Read Biblija - Pe Baltitko Romani čib (Romanes) 2019 Baltic Romani Bible Jezekiljo 43 Bible Online

Jezekiljo 43 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 43

¹I lydžijá kadavá manúš man ke pórta (vráty), ke odoia pórta, saví vydžálas pe vastóko.

²I, ake, Izrailjoskire-Devléskiri sláva džálas vastokóstyr, Léskiri zan — syr buté-panieskiro šumo, pe phuv ziaindia Léskiri sláva.

³Davá dykhibén sys dasavo-pac', syr me dykhcjom, kóli Me javavas te phenáv, so xasjola fóro, i dykhibena sys sýrby dolé dykhibena, savé Me dykhcjom pašýl reka (len') Xovar. Me pyjom mósa pe phuv.

⁴Ráskire-Devléskiri sláva zagijá dre Khangirí pir pórta, saví vydžálas pe vastóko.

⁵I ĥazdyjá man Ráskire-Devléskiro Dúho, i lydžijá man dre andratuný gréda, i, ake, Ráskire-Devléskiri sláva zmekciape pir sarí Khangirí.

⁶I me šundjom vari-konés, savó rakirlas mánge Khangirjátyr, a odová manúš sys terdó pašýl mánde.

⁷I phendiá jov mánge: “Manušéskiro čhava! Kadavá isyn Miro štéto, štéto vaš Miré ĥerá, kaj Me javáva te dživáv maškír Izrailjoskire čhavénde saró džiibén. Izrailjoskiro kher na javéla te magirel butýr Miro svénto lav; ni jone, ni léngire králja na javéna te kerén kadavá biladžaipén trupenca, léngire kral'jengire, pe vučé štéty.

⁸Jone čhuvénas péskiro progo pašýl Miro progo, péskiro vudár pašýl Miro vudár, adiáke, so jekh vánta sys maškír Mánde i lénde; jone magirenas Miro svénto lav péskire džungalé rendénca, savé kerénas, pal-dová Me xasiakirdjom len dre Mirí xolý.

⁹A akaná jone zalena Mándyr péskiro biladžaipén, péskire-kral'jengire trúpy, i Me javáva te dživáv maškír lénde pe saré beršá.

¹⁰Tu, manušéskiro čhava, rosphen Izrailjoskire kheréske pal kadaja Khangirí, sob (kaj) jone te ladžan péskire grehéndyr i, sob jone te kerén Khangirjákiri miéra.

¹¹Kóli jone javénas te ladžan doléstyr so jone kerénas, to sykáv lénge, syr vydykhela Khangirí, kaj i syr joj sys terdy, lákire vygiibena, lákire zagiibena, saré lákire priphenybená, saré lákire zakóny, začhin davá angíl léngire jakhá, sob (kaj) jone te rakhén, syr vydykhela kadaja Khangirí, saré lákire uphenybená, sob (kaj) jone te kerén pir lénde.

¹²Ake, isyn Khangirjákiro zakóno; uprál, pe bérga saró lákiro štéto, saró trusciál lákiro štéto isyn Svénto sventonestyr. Ake, isyn Khangirjákiro zakóno!”

¹³Ake, savó isyn altarjoskiro baripén dre kuniá, kóli te gines jekh kun' syr jekh kun' i jekh burnykakiro buĥlypén; dová, pe so jov isyn terdó (fundamientyco) isyn jekh kun', buĥlypnasa jekh kun' isyn dre kustýk trusciál (vokrug) pir saré léskire rigá; ake, isyn altarjoskiri palatuny rig.

¹⁴Doléstyr, pe so jov isyn terdó pe phuv (fundamientycostyr) ke telatuno ĥazdyiben sys duj kuniá, a buĥlypén — jekh kun'. Tykné ĥazdyibnastyr ke baró, gazdyiben štar kuniá, a buĥlypén léskiro — jekh kun'.

¹⁵Altarjoskiro vučipén — štar kuniá, léstyr ĥazdénape upré štar šyngá (rógi).

¹⁶Altarjoskiro dlugipén — dešujekh kuniá, a buĥlypén — diešujekh kun', jov isyn štarvenglytko pe saré štar rigá.

¹⁷A léskiro vystupo sys dešuštar kuniá dro dlugipén, dešuštar kuniá dro buĥlypén pe saré štar rigá, trusciál léste sys kustýk (polosa) dre paš kun', lákiro fundamientyco sys — dre kun' trusciál, zagiibén ke altarie sys vastokóstyr.

¹⁸I phendiá jov mánge: “Manušéskiro čhava! Adiáke rakiréla Raj Devél, Devél: ‘Ake, isyn uphenybená pal altárjo ke dová dyvés, kóli jov javéla kerdó, sob (kaj) te janén pe léste shačkiribnytka svénta dyibená (usasoženni) te čhuvén pe léste rat.

¹⁹Rašange Lievijoskire rodycóstyr, savé isyn Sadokoskire-kheritkoné rodóstyr, savé javéna ke Me, sob (kaj) te kerén butý vaš Mánge, rakiréla Raj Devél, Devél — te janén guruvóres syr svénto dyibén paló grého.

²⁰Le léskiro rat, čhuv pe saré léskire štar šyngá, pe štar véngly pir vystupo pe kustýk (polosa) trusciál, adiáke žužakir les, ker les sventonesa.

²¹Le guruvóres, syr svénto dyibén paló grého, shačkir les pe skerdo vaš dová štéto dro kher, paló svénto štéto.

²²A pe javír dyvés jan syr svénto dyibén paló grého bidošakire buznés, mek te žužakiren altárjo adiáke, syr žužakirenas (čystinenas) guruvesa.

²³Kóli tu mekesa te žužakires, jan bidošakire guruvóres, a bakréngire stadatyr — bidošakire bakrés.

²⁴Jan len angíl Ráskire-Devléskiro muj, rašaja mek te čhurdén pe lénde lond, i janéna len pe célo shačkiribén Ráske-Devléske syr svénto dyibén.

²⁵Jan eftá dyvesá, syr svénto dyibén paló grého pir buzneste dro dyvés; mek te janén, syr svénto dyibén pir guruvoreste i pir bakreste bakréngire stadatyr, sob (kaj) te javén bidošakire.

²⁶Eftá dyvesá trej lénge te žužakiren altárjo i te kerén les sventonesa, i adiáke posvencynen lésa vastá péskire.

²⁷Kiéli ž prodžána (nakhena) kadalé dyvesá, pe ohtóto (bidujéngiro déšto) dyvés i duredýr, rašaja javéna te janén pe altárjo tumaré céla shačkiribnytka i parikiribnytka svénta dyibená, i Me prilava len,’ — rakiréla Raj Devél, Devél.