Read Biblija - Pe Baltitko Romani čib (Romanes) 2019 Baltic Romani Bible Jezekiljo 46 Bible Online

Jezekiljo 46 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 46

¹Adiáke rakiréla Raj Devél, Devél: “Andratune-gredakiri pórta, saví vydžála pe vastóko, mek te javél zakerdy (zaphandly), kiéli džána šov butitka dyvesá, a dro dyvés sávato (subóta), dro dyvés, kiéli lyjape nevó čhon, mek te javél otkerdy (otphandly).

²O thagári zadžála pir portakiro trémo, so vydžála javrí, jov javéla terdó pašýl kadalé portytka stýlby. E rašaja keréna léskiro célo shačkiribnytko i léskiro parikiribnytko svénto dyibén. Pašýl portakiro progo jov déla patýv Ráske-Devléske i vydžála, a pórta mek te na zakeren (na zaphanden) bel'velié.

³I adiáke-pac' narodo phuvjátyr javéla te del patýv (te kloninelpe) angíl Raste-Devléste pašýl zagiibén dre pórta, dre sávaty (suboty), dre neve čhoná.

⁴Ake, isyn shačkiribén, savó thagári janéla Ráske-Devléske dro dyvés sávato: šov bakrore bidošakire, i jekh bidošakiro bakro.

⁵Marunó svénto dyibén bangó te javél efa pal bakreste, pe bakroreste javéla dasavo marunó svénto dyibén, kicý déla léskiro vast, gino olivítko dzet (jeliejo) javéla pe efa.

⁶Dro neve čhonytko dyvés jov janéla guruvengires gurtostyr, bidošakire guruvóres; šov bakrore, bidošakire bakrores.

⁷Jov janéla marunó svénto dyibén jekh efa pe guruvoreste, efa pe bakreste, a pe bakrorende-kicý déla léskiro vast, gino olivítko dzet pe efa.

⁸Kiéli javéla thagári, jov isyn bangó te i zadžál pir portakiro trémo, bangó te vydžál dalé-pac' dromésa.

⁹A kiéli narodo phuvjátyr javéla pe svénki angíl Ráskire-Devléskiro muj, odoléske, kon zagijá pir paš-ratítko (sievierno) pórta, sob (kaj) te del patýv Devléske, trej te vydžál paš-dyvesytkoné portasa, a odoléske, savó zagijá pir paš-dyvesýtko (južno) pórta, trej te vydžál paš-ratitkoné portasa; naštý léske te vydžál dolé-pac' portasa, savjása jov zagijá, jov isyn bangó te vydžál pir javír pórta.

¹⁰O thagári isyn bangó te javél maškír lénde: kiéli jone zadžána, zadžála i jov, kiéli jone vydžána, vydžála i jov.

¹¹Pe svénki, i dre uphendle bahtalé dyvesá marunó svénto dyibén léstyr bangó te javél kadasavó: efa pal guruvoreste, efa pal bakreste, a pe bakrorende-kicý déla léskiro vast, i olivítko dzet piró gino pe efa.

¹²A kiéli thagári péskire iléstyr zakaméla te janel célo shačkiribnytko ci parikiribnytko svénto dyibén (žértva) Ráske-Devléske, stregarja (stražniki) isyn bangé te otkeren (te psiraven) léske pórta, saví vydžála pe vastóko, i jov keréla péskiro célo shačkiribén, péskiro parikiribnytko svénto dyibén adiáke, syr kerdé dre sávaty, a tén'či jov vydžála, i kiéli vydžála, to pórta zakerlape (zaphandelape).

¹³Kažno dyvés janén (tumé rašaja) Ráske-Devléske syr célo shačkiribnytko svénto dyibén jekhe-beršeskire — bidošakire bakrores, janén les kažno zlóko (ránko).

¹⁴A marune janybnastyr pričhuvén ke jov kažno zlóko šóvto miéra efatyr olivítko dzet tríto miéra ginostyr, sob (kaj) te javél davá khetané jaržesa; kadasavó isyn viéčno priphenybén pal marunó janybén Ráske-Devléske pe saré beršá.

¹⁵Adiáke mek te janén dro célo shačkiribnytko bakrores, marunó janybén i olivítko dzet kažno zlóko (ránko) saró časo.”

¹⁶Adiáke rakiréla Raj Devél, Devél: “Kiéli o thagári déla dáro vari-konéske péskire čhavorendyr, davá javéla vaš meknó mištypén léskire čhavorenge (bijatenge), davá javéla léngiro meknó mištypén.

¹⁷Kiéli ž jov déla péskire mištypnástyr dáro vari-konéske péskire pishar'jendyr, to davá dáro javéla pishariskiro, a kiéli javéla vól'no berš, to dáro risjola pale ke thagári. Féni (tóka) pale ke léskire čhavé bangó isyn te piridžal léskiro meknó mištypén.

¹⁸Naštý, sob (kaj) te lel thagári narodoskire-mekné mištypnástyr, kóli jov otlela léndyr; jov isyn bangó te del péskire mekné mištypnástyr péskire čhavorenge (bijatenge), sob (kaj) nikón miré narodóstyr te na javél vytradyno péskire mištypnástyr.”

¹⁹Tén'ci lydžijá jov man zagiibnasa, savó sys pašýl pórta, ke svénta štúby vaš rašange, savé vydžánas pe paš-ratítko (sievierno) rig, ake, odój isyn jekh štéto, savó vydžála pe západno jagóro (krajo).

²⁰I phendiá mánge: “Adavá isyn štéto, kaj rašaja isyn bangé te keraven svénto dyibén (žértva) pal čoripén, i svénto dyibén pal grého, i kaj isyn bangé te peken marunó svénto dyibén i naštý te janes les pe gréda (dvóro), saví sys javrí, vaš dová, sob (kaj) narodo te javél svénto.”

²¹I vylydžijá jov man pe gréda, saví sys javrí, prolydžija man pir štar gredytka véngly, ake, dro kažno gredytko venglo sys iščo (inké) pir jekh gréda.

²²Dre saré štar gredytka véngly sys začhakirde gredy, dlugipén léngiro sys štardešá kuniá, a buĥlypén trindeša, jekh baripén (miéra) vaš saré štar véngly.

²³Trusciál (krugom) lénde sarénde — vánty, a pašýl vánty, kerdé trusciál keraibnytka štéty (očagi).

²⁴I phendiá jov mánge: “Ake isyn keraibnytka štúby, kaj Khangirjákire (Xramoskire) dynárja keravena svénta dyibená (žertvy) narodóstyr.”