Read Biblija - Pe Baltitko Romani čib (Romanes) 2019 Baltic Romani Bible Jezekiljo 40 Bible Online

Jezekiljo 40 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 40

¹Dro biš te pándžto berš, kóli ame vytradyjam, kóli lyjape berš, pe déšto čhonytko dyvés, dro dešuštarto berš, kóli sys rosphagirdo fóro, dro dová-pac' dyvés sys pe mánde Ráskire-Devléskiro vast, i Jov lydžijá man odorík.

²Dro dykhibén Devléstyr Jov lydžijá man pe Izrailjoskiro phuv, čhudiá man pe drieván vučí bérga, i pe láte kažnoné rigátyr sys sýrby patrín (risunko) pe foritka kherá.

³I lydžijá man odorík. Ake, sys manúš, savó vydykhelas sýrby xarkóma (mied'), kóli joj xačola, dro léskiro vast sys šelo ljonostyr (ĥandladestyr) i destó, savésa ginéna; jov sys terdó pašýl pórta.

⁴I phendiá mánge adavá manúš: “‘Čhavó manušéskiro! Dykh péskre jakhénca i šun péskre kanenca, i prilé ilésa saró, so Me javáva te sykavav túke, pal-dová so tut jandlé vaš odová, sob (kaj) me te sykavav túke davá saró, so tu dykhésa, phen zoralés Izrailjoskire kheréske.”

⁵Ake, paló khangirí sys vánta saré léskire rigéndyr, a dro kodolé — muršeskiro vast sys destó vaš ginybén, dre šov kuniá; kažno kun' ginelaspe baripnasa syr burnyk (ladoška): jov vygindiá dro kadavá Kher jekh destó buĥlypén, jekh destó vučipén.

⁶Tén'ci gijá jov ke pórta, saví sys riskirdy ke vastóko; zagijá dre láte, vygindiá dre jekh portakiro progo sys jekh destó buĥlypén, i dro javír progo sys jekh destó buĥlypén.

⁷Dre každo štúba pe rigá vaš rakhibnar'jenge sys jekh destó dlugipén, jekh destó buĥlypén, maškír štúby sys pandž kuniá, i dro portakiro progo, pašýl portakiro trémo (koridoro) sys jekh destó!

⁸I vygindiá jov andrál dre portakire tremy jekh destó.

⁹A pašýl pórta, dre tremy, vygindiá ohtó (bidujéngiro deš) kuniá (lokci) i duj kuniá dre stýlby. Kadavá trémo sys pašýl pórta, saví sys khangirjákire rigátyr.

¹⁰Štubicy vaš rakhibnar'jenge pašýl vastočno pórta sys: trin jekhe rigátyr i trin javire rigátyr; jekh miéra (vyginyben) dre saré trin štubicy, jekh vyginyben pir stýlby jekhe i javire rigátyr.

¹¹Portakiro buĥlypén jov vygindiá deš kuniá, a portakiro dlugipén sys dešutrin kuniá.

¹²A angíl štúby sys vystupo dre jekh kun', i vánta dre jekh kun' javire rigátyr; dre dalé štúby sys šov kuniá jekhe rigátyr i šov kuniá javire rigátyr.

¹³Tén'ci vygindiá jov dre pórta jekhe štubakire upralypnastyr ke javír štubakiro upralypén biš te pandž kuniá buĥlypén; vudár sys terdó angíl javír vudár.

¹⁴A pir stýlby vygindiá jov šovdešá kuniá, dre kažno stýlbo pašýl gréda i pašýl pórta.

¹⁵I anglatuné rigátyr dro zagiibén rigátyr ke anglatuny portakiri rig sys pandždešá kuniá.

¹⁶Fenštry riešotkenca sys dre štúby vaš rakhibnar'jenge, pe léngire stýlby andrál pórty jone sys terdé; dre trémo sys fenštry, jone lydžánas pe andralatuny rig, a pe stýlby sys pal'my.

