Read Biblija - Pe Baltitko Romani čib (Romanes) 2019 Baltic Romani Bible Jezekiljo 47 Bible Online

Jezekiljo 47 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 47

¹Tén'ci jov (davá-pac' manúš) jandiá man (Jezekiljos) pale ke Khangirjákiro vudár; ake, Khangirjákire progostyr thadéla paní pe vastóko, pal-dová, so Khangirí sys terdy fasadosa pe vastóko. I paní thadelas čačé-Khangirjákire rigátyr pe paš-dyvesýtko rig, kaj sys altárjo.

²I vylydžijá jov man paš-ratitkoné portakire dromésa, savó sys javrí, lydžijá ke pórta, saví sys javrí, dromésa, savó vydžála pe vastóko; ake, paní thadéla pir čačí (pravo) rig.

³Kiéli odová-pac' manúš gijá pe vastóko, jov rikirelas dro vast šelo, i jov vymierindia tysjoncy (bará) kuniá (lokci), i lydžijá jov man piró paní; paní sys ke miro kokalkico (ladyžka).

⁴Nevéstyr (nevés) jov vygindiá iščo (inké) jekh tysjonco, i lydžyja man piró paní; paní sys ke čang. Vygindiá jov nevés tysjonco, i lydžijá man; paní podgíia ke mirí kustýk (trušula).

⁵Vygindiá iščo (inké) tysjonco, adáj sys dasavo sýgno panyng, so naštý sys mánge te piridžav, pal-dová so paní sys adiáke xor, so treindiá te plyvinav te piridžav davá panyng sys naštý.

⁶I phendiá jov mánge: “Dykh tu davá, manušéskiro čhavó?” I lydžijá man pale ke brégo rekakiro (leniakiro).

⁷Kiéli me javdjom pale, ake, pe bregi pašýl sýgno rékica (lenorí) (patoko) sys but drevy jekhe i javire rigátyr.

⁸I phendiá jov mánge: “Davá paní thadéla pir vastočnone-phuvjákiri rig, džála pe félda, a syr zadžála dro mórjo (derjáv), i kerélape léskiro paní sastiakiribnytko (liečebno).

⁹Kažno džidó sozdyiben, savó kharélape (dvižynelape) odój, kaj zadžána duj rekicy, javéla te dživél, odój javéla but mačhé, pal-dová, so zadžála odorík dová paní i kerélape paní dre mórjo (derjáv) sastiakiribnytko, i karik zadžála daja sykno rékica (lenorí), saró odój javéla džidó.

¹⁰Javéna terdé pašýl léste manušá, savé uhtylena mačhen En-Gadiatyr (Jen-Gaddiatyr) ke Jeglaimo, jone javéna te začhurden khudia (sieti). Odój javéla mačhé, javéna but mačhé syr dro Baró Mórjo (derjáv).

¹¹Léskire artapieli (xor boloty) i čhuviny (lužy), savé na vysastjona, javéna jačade (jačkirdé) vaš lond.

¹²Pašýl brégo sýgno rékica (lenorí) (patoko), pir rekicakire bregi, jekhe i javire rigátyr javéna te barjon rázna drevy, savé déna xabén: léngire patria (listy) na javéna te zašutjon, i na pirijačena te janén phabá (plódy). Každo nevó čhon javéna te vybarjon neve, pal-dová, so paní vaš lénge thadéla sventoné štetóstyr; léngire phabá/plódy javéna te xan, a patria (listy) te sastiakirenpe.”

¹³Adiáke rakiréla Raj Devél, Devél: “Ake isyn rozginyben, pir savó tumé san bangé te roskeren phuv, sob (kaj) te doreselpe joj dešudujenge Izrailjoskire rodycenge: duj pašá Jozáske (Iosifoske).

¹⁴Len daja phuv syr meknó mištypén jekh i javír manúš, pal-dová, so Me ĥazdyjom Miro vast sovlahasa te dav daja phuv tumaré dadénge, kadaja phuv isyn tumaró meknó mištypén.

¹⁵Ake, isyn phuvjákiri miéža: pe paš-ratítko jagóro (krajo), lyi Baré Morjostyr pir drom ke Xieglono, syr te džas ke Cedado.

¹⁶Jemafo, Bieroto, Sivraimo, ke Gacar Tihono, savó isyn maškír Damásko i Jemafoskire štéty, savó isyn pe Avranoskiri miéža.

¹⁷I javéla miéža morjostyr (derjavestyr) ke Gacar-Jenono, miéža pašýl Damásko, a duredýr pe paš-ratítko isyn štéto Jemafo, ake, isyn paš-ratítko rig.

¹⁸Špéra (čerta) vastočnone rigátyr lydžán maškír Avrano i Damásko, maškír Galado i Izrailjoskiri phuv, pir Iordáno, paš-ratitkoné rigátyr, ke vastočno mórjo (derjáv), davá isyn vastočno rig.

¹⁹Paš-dyvesýtko rig isyn paš-dyvesytkoné rigátyr Tamarostyr ke paní, kaj xanaspe pir lavá pašýl Kadiso, kaj thadéla ručajo ke Baró Mórjo (derjáv), davá isyn paš-dyvesýtko rig pe paš-dyvesýtko rig.

²⁰Západno miéža — Baró Mórjo (derjáv), paš-dyvesytkoné miežatyr ke štéto angíl Jemafo, davá isyn západno rig.

²¹Roskeren daja phuv manušénge maškír tuménde pe pašá pir Izrailjoskire ródycy.

²²Roskeren (rozdielinen) la piró žriébijo, sob (kaj) te javél davá tumaró meknó mištypén javire — phuv'jengire manušénge, savé dživéna maškír tuménde, i savé bijanena čhavorén. Jone isyn bangé te ginenpe maškír Izrailjoskire čhavénde syr tumaré manušá, savé dživéna, jone zadžána khetané tuménca dre dólia (bažyn) maškír Izrailjoskire ródycy.

²³I javéla adiáke: so kóli dživéla maškír vari-savó ródyco javire-phuv'jengiro manúš, odój den léske meknó mištypén léskiro”, — rakiréla Raj Devél, Devél.