškír jekhe bakriate i javire bakriate.

²³I Me čhuváva lénge jekhe čhupnaris, savó javéla te čaravel len, Miré pisharís Davidós, jov javéla te čaravel len, jov javéla léngiro čhupnári.

²⁴I Me, Raj Devél, Devél, javáva léngiro Devél, i Miro pishári Davído javéla rása maškír lénde. Me, Raj Devél, phendjom davá.

²⁵“I keráva Me lénca ramanjono (mírno) zavieto, i vytradava Me phuvjátyr zahale murdalén (zvierien), sob (kaj) jone te dživén bidarakires pe félda (mal), te soven dre vešá.

²⁶Me bahtiakirava len i phuvjá, savé isyn pašýl Mirí bérgica; Me javáva te bičhavav bryšýnd, kóli trej, kadalé javéna bahtiakiribnaskire bryšynda.

²⁷I feldytko drévo (kašt) janéla péskiro barjakirdó (plódo); phuv déla saró, so barjola pe láte; jone na javéna te darén pe péskiri phuv, i jone ĥaljona, so Me som Raj Devél, Devél, kiéli Me rosphandava len ĥamostyr, i Me zrakháva len odolengire vastéstyr, savé zalyne len dre navolia.

²⁸Narody na javéna te uhtylén len butedýr, feldýtka riskiribnáskire murdalá (zvieri) na javéna len te xan; jone javéna te dživén bi darákiro, nikón na strahakirela len.

²⁹I Me počhuvava dre phuv únta (sado) vaš lénge, na javéna jone te merén bokhátyr pe phuv; na javéla lénge ladžavo javire narodendyr.

³⁰I ĥaljona, so Me, Raj Devél, som léngiro Raj Devél, Me som lénca, a jone, Izrailjoskiro kher isyn Miro narodo,” — rakiréla Raj Devél, Devél.

³¹“I so tumé san Miré bakré, bakré Miré skedyibnástyr, tumé san manušá, a Me som tumaró Devél”, — rakiréla Raj Devél, Devél.