Read Biblija - Pe Baltitko Romani čib (Romanes) 2019 Baltic Romani Bible Jezekiljo 37 Bible Online

Jezekiljo 37 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 37

¹Sys pe mánde Ráskire-Devléskiro vast. O Raj Devél, Devél vylydžijá man duhósa i čhudiá man maškír félda, saví sys pherdý kokalenca.

²Oblydžija man pašýl lénde, ake, drieván but sys kokalý pe félda, ake, jone isyn drieván šuké.

³I phendiá mánge: “Manušéskiro čhava! Otžidjona li kadalé kokalý?” Me phendjom: “Rajo Dévla! Tu džinésa davá.”

⁴I phendiá mánge: “Phen pir lav angilphenybén pe kadalé kokalý, phen lénge: ‘Šuké kokalý! Šunén Ráskire-Devléskiro lav!

⁵Adiáke rakiréla Raj Devél, Devél pe kadalé kokalý: ‘Ake, Me čhuváva dúho (fáno) dre tuménde, tumé otdžidjona.

⁶I Me občhuvava tumen žylenca, vybarjakirava pe tuménde masá, učhakirava tumen cypasa, zalydžava dre tuménde dúho (fáno); i tumé otdžidjona, i ĥaljona, so Me som Raj Devél.’”

⁷Me phendjom angilphenybén, i syr sys mánge priphendlo, i kiéli Me angilphenavas, to ĥazdyjápe šumo, i ake, ĥazdynépe, jačné te poddžan jekh kokalo ke javír, kokalo ke kokalo.

⁸I Me dykhcjom! Ake, žyly sys pe lénde, vybarine masá, cýpa učhakirdiá len upralestyr, ne dúho (fáno) na sys dre lénde.

⁹Tén'ci Jov phendiá mánge: “Phen pir lav angilphenybén duhoske, manušéskiro čhava, phen duhoske: ‘Adiáke rakiréla Raj Devél, Devél: Jav, dúho (fáno), štaré balvaliendyr, phurde pe kadalé domardende, i jone otdžidjona.’”

¹⁰I me phendjom angilphenybén, syr Jov priphendiá mánge, i zagijá dre lénde dúho (fáno), i jone džidyne, uštyné pe péskire ĥerá, drieván baró, ke dar baró skedyibén.

¹¹I phendiá Jov mánge: “Manušéskiro čhava! Kadalé kokalý isyn saró Izrailjoskiro kher. Ake, jone rakiréna: “Vyšutine amaré kokalý, xasijá amaró patiaibén (nadiéia), ame sam otriskirde kaštéstyr.”

¹²Paldavá phen pir lav angilphenybén, phen lénge: “Adiáke rakiréla Raj Devél, Devél: Ake, Me otkerava tumaré mulykane (ĥroby), vylydžava tumen, Miro narodo, tumaré mulykanendyr, zalydžava tumen dro Izrailjoskiri phuv.

¹³I tumé ĥaljona, so Me som Raj Devél, Devél, kóli Me otkerava tumaré mulykane, i vylydžava Me tumen, Miro narodo, tumaré mulykanendyr.

¹⁴Me čhuváva dre tuménde Miro dúho (fáno), i tumé otdžidjona, zalydžava tumen pe tumarí phuv, i galjona, so Me Raj Devél, Devél, phendjom davá i kerdjom,’” — rakiréla Raj Devél, Devél.

¹⁵I sys ke Ráskire-Devléskiro lav dasavo:

¹⁶“Tu, manušéskiro čhava, le péske jekh kralítko destó (žezlo), začhin pe léste: ‘Judáske i Izrailjoskire čhavénge, savé isyn khetané lésa.” Le iščo (inké) destó, začhin pe léste: “Jozáske, davá isyn Jefriemoskiro i saré Izrailjoskiro kheréskiro, savó isyn khetané Jefriemosa, kralítko destó.’

¹⁷Čhuv len khetané jekh ke javír, dro jekh destó, sob (kaj) jone te javén jekh dro tyró vast.

¹⁸A kóli phučenape tútyr čhavé Tyré narodóstyr: “Ci na rosphenesa Tu aménge, so davá isyn túte?”

¹⁹Tén'ci phen lénge: ‘Adiáke, rakiréla Raj Devél, Devél: Ake, Me láva Jozaskiro i Izrailjoskire — kralítko destó, savó isyn dro Jefriemoskiro vast, Me čhuváva len ke Judáskiro destó, Me keráva léndyr jekh destó, i javéla jekh dro Miro vast.

²⁰Kóli ž duj desté, pe savé tu začhinesa, javéna dro tyró vast angíl léngire jakhá,

²¹to phen lénge: ‘Adiáke rakiréla Raj Devél, Devél: Ake, Me láva Izrailjoskire čhavén narodendyr, maškír savé jone dživénas, Me kedava len khetané saré rigéndyr, Me janáva len pe léngiri phuv.

²²Pe kadaja phuv, pe Izrailjoskire bérgi, Me keráva léndyr jekh narodo, jekh králi javéla králi vaš lénge sarénge; na javéna butedýr duj narody, na javéna te rozmarenpe pe duj kralipená.

²³Na javéna te magirén pes idolenca i péskire džungalé rendénca i péskire čoripnasa, ne Me zrakháva len saré šteténdyr, kaj jone dživénas dre gréhi, žužakirava len, i jone javéna Miré manušá, a Me javáva léngiro Devél.

²⁴A Miro pishári, Davído, javéla léngiro králi i Čhupnári (Pastúho), jone javéna te psirén dre Miré priphenybená, javéna te kerén pir Miré lavá.

²⁵Tén'ci jone javéna te dživén pe phuv, saví Me dyjom Miré pisharíske Jakovóske, pe saví dživénas léngire dadá; odój jone javéna viéčnes te dživén jone, léngire čhavoré, léngire — čhavorengire čhavoré; i Miro pishári Davído javéla thagári pe lénde pe saré viéki.

²⁶I butýr Me keráva lénca ramanjono (mírno) zavieto; viéčno zavieto javéla lénca. Me dáva lénge lačhó džiibén, adiáke, sob (kaj) but len te javél, Me čhuváva maškír lénde Miro svénto štéto pe saré beršá.

²⁷Mirí šátra javéla lénde; i Me javáva léngiro Devél, a jone javéna Miro narodo.

²⁸I ĥaljona narody, so Me som Raj Devél, Devél, Savó obsvencynela Izrailjo, kiéli Miro svénto štéto jačélape maškír lénde pe saré beršá.’”