Read Biblija - Pe Baltitko Romani čib (Romanes) 2019 Baltic Romani Bible Jezekiljo 35 Bible Online

Jezekiljo 35 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 35

¹I sys ke me Ráskire-Devléskiro lav dasavo:

²“Manušéskiro čhava! Risjov Tyré mósa ke bérga Sieiro, phen pe láte angilphenybén.

³Phen láke: ‘Adiáke rakiréla Raj Devél, Devél: Ake, Me vydžava pe túte, bérga Sieiro, Me protyrdava pe túte Miro vast, Me keráva tut čhučé štetosa, kaj nikón na dživéla.

⁴Me rosphagirava Tyré fórja; tu kokori javésa čhučí i ĥaljosa, so Me som Raj Devél, Devél.

⁵Pal-dová, so tu na pirijačesa te xoliasos, tu otdesas Izrailjoskire čhavén dre vergéngire vastá, kóli javdiá pe lénde dasaví bibáht, kóli javdiá léngiro xasibén.

⁶Pal davá — ‘Te dživáv Me’, — rakiréla Raj Devél, Devél, Me keráva tut ratésa, rat javéla te tradelpe pal túte; tu naštý te dykhés, kóli čhuvelaspe rat, paldavá rat i tradelape pal túte.

⁷Me keráva bérga Sieiro čhučí, bimanušengiro maliasa (stiepjasa), xasiakiráva pe láte kažnones, kon te na prodžalas, kon te na risjolas.

⁸Pherdiakirava Me lákire vučé štéty domardé manušénca; pe tyré bérgicy, pe Tyré doly, pe saré Tyré xor štéty javéna te perén domardé kurtalása.

⁹Me keráva tútyr čhučí phuv, pe saré beršá, so na javéna te dživén dre Tyré fórja, i ĥaljona, so Me som Raj Devél, Devél.

¹⁰Pal-dová, so tu rakiresas: Kadalé duj narody, kadalé duj phuvjá javéna Miré, ame zalasa len, na podykhasa, so Raj Devél, Devél sys odój, —

¹¹Pal dová — ‘Te dživáv Me’ — rakiréla Raj Devél, Devél, — Me keráva túsa pir tyrí xolý ke jone, pir tyró zevlynypén, savó tu sykavesas, pal-dová so xoliasosas pe lénde; Me sykaváva Pes lénge, kóli Me javáva pharés te sendiakirav tut.

¹²I ĥaljosa, so Me, Raj Devél, Devél, šundjom saré tyré nalačhé lavá, savé tu rakiresas pe bérgi Izrailjoskire, kóli phenesas: “Čhučé (pusta) kakaná! Otdyné, sob (kaj) ame te xas len!”

¹³Tumé šarenaspe angíl Mánde tumaré čibása (čibjasa), but rakirénas pe Mánde: Me šunavas davá.

¹⁴Adiáke rakiréla Raj Devél, Devél: “Kóli sarí phuv javéla te radynélpe, Me keráva tútyr čhučí phuv.

¹⁵Syr tu radynesaspe, so čhučí jaciá Izrailjoskire-kheréskiri phuv, adiáke i Me keráva túsa: tu javésa čhučí, bérga Sieiro, khetané saré Idumejasa, i saré ĥaljona, so Me som Raj Devél, Devél.’”