Read Biblija - Pe Baltitko Romani čib (Romanes) 2019 Baltic Romani Bible Jezekiljo 4 Bible Online

Jezekiljo 4 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 4

¹Tu, Manušéskiro čhavó, le péske kirpičo (ceglo), čhuv les angíl túte. Ker pe léste čertjožo (patrín) foroske Jerusalimoske.

²I ker adiáke, sob (kaj) te javén terdé manušá xaladybnasa, so občhude trusciál léskire vánty, sob (kaj) te javél vyčhudo phuvjátyr valo, rosčhuv xaladengirjo táboro (lod (lagierjo)) i rosčhuv mašyny, so phagirena vánty.

³Le péske sastruny phal i čhuv la syr sastruny vánta maškír túte i maškír fóro, i dykh pe fóro. Pe fóro ĥazdénape vérgi, a akaná tu ker, syr jone. Kadavá javéla ĥiertýk (sykaibén) Izrailjoskire kheréske.

⁴A tu pasjov pe tyró zérvo pašvaro, čhuv pe léste Izrailjoskire-kheréskiro čoripén. Kicý dyvesá tu javésa te pasjos, adákicy dyvesá tu javésa te lydžas léngiro čoripén.

⁵Me vykedyjom túke beršá, so tu javésa te lydžas léngiro čoripén (kára): trinšelá te dešujenia dyvesá tu javésa te lydžas čoripén kheréskiro Izrailjoskiro.

⁶Kóli tu kerésa saró adiáke, to javír mólo pasjov pe čačó (pravo) pašvaro, i štardešá dyvesá lýdža pe péste Judáskire-kheréskiro čoripén, dyvés pal berš, dyvés pal berš, syr Me vykedyjom túke.

⁷Ĥazde tyró muj i tyró nango čačó vast pe Jerusalimo, i angilphen (proročyn) pe léste.

⁸Ake, Me phandava tut, sob (kaj) tu te na risjos jekhe rigátyr pe javír dakicy but, syr tu končynesa dyvesá.

⁹Le péske parnó giv (givny), gersto (vorzo), nukle (boby), linsa (čečevica), proso i vika, i čhuv len dro jekh khoró, i ker léndyr péske maró. Tu javésa te xas les adákicy dyvesá, kicý javésa tu te pasjos: trin šelá te jeniadeša dyvesá.

¹⁰Tu javésa te xas tyró xabén pir biš šekeli pharipnasa (viesosa) dro dyvés, xa les dro péskiro uliago (pora).

¹¹I paní pi nábut, pi paní dro péskiro uliago (pora).

¹²I xa peskro xabén syr gerstytko maró, i pek len pe manušéngiro nažužypen, adiáke, sob (kaj) manušá te dykhén.

¹³Tén'ci phendiá Raj Devél, Devél: “Adiáke Izrailjoskire čhavé javéna te xan peskro nažužo maró maškír kodolé narody, ke savé Me vytradava len.”

¹⁴Me phendjom: “O, Rajo Devlale! Nikoli me na sómas magirdó miré ternypnastyr, me na xavas mulé-murdaleskiro mas, me na xavas i dová, so roskuscia riskiribnáskiro murdál (zvierjo). Nisavó nažužo mas me na xajom.”

¹⁵Tén'ci Raj Devél, Devél phendiá mánge: “Ake, Me domekava, sob (kaj) tu te pekes péskiro maró pe guruvniakiro nažužipen”

¹⁶I phendiá iščo (inké) Jov mánge: “Manušéskiro čhava! Ake, Me otlava Jerusalimóstyr maró, so déla džiibén. Javéna te xan maró pir koterá (kuski) i jasvénca, javéna te p'jen paní pir tahtáj (čaša) i darása.

¹⁷Pal-dová so na javéla lénde maró i paní. Jone darása javéna te dykhén jekh pe javiréste, i jone xasjona dre péskire čoripena.