Read Biblija - Pe Baltitko Romani čib (Romanes) 2019 Baltic Romani Bible Jezekiljo 45 Bible Online

Jezekiljo 45 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 45

¹Kiéli javéna tumé te rozginen phuv pe koterá (pe učastki) syr meknó mištypén, den tén'či Ráske-Devléske svénto kotér phuv, konéskiro dlugipén te javél biš te pandž tysjoncy desté, a buglypen — deš tysjoncy, saró te javél svénto ke sama jagóry (kraí) trusciál (krugom).

²Saré dalé phuvjátyr ke štéto (sventyma) javéla štarvenglytko kotér (kusko) phuv, pir pandžšelá desté trusciál, a trusciál léste — vól'no (psiro) štéto dre pandždešá kuniá.

³Dalé saré mieratyr vygin biš te pandž tysjoncy desté, ĥáda javéla dlugipén, a deš tysjoncy javéla buĥlypén, kaj te javél svénto štéto (ventyma), Svénto-sventonestyr.

⁴Davá sventoné-phuvjákiri kotér phuv javéla vaš rašange, sventoné-štetoskire dynar'jénge (služytielienge), savé léna te kerén butý vaš Ráske Devléske, davá javéla štéto vaš léngire kherá, i kaj javéla obsvencyndlo kotér vaš svénto štéto.

⁵Dlugipén dre biš te pandž tysjoncy desté, buglypen dre deš tysjoncy — saró davá javéla vaš Lieviténge, Khangirjákire dynar'jénge, davá javéla léngiro mištypén bišé štubenca te dživén.

⁶Den dro foróskiro mištypén phuv pandž tysjoncy desté buĥlypnasa, biš te pandž tysjoncy dlugipnasa angíl sventoné-phuvjákiro kotér phuv, saví otdyny Ráske-Devléske; davá javéla saré Izrailjoskire — kheréskiro mištypén.

⁷Den thagariske (kniazjoske) kotér phuv pe odoia i javír rig, pašýl sventoné-phuvjákiri paš, saví otdyny Ráske-Devléske, i saví isyn pe miéža foróskire mištypnasa, ke zapado, zapadnone rigátyr i ke vastóko, vastočnone rigátyr, léskiro dlugipén javéla dasavo, syr jekh dolé-rodoskire koterendyr, zapadnone rigátyr ke vastočno miéža.

⁸Davá isyn léskiri phuv, léskiro mištypén dro Izrailjo; sob (kaj) Miré thagárja te na tasavenas butýr Miro narodo, sob (kaj) jone te den phuv Izrailjoskire kheréske pir léskire ródycy.

⁹Adiáke rakiréla Raj-Devél: “Uhtýlla (dósi), Izrailjoskire thagarjale (kniázi). Pirijačen te kerén nahrata réndy te občoren. Kerén séndo i čačipén, pirijačen te vytraden Miro narodo léskire phuvjátyr, — rakiréla Raj Devél, Devél.

¹⁰Mek te javén tuménde čačuné ubladýtka (viesy), čačuný efa, čačunó bato.

¹¹Efa i bato bangé te javén dre jekhori-pac' miéra, adiáke, sob (kaj) dro bato te zadžál — déšto miéra xomierostyr, i dre efa déšto xomieroskiri miéra; léngiro vyginyben dykhén pir xomiero.

¹²Dro šékieljo isyn biš giery, a biš šékieli, biš te pandž šékieli i dešupandž šékieli javéna tuménde syr jekh mina.

¹³Ake, isyn dan' (dyibén), savó trej te den thagariske: šovtone efakiri miéra givitkone xomierostyr, šóvto jefakiro miéra ĥerstytkone xomerostyr.

¹⁴Ake, isyn uphenybén pal olivítko dzet (jeliejo); jeliejoskire korostyr den déšto miéra batostyr deš baty — davá isyn xomer, pal-dová, so dro xomero isyn deš baty.

¹⁵Jekha bakriá duj šelengire-bakréngire stadatyr lačhé Izrailjoskire feldatyr — saró davá vaš célo shačkiribnytko i marunó svénto dyibén, svénto dyibén te parikirén, sob (kaj) te javén žužé,” — rakiréla Raj Devél, Devél.

¹⁶“Narodo saré phuvjátyr isyn bangó te janel davá svénto dyibén thagareske dro Izrailjo.

¹⁷A thagariskiro bangipen javéla te del célo shačkiribnytko, marunó svénto dyibén, jov javéla te janel thaduno svénto dyibén pe svénki, dre neve čhoná, dre sávaty, dre saré Izrailjoskire-kheréskire bahtalé dyvesá. O thagári isyn bangó te janel svénto dyibén (žértva) paló grého, marunó svénto dyibén, célo shačkiribnytko parikiribnytko svénto dyibén vaš Izrailjoskire-kheréskiro žužipen.

¹⁸Adiáke rakiréla Raj Devél, Devél: Dro pérvo čhon, pe pérvo čhonytko dyvés le guruvendyr bidošakire guruvóres te žužakirel svénto štéto.

¹⁹Mek te lel rašáj rat dalé sventoné dyibnástyr paló grého, mek te počhuvel les pe vudará dre Khangirí pe štarvenglytko učhakiriben pašýl altárjo (žiertvieniko), pe vystupo, kaj portakire stýlby dre andratuný gréda.

²⁰Adiáke ker pe eftáto čhonytko dyvés pal odolénde, savé keréna gréhi na džiný, so jone keréna i pal kodolende, savé keréna gréhi pir naivo, i adiáke žužakiren khangirí.

²¹Dro pérvo čhon, dro dešuštarto dyvés javéla Patradí tuménde, kiéli trej te xan bi-droždžengiro maró.

²²Dro davá dyvés o thagári janéla pal péste i paló narodo saré phuvjátyr guruvóres, syr svénto dyibén paló grého.

²³Dre dalé eftá dyvesá jov bangó te janel Ráske-Devléske dro célo shačkiribén kažno dyvés pir eftá guruvorende, pir eftá bakrende bidošakire, a syr svénto dyibén paló grého — kažno dyvés pir buzneste (kozloste).

²⁴Marunó svénto dyibén jov isyn bangó te janel pir efa pe guruvoreste, pir efa pe bakreste, pir olivitkone-dzetoskiro gino pe efa.

²⁵Dro eftáto čhon, pe dešupan-džto-čhonytko dyvés, pe svénko, kiéli džána kadalé eftá dyvesá, jov bangó te janel dová, so sys kadasavó svénto dyibén adákicy, syr sys olivítko dzet.”