Read Biblija - Pe Baltitko Romani čib (Romanes) 2019 Baltic Romani Bible Jezekiljo 42 Bible Online

Jezekiljo 42 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 42

¹Tén'ci vylydžijá jov, adavá-pac' manúš, man pe gréda, saví sys javrí paš-ratitkoné droméstyr, jandiá man ke štúby, savé sys angíl foruný (plóšča), angíl kher Khangirjákiro pe paš-ratítko (sievierno) rig.

²Ke dová štéto, savó pašo paš-ratítko vudár sys dro dlugipén šel kuniá, a dro buglypen — pandždešá kuniá.

³Angíl andratuný gréda (dvóro), saví sys biš kuniá, angíl geristo (pomosto) sys kerdé barestyr, savó sys pe odoia gréda, saví vydžálas javrí, sys trémo angíl trémo dre trin etažy.

⁴Angíl štúby sys zagiibén, léskiro buĥlypén sys deš kuniá, a andré — dre jekh kun'; léngire vudará vydžánas pe paš-ratítko rig.

⁵Upralatune štúby na sys dasavé buĥle, syr telatuné i maškiratune, pal-dová, so odój sys tremy.

⁶Jone sys kerdé dre trin etažy, ne dasavé-pac' stýlby, savé sys pe gréda, lénde nane; pal-dová so jone na sys dasavé buĥle, syr telatuné i maškiratune štúby.

⁷Vánta angíl kadalé štúby javritune gredatyr (dvorostyr), saví sys javrí, sys dro buĥlypén pandždešá kuniá.

⁸Pal-dová, so štubengiro dlugipén, savé sys pe gréda, so vydžánas javrí, sys pandždešá kuniá; ake, angíl Khangirí sys šel kuniá.

⁹Telé sys zagiibén andré dalé štúby vastočnone rigátyr, kóli te poddžan ke jone gredatyr, saví sys javrí.

¹⁰Ke vantakiro buglypen, saví sys pe gréda, ke vastóko angíl gása, angíl kher sys štúby.

¹¹Dromoro angíl lénde sys dasavo syr pašýl kodolé štúby, savé vydžánas pe paš-ratítko rig, dasavo dlugipén syr lénde, dasavo buĥlypén, saré léngire vygiibena, saró léngiro ukedyiben, léngire vudará sys dasavé, syr lénde.

¹²Kadasavé vudará sys syr dre štúby, savé vydžánas pe paš-dyvesýtko (južno) rig, vaš dová, sob (kaj) te zadžas dre lénde, sys vudár pašýl drom, savó džálas pir vánta pe vastóko.

¹³I phendiá jov mánge: “Štúby pe paš-ratítko (sievierno) i pe paš-dyvesýtko (južno) rigá, savé sys angíl anglatunó štéto, isyn svénta štúby, kaj rašaja isyn, savé javéna ke Raj Devél, Devél, i kaj jone xanas svénta dyibená (žertvy), odój jone čhuvéna svénta dyibená, i janéna marunó svénto dyibén, i dyibén paló grého, i dyibén pal čoripén, pal-dová so kadavá isyn svénto štéto.

¹⁴Kóli zadžána odorík rašaja, lénge treindiá te jačaven (jačkiren) odój péskiro uribén, dro savó jone dynarinénas (služynénas), a tén'či (pozže) te vydžán dalé-sventoné štetóstyr pe gréda (dvóro), so sys javrí; pal-dová, so kadavá uribén isyn svénto, lénge treindiá te ur'jen javír uribén, a tén'či te vydžán ke manušá.

¹⁵Kóli jov vygindiá andratuný Khangirí, jov vylydžijá man pir pórta, saví vydžálas pe vastóko, i jov lyjá te vyginel la trusciál (krugom).

¹⁶Jov vygindiá vastočno rig mierindytkone destesa, i vygindiá jov destesa pandž šelá desté.

¹⁷Pe paš-ratítko (sievierno) rig vygindiá jov dalé mierindytkone destesa pandžšelá desté.

¹⁸Dre paš-dyvesýtko rig vygindiá jov mierindytkone destesa pandžšelá desté.

¹⁹Porisija jov ke západno rig i vygindiá mierindytkone destesa pandžšelá desté.

²⁰Saré štaré rigéndyr vymierindia la; trusciál (krugom) sys vánta, lákiro dlugipén — pandžšelá desté, lákiro buĥlypén, — sys pandž šelá desté, sob (kaj) te na javél svénto štéto khetané nasventone štetosa.