Read Biblija - Pe Baltitko Romani čib (Romanes) 2019 Baltic Romani Bible Jezekiljo 39 Bible Online

Jezekiljo 39 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 39

¹“Paldavá tu, manušéskiro čhava, phen pir lav angilphenybén pe Gogaste, phen: ‘Adiáke rakiréla Raj Devél, Devél: Ake, Me som proti túte, Goge, Rošoskiro Miešehoskiro i Fuvaloskiro thagári!

²I Me riskiráva pale tut, i Me lydžáva tut, i lydžáva Me tut paš-ratitkoné (sieviernone) rigátyr, Me janáva tut pe Izrailjoskire bérgi.

³Me vymarava Tyró lúko tyré zervone (lievone) vastéstyr, Me vyčhurdava tyré maribnýtka bustiá (striély) tyré čačé (pravone) vastéstyr.

⁴Tu peresa pe Izrailjoskire bérgi, tu i saré tyré xaladéngire polki, saré narody, savé isyn túsa; Me otdáva, sob (kaj) te xan tut riskiribnáskire (xiščna) čirikliá i feldýtka riskiribnáskire murdalá.

⁵Peresa tu pe otkerdy félda pal dová, so Me phendjom davá, — rakiréla Raj Devél, Devél.

⁶Me bičhaváva jag pe phuv ‘Magog’, pe manušénde, savé dživéna pe ostrovy bi daripnaskiro, i nisó na duminen pal péste, i jone ĥaljona, so Me som Raj Devél, Devél.

⁷I sykaváva Me Miro svénto lav maškír Miro narodo, Izrailjo, Me na davá butedýr, sob (kaj) te magirén Miro svénto lav, i ĥaljona narody, so Me som Raj Devél, Devél, Svénto pe Izrailjo.

⁸Ake, davá javéla, pherdiakirelape, rakiréla Raj Devél, Devél: davá isyn kodová dyvés, pal savó Me phendjom.

⁹Tén'ci vydžána manušá, savé dživéna dre Izrailjoskire fórja, zahačkirna jag, javéna te xačkirén mardýtko (oružyjo), ščýty, ščytki sastruné, luki i maribnýtka bustiá, bulavy i čhurdybnytka bustiá (kop'i) i jone javéna te xačkirén kadalé eftá (bitrinéngiro deš) berš.

¹⁰Na javéna jone te janén kaštá feldatyr, na javéna te keden len dro veš, ne javéna te xačkirén jekh mardytka; jone občorena dolen, kon léndyr čorelas, zalena odoléndyr, kon léndyr zalelas”, — rakiréla Raj Devél, Devél.

¹¹“Javéla dro dová dyvés: Me dáva Gogaske štéto vaš meribén dro Izrailjo: dólo, kaj prodžána manušá, pe vastóko morjostyr (derjavestyr); davá štéto javéla te zarikirel kažnones, kon te na džálas pašýl odój; garavena odój Gogas i saró léskiro-xaladybén; javéna te kharén davá štéto, Gogaskire xaladéngiro taboroskiro dólo.

¹²Eftá čhoná javéla te garavel len Izrailjoskiro kher, sob (kaj) te žužakirel phuv.

¹³Narodo saré phuvjátyr javéla te garavel len; baró javéla dová dyvés, kóli Me sykaváva Péskiri sláva, — rakiréla Raj Devél, Devél.

¹⁴I vykedena manušén, savé javéna te obdžan phuv bi terdypnaskiro, i savé javéna te garaven kodolén, savé jačnépe pe phuv khetané manušénca, savé javéna te prodžan odój, sob (kaj) phuv te žužakirelpe; jone léna te rodén davá, kóli prodžála eftá čhoná.

¹⁵A kóli vari-kon odoléndyr, savé javéna te obdžan phuv, dykhéla manušéskiro kokalo, tén'či čhuvéla pašýl léste špéra (znako), sob (kaj) odolé, savé garavena, te garaven les dro dólo, kaj sys Gogaskiro baró ke dar xaladybén.

¹⁶Foróskiro lav javéla: Ĥamona[2]. Adiáke žužakirena (vyčystinena) jone phuv.”

¹⁷“A tu, manušéskiro čhava, adiáke rakiréla Raj Devél, Devél: Phen saré čiriklenge i sarénge feldytkone murdalénge: ‘Skedénpe, džán, skedénpe saré rigéndyr ke Miro vysvencindlo xabén, savó Me keráva vaš tuménge; ke baró sventytko xabén pe Izrailjoskire bérgi; tumé javéna te xan mas, javéna te p'jen rat.

¹⁸Zoralé-muršengiro mas javéna te xan; javéna te p'jen rat thagar'jengiro (kniaziengiro) pe phuv, bakrengiro, bakrorengiro, buznengiro (kozlengiro) guruvengiro, sarengiro, konés čaravenas pe Vasáno.

¹⁹Tumé javéna te xan i javéna čale; tumé javéna te p'jen rat i javéna mate Miré vysvencyndle xabnastyr, savó Me začhinava vaš tuménge.

²⁰I javéna tumé čale paló Miro skamínd grenca, manušénca, savé tradéna uklisté, zoralé muršenca maribnaskire, i javire xaladytkone manušénca” — , rakiréla Raj Devél, Devél.

²¹“I sykaváva Me Mirí sláva maškír Najudýtka nácyi (narody); saré narody dykhéna Miro séndo, savó Me keráva; dykhéna Miro vast, savó Me čhuváva pe lénde.

²²Paldavá javéla te džinél Izrailjoskiro kher, so Me som léngiro Raj Devél, Devél, léngiro Devél dalé dyveséstyr i duredýr.

²³I ĥaljona Najudýtka nácyi, so kher Izrailjoskiro sys vytradyno péskire phuvjátyr pal léngiro xohaibén, pal-dová, so jone xohavenas Man, Me zakerdjom léndyr Miro muj, otdyjom len dre léngire-vergéngire vastá, saré jone myné kurtalátyr.

²⁴Pal léngiro nažužypen, pal léngiro čoripén Me kerdjom dalenca davá, i zakerdjom léndyr Miro muj.

²⁵Paldavá adiáke rakiréla Raj-Devél, Devél: ‘Akaná riskiráva Me Jakovós plienóstyr, i potanginava (požalinava) saró Izrailjoskiro kher, Me javáva te zevlynav pir Miro svénto lav.

²⁶I ĥaljona jone péskiro biladžakiriben, i saré péskire napatiaiben, savó kerénas angíl Mánde, kóli javéna te dživén pe peskri phuv bi darákiro, nikón na javéla te strahakirel len.

²⁷Kóli Me riskiráva len narodonendyr, skedáva len léngire vergéngire phuv'jendyr, i Me sykaváva Pes dre lénde, so Me som Svénto angíl but narodonengire jakhá.

²⁸I ĥaljona, so Me som léngiro Raj Devél, Devél, kóli rostradava len maškír narody, a tén'či skedáva len pe léngiri phuv, i Me na jačavava (jačkirava) odój nikonés léndyr.

²⁹Me na javáva te zakerav léndyr Miro muj, pal-dová, so Me čhuváva Miro di pe Izrailjoskiro kher”, — rakiréla Raj Devél, Devél.