¹⁷Jov jandiá man dre gréda, so sys javrí, ake, odój sys štúby trusciál, gréda sys kerdy geristosa (dromoresa); trijánda štúby sys dro dová kher, so vydžánas pe baruno ĥeristo.

¹⁸Davá ĥeristo (dromoro) sys pašýl pórta pir portakiro dlugipén, kodová ĥeristo sys telydyr.

¹⁹I vygindiá jov dlugipén telatuné portatyr ke andralatuny portakiri rig, saví sys javrí, šel kuniá ke vastóko i paš-ratítko (sievierno) rig.

²⁰Jov vygindiá dlugipén i buĥlypén portakiro, saví sys dre gréda, so javrí, saví sys riskirdy ke paš-ratítko rig.

²¹I sys štúby pir rigá (boki), savé sys pašýl láte; trin štúby jekhe rigátyr, trin štúby javire rigátyr, léngire stýlby, léngiro trémo sys dasavé-pac', syr pórta, saví sys angledýr; léngiro dlugipén sys pandždešá kuniá, a buĥlypén — biš te pandž kuniá.

²²Léngire fenštry (dudalia), i léngiro svody syr vystupy, léngire pal'my sys dasavé-pac' baripnasa (mierasa), syr sys pórta, saví vydžálas pe vastóko, dre lénde zadžanas pir eftá ĥerunia (stupieni) i angíl lénde sys trémo.

²³Pórta vydžála ke andralatuny gréda angíl paš-ratítko (sievierno) vastočno pórta; jov vygindiá (vymierindia) portatyr ke pórta šel kuniá (lokci).

²⁴I jandiá jov man pe paš-dyvesýtko (južno) rig, ake, odój sys paš-dyvesýtko pórta; jov vygindiá pir stýlby i ĥerunia (stupien'ki) adákicy, syr sys angledýr.

²⁵Dre lénde angíl léngire vudará sys fenštry dasavé, syr sys kodolé fenštry: dlugipnasa sys jone pandždešá kuniá, a buĥlypnasa — biš te pandž kuniá.

²⁶Sob (kaj) te ĥazdespe ke jone, treindiá te prodžas eftá ĥerunia, angíl lénde sys vudará, ukedyiben pal'mendyr — jekh dolé rigátyr, jekh javire rigátyr pe léngire stýlby.

²⁷Sys paš-ratítko pórta dre andratuný gréda, jov vygindiá jekhe portatyr ke javír pórta šel kuniá.

²⁸Jov lydžijá man ke paš-dyvesýtko (južno) pórta, a odothýr — pe anglatuny gréda; vygindiá jov dre paš-dyvesýtko (južno) pórta adákicy, syr sys angledýr.

²⁹Léngire štúby pir rigá, savé sys pašedyr ke jagóro, léngire stýlby i tremy (vystupy) — sys dro dasaví-pac' miéra; i fenštry sys dre lénde, i dre léngire tremy trusciál (krugom); saró sys dlugipnasa pandždešá kuniá, buĥlypnasa biš te pandž kuniá.

³⁰Tremy sys trusciál; léngiro dlugipén sys biš te pandž kuniá, a buĥlypén sys pandž kuniá.

³¹Sys lénde tremy, savé vydžánas pe andratuný gréda; pal'my sys pe léngire stýlby; sob (kaj) te ĥazdénpe ke jone, treindiá te prodžan ohtó ĥerunia (stupieni).

³²I jandiá jov man ke vastočno pórta, a odothýr — dre andratuný gréda (dvóro); vygindiá jov dre daja pórta dasaví-pac' miéra.

³³Léngire štúby pir rigá, savé sys pašedyr ke jagóro (krajo) léngire stýlby, léngire tremy sys dro dasaví-pac' miéra; i fenštry dre lénde, i dre léngire tremy sys trusciál; dlugipén sys pandždešá kuniá, a buĥlypén — biš te pandž kuniá.

