Read Biblija - Pe Baltitko Romani čib (Romanes) 2019 Baltic Romani Bible Jezekiljo 44 Bible Online

Jezekiljo 44 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 44

¹Tén'ci jov, kadavá manúš, jandiá man pale, ke svénto štéto, kaj sys pórta (vráty), saví vydžálas pe vastóko, ne joj sys zaphandly.

²I phendiá mánge Raj Devél, Devél: “Kadaja pórta javéla zaphandly, na psiravelape (na otkerelape), nisavó manúš na zadžála pir láte, pal-dová so Raj Devél, Devél Izrailjoskiro zagijá dre láte; joj iavéla zaphandly.

³A thagári (kniazjo), savó iščo (inké) javéla bešéla dre pórta, syr thagári, sob (kaj) jov saštý te xal maró angíl Raste-Devléste. Jov zadžála dre kadalé — portakiro trémo: dalé dromésa zadžála i dalé dromésa vydžála.”

⁴Tén'ci jov lydžijá man dromésa pir paš-ratítko (sievierno) pórta angíl Khangirjákiro anglypén, i Me dykhcjom: ake, Ráskire-Devléskiri sláva pherdija Kher Devléskiro (Khangirí), i Me pyjom pe phuv mósa.

⁵I phendiá mánge Raj Devél, Devél: “Manušéskiro čhava! Prilé saró tyré ilésa, dykh tyré jakhénca, šun tyré kanenca saró, so Me rakiráva túke pal saré Devléskire-Ráskire Khangirjákire uphenybená, pal saré léskire zakóny, prilé tyré ilésa dová, kon zadžála dre Khangirí, i kon vydžála sventoné štetóstyr.

⁶Phen Izrailjoskire kheréske, kaj nikón na kandéla Devlés: Adiáke rakiréla Raj Devél, Devél: “Uhtýlla (dósi) te kerén tuménge, Izrailjoskiro kher, saré tumaré džungalé réndy.

⁷Te lydžán andré javire-manušniakire čhavén, konéste nane občhindlo iló, nane občhindly loč (plot'), sob (kaj) te javén pe Miro svénto štéto, savé magirenas Mirí Khangirí; te janén Miro maró, čekén i rat; sob (kaj) te phagiren Miro zavieto tumaré džungalé rendénca.

⁸Tumé na rakhenas Miro svénto štéto, a čhuvéna len, sob (kaj) te rakhén pe Miro svénto štéto.”

⁹Adiáke rakirél Raj Devél, Devél: “Naštý te zadžál dro Miro svénto štéto čužoné-manušniakiro čhavó, savó naobčhindle ilésa, naobčhindle ločasa (plotiasa), mek i dživél jov maškír Izrailjoskire čhavénde, ne ŭsajekh naštý léske te zadžál odorík.

¹⁰Ne Lievíty, savé durine mándyr, dro dová časo, kiéli durija saró Izrailjo, savé jačade (jačkirdé) Man, kon psirelas ke péskire ídoly, léndyr phučenape pal dová, so jone kerdé.

¹¹Jone javéna te dynarinén pe Miro svénto štéto syr rakhibnárja pašýl Khangirjákiri pórta i posobniki (pomogibnaskire) pašýl Khangirí, jone javéna te začhinen vaš narodo céla shačkiribnytka i javír svénta dyibená; jone javéna terdé angíl lénde, sob (kaj) lénge te dynarinén (te služynen).

¹²Pal-dová, so jone dynarinénas (služynénas) lénge angíl léngire ídoly, jone prityrdnenas Izrailjoskiro kher te kerén čoripén, Me ĥazdyjom pe lénde Miro vast, — rakiréla Raj Devél, Devél — so phučelape léndyr pal léngiro čoripén.

¹³Jone na javéna pašýl ke Me, sob (kaj) te kerén angíl Mánde svénto butý syr rašaja, i jone na javéna ke saré Miré, svénta vieščy (čysy), ke Svénto-sventonengiro, ne pe lénde javéla léngiri ladž i džungalé réndy, savé jone kerdé.

¹⁴Me keráva léndyr Khangirjákire rakhibnar'jen, vaš sarí Khangiritko butý, vaš saró, so kerélape odój.”

