Read Biblija - Pe Baltitko Romani čib (Romanes) 2019 Baltic Romani Bible Jezekiljo 36 Bible Online

Jezekiljo 36 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 36

¹“Tu, manušéskiro čhava, phen pir lav angilphenybén, pe Izrailjoskire bérgi, phen: ‘Bérgi Izrailjoskire! Šunén Ráskire-Devléskiro lav.

²Adiáke rakiréla Raj Devél, Devél: “Kóli vérgo rakiréla pal tuménde: A! a! aĥ garatune vučé štéty doresnepe aménge.”

³Phen pir lav angilphenybén, phen: “Adiáke rakiréla Raj Devél, Devél: “Pal dová, so jone čhučakirena tumen, xan saré rigéndyr, sob (kaj) te otdžan tumé ke javír narody, sob (kaj) košenas i sendiakirenas tumen manušá, —

⁴pal davá, Izrailjoskire bérgi, pošunen Ráskire-Devléskiro lav: Adiáke rakiréla Raj Devél, Devél pe bérgi i bérgicy, pe doly, pe rosphagirdé i čhučé kherá, pe jačade fórja, savé zalyne, i savéndyr sanpe naroy, so dživéna pašýl daja phuv.

⁵Paldavá adiáke rakiréla Raj Devél, Devél: “Dre Mirí zevlynypnaskiri jag Me phendjom lav pe javír narody, pe sarí Idumeja, pe narody, savé duminenas te zalen Mirí phuv péske; iléskire radymása i nalačhé dykhibnasa dro di kamenas te zalen la péske.”

⁶Pal davá phen pir lav angilphenybén pal Izrailjoskiri bérga, phen pe bérgi, bérgicy, féldy i doly: “Adiáke rakiréla Raj Devél, Devél: Áke, Me phendjom davá dro Miro zevlynypén, dre Mirí xolý, pal-dová, so sanpe tuméndyr narody.”

⁷Paldavá adiáke rakiréla Raj-Devél: “Me ĥazdyjom Miro vast, sovlahavas, so narody, savé isyn pašýl tuménde, kokoré lydžána péskiri ladž.

⁸A tumé, Izrailjoskiri bérga, rozmeken tumaré vétki, i tumé javéna te janén tumaré barjakirdé (plódy) vaš Miro narodo, Izrailjo, jone sýges javéna.

⁹Ake, Me risjováva ke tumé; pe tuménde javéna te barjakirén, pe tuménde javéna te sieinen.

¹⁰I Me bičhaváva, sob (kaj) te dživél tuménde but manušá, saró Izrailjoskiro kher, saró, i javéna te dživén dre fórja, i gazdena rosphagirdé kherá.

¹¹I Me keráva adiáke, so javéna but manušá, i murdalá ke tumé; lénde javéla but tyknore; Me bičhaváva tumen odorík, syr sys davá dro tumaró ĥaratuno časo: Me javáva te keráv tuménge lačhipén butýr, syr dro tumaró ĥaratuné dyvesá, i tumé ĥaljona, so Me som Raj Devél, Devél.

¹²Me janáva pe tuménde manušén, Miro narodo, Izrailjo, jone zalena tut, phuv tu jačesa léngiro meknó mištypén, tu butedýr na javésa te kerés léndyr bičhavorengire manušén.”

¹³Adiáke rakiréla Raj Devél, Devél: “Pal-dová, so rakiréna pal tuménde: ‘Tu san phuv, saví xála manušén, saví na déla čhavorén péskire narodoske?’”

¹⁴Pal dová, tu na javésa te xas manušén, tu na javésa te kerés, sob (kaj) te javél Tyró narodo bičhavorengiro:

¹⁵i tu na javésa te šunés butedýr, syr sanpe tútyr narody; košybén manušéngire rodóstyr Tu na vyrikiresa; tu na javésa te kerés butedýr, sob (kaj) te javél tyró narodo bičhavorengiro”, — rakiréla Raj Devél, Devél.

¹⁶I sys ke me Ráskire-Devléskiro lav dasavo:

¹⁷“Manušéskiro čhava! Kóli Izrailjoskiro kher dživelas pe péskiri phuv, jov magirelas la péskire džiibnasa, péskire rendonenca; léngiro drom angíl Miro muj sys sýrby by džuvliákiro nažužypen, dro časo, kóli joj žužakirelpe.

¹⁸Me vyčhudjom Mirí xolý pe lénde paló rat, savó čhuvelaspe lénca pe kadaja phuv, pal dová, so jone magirenas phuv péskire idolenca.