³⁴Léngire tremy vydžánas pe gréda (dvóro), so sys javrí, pe léngire stýlby sys pal'my jekhe i javire rigátyr; sob (kaj) te ĥazdénpe ke jone, treindiá te prodžan ohtó ‘gerunia (stupieni).

³⁵Tén'ci o manúš lydžijá man ke paš-ratítko (južno) pórta; vygindiá odój saví-pac' miéra.

³⁶Štúby pir rigá (boki), savé sys pašýl lénde; léngire stýlby i léngire tremy; i fenštry dre lénde sys trusciál; sarengiro dlugipén sys pandždešá kuniá, a buĥlypén biš te pandž kuniá.

³⁷Léngire tremy vydžánas pe gréda (dvóro), so sys javrí; pal'my sys pe léngire stýlby jekhe i javire rigátyr, sob (kaj) te ĥazdénpe ke jone, treindiá te prodžan ohtó ‘gerunia.

³⁸Sys adiáke-pac' štúba zagiibnasa pašýl portakire stýlby: odój vymorena shačkiribnytka svénta dyibená (žertvy).

³⁹A dro trémo, savó sys pašýl pórta, sys duj skaminda: jekhe rigátyr i duj skaminda javire rigátyr, sob (kaj) te začhines pe lénde shačkiribnytka svénta dyibená, svénto dyibén paló grého, svénto dyibén paló čoripén.

⁴⁰I pašýl odoia rig, saví vydžálas javrí, pašo zagiibén pir paš-ratítko pórta sys duj skaminda; i pašýl javír rig, pašýl portakiro trémo sys duj skaminda.

⁴¹Štar skaminda sys jekhe rigátyr, štar skaminda-javire rigátyr, — pašýl pórta; khetané-ohtó skaminda, pe savé začhinenas svénta dyibená.

⁴²Sys štar skaminda vyčingirde barendyr vaš dová, sob (kaj) te xačkires svénta dyibená; léngiro dlugipén sys jekh te paš kuniá, buĥlypén sys jekh te paš kuniá, a vučipén jekh kun'; pe lénde čhuvénas dolé strumiénty, sósa začhinenas svénta dyibená te xačkirén i vaš javír dyibená.

⁴³Sastruné nangle dre jekh burnyk (ladoška) buĥlypnasa sys primarde ke kherítka vánty trusciál, a pe skaminda čhuvénas dyibnytko mas.

⁴⁴Paló andratuný pórta sys štúby vaš bagibnaskirenge; pe andratuný gréda, pašýl paš-ratítko pórta, jekh vydžálas pe paš-dyvesýtko rig, a javír, pašýl paš-dyvesýtko (južno) pórta, vydžálas pe paš-ratítko (sievierno) rig.

⁴⁵Jov phendiá mánge: “Kadaja štúba (komora), saví vydžála pe paš-dyvesýtko rig, isyn vaš rašange, savé rakhenas Khangirí.

⁴⁶A štúba, saví vydžála pe paš-ratítko rig, isyn vaš rašange, savé rakhenas altárjo: kadalé isyn Sadokoskire čhavé, jekhdžine manušá Lievijoskire čhavéndyr, savé javénas pašyledýr ke Raj Devél, Devél, sob (kaj) te kerén butý vaš Léske.

⁴⁷I vygindiá jov dre gréda (dvóro) šel kuniá dro dlugipén i šel kuniá dro buĥlypén, joj (gréda) sys štaré-venglytko (láte sys štar véngly), a angíl Khangirí sys terdó altárjo.

⁴⁸Jov jandiá man ke Khangirjákiro trémo; vygindiá pir tremitka stýlby pandž kuniá jekhe rigátyr i pandž kuniá javire rigátyr, a dre pórta sys trin kuniá buĥlypén jekhe rigátyr i trin kuniá javire rigátyr.

⁴⁹Tremitko buĥlypén — biš kuniá, a dlugipén — dešujekh kuniá, sob (kaj) te ĥazdénpe ke jov, treindiá te prodžan deš ĥerunia (stupieni); stýlby rikirnas trémo jekhe i javire rigátyr.