Read Biblija - Pe Baltitko Romani čib (Romanes) 2019 Baltic Romani Bible Jezekiljo 41 Bible Online

Jezekiljo 41 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 41

¹Tén'ci lydžijá jov man dre Khangirí i vygindiá pir stýlby šov kuniá buĥlypén jekhe rigátyr i šov kuniá buĥlypén javire rigátyr — davá sys skinijakiro (šatrakiro) buĥlypén.

²Dre vudará sys deš kuniá buĥlypén, pir vudaritka rigá sys pandž kuniá jekhe rigátyr i pandž kuniá javire rigátyr; vygindiá dlugipén dre Khangirí — štardešá kuniá, a buĥlypén biš kuniá.

³Zagijá jov andré, vygindiá pir stýlby pašýl vudár duj kuniá, i dro vudár šov kuniá, a vudaritko buĥlypén — sys eftá kuniá.

⁴Vygindiá dre léste biš kuniá dro dlugipén i biš kuniá dro sventoné-štetoskiro buĥlypén, i phendiá mánge: “Davá isyn Svénto-sventonestyr štéto”

⁵Vygindiá jov dre Khangirjákiri vánta šov kuniá, a buĥlypén dre štúby, savé sys pašyledýr, trusciál Khangirí, pir štar kuniá.

⁶Sys trijánda te trin štúby (komory) pe rigá, štúba pašýl štúba; jone zadžána dre vánta, saví sys pašýl Khangirí vaš štúby, trusciál adiáke, so jone sys khetané kadalé vantasa, ne dre khangirjákiri vánta jone na zadžanas.

⁷Ne Khangirí butýr i butýr buĥljolas trusciál i uprál štubenca, savé sys pir rigá, dre Khangirí krenglypen buĥljolas upré, telatuné etažostyr štúby ĥazdenaspe dro upralatuno pir maškiratuno etažo.

⁸I me dykhcjom Khangirjákire upralypén pir saró krenglypen (okružnost'), štúby, savé sys pir rigá pe phuv, sys pherdó destó, šov pherdé kuniá.

⁹Vantytko buĥlypén dre štúby, savé sys pir rigá i vydžánas javrí, sys pandž kuniá sys otkerdo štéto, pašýl štúby pir rigá dre Khangirí.

¹⁰Duripen maškír štúby sys biš kuniá, trusciál sarí Khangirí.

¹¹Vudará dre štúby, savé sys pir rigá, vydžánas pe otkerdo štéto: jekh vudár — pe paš-ratítko, a javír vudár — pe paš-dyvesýtko rig; kadalé otkerde-štetoskiro buĥlypén sys pandž kuniá trusciál.

¹²Khangiritko buglypen angíl foruný (plóšča) pe západno rig sys eftadešá kuniá; sarí daja Khangiritko vánta sys dre pandž kuniá buĥlypnasa, a lákiro dlugipén sys jeniadeša kuniá.

¹³Jov vygindiá dre Khangirí šel kuniá dlugipén — dro dová anglatunó štéto, dro dová kher, so sys prikerdo, dre léskire vánty sys šel kuniá dlugipén.

¹⁴Khangiritko buĥlypén pir odoia rig, saví isyn dykhny, lydžála ke javrituny gréda, saví vydžálas pe vastóko, sys šel kuniá.

¹⁵Dro saró Khangirjakiro dlugipén angíl foruný (plóšča) pe léskiri palatuny rig, štubenca, savé sys pir rigá, jekhe i javire rigátyr jov vygindiá šel kuniá khetané dolesa, so sys andrál Khangirí i tremenca, savé sys dre gréda (dvóro).

¹⁶Vudarengire stýlby, fenštry rišotkenca (kratenca), štúby savé sys pir rigá trusciál, dre saré trin etažy angíl progi sys občhude kaštesa, petostyr (polostyr) ke fenštry; fenštry sys zakerde.

¹⁷Vudaritkone upralypnastyr, syr andrál Khangirí, adiáke-pac' i javrí, pir sarí vánta trusciál, andré i javrí sys vyčhindlé formy kaštéstyr.

¹⁸Sys kerdé xieruvimy i pal'my: pal'ma maškír duj xieruvimy; dro kažno xieruvimo sys duj muiá.

¹⁹Jekhe rigátyr dykhélas pe pal'ma manušéskiro muj, a javire rigátyr — ščeroskiro (lievoskiro) muj, adiáke sys kerdó dre sarí Khangirí trusciál.

²⁰Petostyr (polostyr) ke vudaritko upralypén sys vyčhindlé xieruvimy i pal'my, adiáke sys i pir Khangirjákiri vánta.

²¹Dre Khangirí sys štar venglytka vudarengire stýlby, svénto štéto vydykhelas adiáke, syr me les dykhcjom.

²²Altárjo sys kaštuno, léskiro vučipén — trin kuniá, dlugipén — duj kuniá, léskire véngly, dová pe so jov sys terdó; léskire vánty — kaštéstyr. I phendiá manúš mánge: “Kadavá isyn skamínd, savó sys terdó angíl Raste-Devléste.”

²³Dre Khangirí i dro svénto štéto sys pir duj vudará.

²⁴Dre dalé vudará sys pir duj phalia pe zaviesy (začhude), dalé phalia ĥazdenaspe; duj phalia sys pašo jekh vudár, duj phalia sys pašo javír vudár.

²⁵Pe lénde, pe Khangirjákire vudará, sys vyčhindlé xieruvimy i pal'my, dasavé-pac', syr pe vánty, a angíl trémo javrí sys kaštuno ĥieristo (pomosto).

²⁶Fenštry pal'menca jekhe i javire rigátyr sys pašýl trémo i dre Khangirjákire štúby, savé sys pir rigá, pe kašt, savésa sys odój občhudo.