¹⁹Me rostradyjom len pir narody, jone isyn rosphurdyne pir phuvjá; Me sendiakiravas len pir léngire dromá i léngire réndy (diély).

²⁰I javné jone ke narody, giné ke Najudýtka nácyi (narody) i zalyne sláva Miré sventoné lavéstyr, pal dová, so pal lénde rakiréna: ‘Jone isyn Ráskire-Devléskiro narodo, jone vyginé Léskire phuvjátyr.’

²¹I potangindjom (požalindjom) Me Miro svénto lav, savéstyr otlyja sláva Izrailjoskiro kher Najudytkoné nacyiéndyr (narodonendyr), karik jone javné.

²²Paldavá phen Izrailjoskire kheréske: “Adiáke rakiréla Raj Devél, Devél: ‘Na vaš tuménge Me keráva davá, Izrailjoskiro kher, a vaš Miro svénto lav. Léstyr tumé otlyne sláva maškír narody, karik javné tumé.

²³Me svenciakirava Miro baró Lav, savéste nane sláva maškír Najudénde. Maškir javír narody tumé otlyne sláva Léstyr i ĥaljona narody, so Me som Raj Devél, Devél, — rakiréla Raj Devél, Devél, kóli Me sykaváva, so Me som svénto, pe tuménde, angíl léngire jakhá.

²⁴Me láva tumen Najudytkoné nacyiéndyr (narodendyr), kedava tumen saré rigéndyr, Me janáva tumen pe tumarí phuv.

²⁵I Me bryzginava tumen žužé paniésa, tumé žužakirenape saré tumaré magiripnastyr, Me žužakirava tumen saré tumaré idolendyr.

²⁶Me dáva tuménge nevó iló; nevó di Me dáva tuménge; Me láva tumaré ločatyr (plotiatyr) baruno iló, i Me dáva tuménge džidó iló.

²⁷I Me čhuváva dro tuménde Miro dúho (fáno), Me kedava dová, so tumé javéna te psirén pir Miré priphenybená; tumé javéna te kerén pir Miré lavá.

²⁸I javéna tumé te dživén pe phuv, saví Me dyjom tuménge, i tumé javéna Miro narodo, a Me javáva tumaró Devél.

²⁹I vyrakhava Me tumen saré tumaré nalačhipnastyr, Me prikharava maró, i ubarjakirava maró, Me na davá, sob (kaj) tumé te merén bokhátyr.

³⁰Me vybarjakirava barjakirdé (plódy) pe kaštá i barjakiriben pe féldy, sob (kaj) te na merén bokhátyr, sob (kaj) te na košen tumen narody.

³¹Tén'ci priripirena tumé pal zahale tumaré dromá, pal nalačhé tumaré réndy, i javéla džungaló (brytko) dro tumaró iló pal čoripén i biladžakuné réndy, savé tumé kerénas.

³²‘Na vaš tuménge Me keráva davá,’ — rakiréla Raj Devél, Devél. — “Mek te loljol tumaró muj, mek te ladžan tumé tumaré dromendyr, Izrailjoskiro kher.”

³³Adiáke rakiréla Raj Devél, Devél: ‘Dro dová dyvés, kóli Me žužakirava tumen saré tumaré čoripnástyr, Me bičhaváva manušén dre fórja, sob (kaj) te dživén odój, kóli ĥazdéna rosphagirdé kherá.

³⁴I javéna te barjakirén pe phuv, saví sys čhučí, i kažno, kon odój džálas, dykhélas, so joj sys čhučí.

³⁵Tén'ci phenéna: “Kadaja čhučí phuv kerdiápe syr Edemoskiri únta (sado); so i dre kadalé rosphagirdé, čhučé, občorde fórja dživéna manušá?”

³⁶I ĥaljona Najudýtka nácyi (narody), savé dživéna pašýl tuménde, so Me, Raj Devél, ĥazdáva rosphagirdo, Me barjakirava pe čhučó štéto, Me, Raj Devél, phendjom i kerdjom.

³⁷Adiáke rakiréla Raj Devél: “Ake, iščo (inké) Me sykaváva Miro kamlypen ke Izrailjoskiro kher dre dová, so keráva adiáke, sob (kaj) te javél adiáke but manušén syr pe bakrengiri stada.

³⁸Syr but isyn dyibnytka bakré dro Jerusalimo, pe svénki, adiáke javéla pherdó manušénca dre čhučé fórja, i jone ĥaljona, so Me som Raj Devél, Devél.”