¹⁵A rašaja Lievijoskire rodycóstyr, Sadokoskire čhavé, savé dro dová časo, kiéli durine Izrailjoskire čhavé, savé rakhenas Miro štéto (sventyma), javéna ke Me, sob (kaj) te kerén butý vaš Mánge, jone javéna te terdjon angíl Miro muj, sob (kaj) te janén Mánge čekén i rat,” — rakiréla Raj Devél, Devél.

¹⁶Jone javéna te zadžán pe Miro svénto štéto, jone javéna ke Miro xabén, sob (kaj) te kerén butý vaš Mánge, sob (kaj) te rakhén Mirí stréga.

¹⁷I javéla adiáke, so kiéli jone javéna pe andratuný gréda (dvóro), ke pórta, tén'či jone čhuvéna pe péste ĥandladytko (ljonytko) uribén, ne naštý, sob (kaj) te javél pe lénde thanuno (vylnytko) uribén, kiéli jone javéna te dynarinén pe andralatuny gréda pašýl pórta i andrál Khangirí.

¹⁸Pe léngire šeré trej, sob (kaj) te javén ĥandladytka (ljonytka) turbany; trej, sob (kaj) telatuno uribén te javél pe lénde ĥandladestyr (ljonostyr), na trej, sob (kaj) te obphandenpe, kóli jone khamljona.

¹⁹Kiéli javéla trej te vydžán pe gréda so javrí, pe gréda, so javrí ke narodo, lénge trej te zlen péskiro uribén, dro savó jone kerénas svénto butý, trej te jačkiren (te jačaven) len dre svénta štúby, i te ur'jenpe dro javír uribén, sob (kaj) te na čilaven jone narodo péskire sventoné uribnasa.

²⁰I adiáke-pac' naštý lénge te muraven (te briinen) šeró, naštý lénge te barjakirén balá, a trej, sob (kaj) te javén podčhindle léngire balá.

²¹Naštý, sob (kaj) te p'jel rašáj mol (vino), kiéli jov džála pe andratuný gréda.

²²Naštý lénge te len dre romniá pivlia/biromeskire manušnia (udova), džuvliá, saví rozgijápe romesa, a trej, sob (kaj) te len péske patyvalé džuvlién Izrailjoskire — kheréskire rodóstyr, ci pivlia, konéskiro rom sys rašái.

²³Trej lénge te sykliakirén Miro narodo, so isyn svénto, a so nane, te phenén lénge, so isyn žužó, a so-nane.

²⁴Kiéli isyn narozlyne réndy (diély), lénge trej te javén sendar'jenca pir Miré uphenybená i te sendiakiren len Miré sendosa, te rakhén Miré zakóny, Miré statúty pal saré Miré svénki, te rakhén dre sventyma Miré sávaty (suboty).

²⁵Naštý lénge te magirén pes, sob (kaj) jone te poddžan ke muló manúš, ne, sob (kaj) jone te javén ke dad i daj, ke čhavó i čhaj, ke pšal i phen, savjate na sys rom; jone saštý te javén nažužé.

²⁶A kiéli kadasavó Lievito žužakirelape, to trej, sob (kaj) te otginel rašáj iščo (inké) eftá (bitrinéngiro deš) dyvesá.”

²⁷Dro dová dyvés, kiéli léske trej te javél pe svénto štéto pe andratuný gréda (dvóro), sob (kaj) te dynarinél pašo svénto, jov isyn bangó te janel svénto dyibén paló grého,” — rakiréla Raj Devél, Devél.

²⁸A kóli trej te phenés pal udielo (kotér phuv lénge) syr meknó mištypén, to Me som léngiro udielo (meknó mištypén). I nisavó mištypén na den lénge dro Izrailjo: Me som léngiro mištypén.

²⁹Jone javéna te xan mareskire janybnastyr, sventoné dyibnástyr paló grého, sventoné dyibnástyr paló čoripén, saró svencyndlo xabén dro Izrailjo isyn rašángiro.

³⁰Kažno pérvo phabaj/plódo doléstyr, so barjola pe phuv, kažno svénto janybén, savé by jone te na javén, isyn rašángire, saró pérvo tumaré marestyr otdén rašáske, sob (kaj) te javél bahtiakirdó tyró kher.

³¹Naštý, sob (kaj) te xan rašaja mulé-murdalengiro ci čirikliengiro mas, naštý sob (kaj) te xan dová, so riskiribnáskiro murdál (zvierjo) zahaia.